ШIум фэзыщэхэрэ пIуныгъэр

ШIум фэзыщэхэрэ пIуныгъэр | Адыгэ макъ

Щынджые гурыт еджапIэр

«ШIу шIэ» зыфиIорэ гуфэкIо зэхахьэ Щынджые гурыт еджапIэу N 24-м зыщылажьэрэр илъэсипшI хъугъэ. 2016-рэ илъэсым ар зэхащэгъагъ ыкIи илъэс пчъагъэхэм IэпыIэгъу Iофтхьэбзэ зэфэшъхьафхэр кIэлэегъаджэхэмрэ кIэлэеджакIохэмрэ зэгъусэхэу зэрахьагъ.

Шэуджэн районым ит еджэпIэ-интернатэу зипсауныгъэкIэ щыкIагъэхэр зиIэ сабыйхэр зычIэсхэм гуфакIохэм яшIушIэ IэпыIэгъу бэмышIэу нагъэсыгъ. КIэлэцIыкIухэм ящыкIэгъэщт хьап-щыпхэр ыкIи IэшIу-IушIухэр афарагъэщагъэх. Iофтхьабзэм хэлэжьагъэх Тэхъутэмыкъое районым ит гурыт еджапIэхэу N 24-м, N 1-м, N 2-м ыкIи N 25-м якIэлэеджакIохэр.— Мы еджэпIэ-интернатым тызэрэкIорэр апэрэп, — тыщигъэгъозагъ Щынджые гурыт еджапIэу N 24-м изавучэу Трахъо Аминэт. — «Хымэ сабый хъурэп» зыфиIорэ шIушIэ фондым ипащэу Уджыхъу Сусанэ тыригъусэу мыщ ыпэкIэ тыкIогъагъ. ГуфэкIо зэхахьэу тиIэм ихьатыркIэ мыщ фэдэ Iофтхьабзэхэр ренэу зэхэтэщэх. ХэушъхьафыкIыгъэ дзэ операцием щыIэ дзэкIолIмэ апае тыугъоигъэ шIушIэ IэпыIэгъури афащэщт. Тэхъутэмыкъое районым гъэсэныгъэмкIэ и ГъэIорышIапIэ ынаIэ къыттетэу, ны-тыхэр тиIэпыIэгъоу мыщ фэдэ Iофтхьабзэхэр зэшIотэхы. Шэуджэн районым ит еджэпIэ-интернатыр зыкIыхэтхыгъэр зипсауныгъэкIэ щыкIагъэхэр зиIэ сабыйхэм тиIэпыIэгъу алъыдгъэIэсыным, тишIуагъэ ядгъэкIыным пай.

Щынджые гурыт еджапIэр

Трахъо Аминэт къызэриIотагъэмкIэ, «ШIу шIэ» зыфиIорэ еджэпIэ зэхахьэу яIэм кIэлэеджакIохэр чанэу хэлажьэх. Хэгъэгу зэошхом иветеранхэу чылэм дэсыгъэхэм опсауфэхэ IэпыIэгъу афэхъущтыгъэх. Тылым щылэжьагъэхэми джащ фэдэу яIэпыIэгъу анэ­сы. Ахэм ащыщ Нэхэе Зубер, илъэс 95-рэ ащ ыныбжь. Ащ фэдэу ныбжь зи1эу чылэм дэсхэм анаIэ атырагъэты. Зидунай зыхъожьыгъэ ветеранхэм якъэхэр аукъэбзых. Заом хэлэжьагъэхэм ясаугъэтэу чылэм дэтыр зытет чIыпIэм гъэкъэбзэн Iофтхьабзэхэр ренэу щызэшIуахых. Яхэгъэгу, ячылэ шIу алъэгъуным кIэлэеджакIохэр фапIух.Сэнаущыгъэ зыхэлъ кIэлэцIыкIухэм хэхъоныгъэ ягъэшIэгъэнымкIэ район Гупчэм иметодистэу ЛIэхъу­сэжъ Сусанэ, Щынджые гурыт еджапIэу N 24-м ипащэу Iэшъынэ Налбый, ащ иупчIэжьэгъоу Мэзыужьэкъо Саниет IофшIэнхэр зэхэщэгъэнхэм чанэу ахэлажьэх.— ШIушIэ IэпыIэгъур афэщэгъэным имызакъоу, сабыйхэм зэрафэгумэкIыхэрэр, зэрямызакъор зэхядгъэшIэнэу тыфэягъ, — хи­гъэунэфыкIыгъ ЛIэхъусэжъ Сусанэ. — ЕджэпIэ-интернатым ипащэу Хъуажъ Мариет нэшIо-гушIоу къытпэгъокIыгъ. Сабыйхэр къызэрэтщыгушIукIыгъэхэр гум нэсыгъ. «Движение Первых» зыфиIорэ зэхахьэм кIэлэцIыкIухэр зэраштэхэрэм фэ­гъэхьыгъэ мэфэкI хъугъэ-шIагъэми тыте­фагъ. КIэлэеджакIохэмрэ кIэлэегъа­джэхэмрэ зэрэзэкъотхэр нэрылъэгъу къытфэхъугъ. Ащ тигъэгушIуагъ.КIэлэеджакIохэмкIэ шIушIэ зекIо къодыеу щымытэу, мы Iофтхьабзэм ахэр гуфэбэныгъэм къыфигъэущыгъэх. ШIушIэныр — лъэпкъым ишэн-хабзэхэм апэ ит, ащ тетэу кIэлэцIыкIухэр пIугъэнхэм мэхьанэшхо иI.Тэу Замир

Поделиться: ВКонтакте Telegram Одноклассники