Анцокъо И.
МыIэрысэм икъэгъэкIынкIэ республикэм ихъызмэтшIэпIэ анахь инэу Тюлпэрэ Юрэ зипащэр пхъэшъхьэ-мышъхьэм иIухыжьын ижъотыпIэ хэт. Мыекъопэ районым ичIыгу гектар 350-рэ ащ ичъыгхатэхэм щызэлъаубыты. Мы мафэхэм яхъулIэу процент 65-м кIахьэу ялэжьыгъэ пачыжьыгъ.
Мэфэ ошIухэр къызфагъэфедэзэ лэжьакIохэм чанэу Iоф ашIэ. МыIэрысэ инхэу чъыгым бжьэ пчыгъэу пытхэм уалъыхъун ищыкIагъэп. ПIэ пщэимэ, уаблэIэбыкIыщтэп. Лъэпкъ зэфэшъхьафи 10 фэдиз хъызмэтшIапIэм щалэжьы: айдаред, бребурн, кубанская багряная, флорина, голден ыкIи нэмыкIхэр. Непэ пачыжьырэр айдаредымрэ флоринэмрэ.— Джырэ нэс тимыIэгъэ къэгъэлъэгъонхэм мыгъэрэ гъэбэжъур апэблагъ. МыIэрысэ тонн мин 18 фэдизыр пытчыжьынэу итэхъухьэ. ДжырэкIэ тонн мин 12-р гъэтIылъыпIэм едгъэкIугъ, — къыIуагъ хъызмэтшIапIэм сатыумрэ маркетингымрэкIэ именеджерэу Денис Анастасиным.ХъызмэтшIапIэм щыпачыжьырэ мыIэрысэр джырэкIэ ащэрэп. ЗэкIэ гъэучъыIалъэхэм арагъэкIу, чъыгхатэхэм къахащырэр занкIэу ащ ращалIэ. Тонн мин 20,5-м телъытэгъэ псэолъэшхом тракторхэмрэ хьылъэIэтхэмрэ щызэблэчъых. МыIэрысэ лъэпкъ пэпчъ фэгъэнэфэгъэ гъэучъыIалъэм рагъэкIу. Пхъэшъхьэ-мышъхьэр зыфэдэм елъытыгъэу чъыIэр тырагъэуцо. ГурытымкIэ фабэр градуси 2-м нахьыбэп. ГъэучъыIалъэм игъэфедэнкIэ хъызмэтшIапIэм иинженерэу Пэфыф Артур къызэриIуагъэмкIэ, ащкIэ аужырэ шапхъэхэм адиштэрэ технологиехэр агъэфедэх.— ТигъэучъыIалъэхэм пхъэшъхьэ-мышъхьэхэр охътэ кIыхьэм ащыпIыгъын олъэкIы. Илъэсым ехъу япIалъ. ЗэрэдгъэтIылъыгъэхэм фэдэу къызэтенагъэхэу мыIэрысэхэр къэтэштэжьых. Кислородыр зэрэдгъэмакIэрэм ыкIи CO₂-м ибагъэ зэрэдгъэIорышIэшъурэм ар яхьатыр. Бэрэ зэрэщылъыгъэр мыIэрысэм егуаорэп. ШIуагъэу хэлъыгъэхэр кIодыхэрэп, итеплъи зэщыкъорэп. Илъэс пчъагъэм IофшIэнхэмкIэ ар тыушэтыгъэ. ГущыIэм пае, блэкIыгъэ илъэсым дгъэтIылъыгъэгъэ мыIэрысэхэм яаужырэ килограммхэр мыгъэ шышъхьэIум гъэучъыIалъэм къычIэтщыжьыгъагъ, язытет дэгъу дэдагъ, — еIо Артур.
Ау мыIэрысэм ищылъ кIыхьэ зышIырэр гъэучъыIэлъэ дэгъум изакъоп, ежь пхъэшъхьэ-мышъхьэр къызэрэпачырэ шIыкIэри ары. МыIэрысэхэр зэутэкIыхэ, чIыгум тефэхэ хъущтэп, ахэм афэдэхэр пIэлъэ кIыхьэм щыбгъэлъын плъэкIыщтэп, кIодыщтых. Арышъ, гъэбэжъум икъэугъоижьын шапхъэм диштэным хъызмэтшIапIэм лъэшэу анаIэ щытырагъэты. ГъэучъыIалъэм мыIэрысэхэр чIащэнхэм ыпэкIэ IофышIэ гъэнэфагъэм ахэр еуплъэкIух, тэрэзэу къыпачыгъэмэ зэрегъашIэ. ПстэумкIи мафэм зы нэбгырэм мыIэрысэ килограмм 1500-рэ фэдизыр къеугъои. Ащ фэшъхьафэу, къыпызыгъэу чIыгум телъхэри шъхьафэу къашыпых. Ахэм мыIэрысэ щытIагъэ ахашIыкIы. IэшIу-IушIушI хъызмэтшIапIэу Москва щылажьэрэм ащещэфы. Абдзэхэхьаблэ икъушъхьэпэ чIыналъэ къыщагъэкIырэ пхъэшъхьэ-мышъхьэр Урысыем ичIыпIэ пстэуми ащызэбгырэкIы. МыIэрысэр зэкIэ аугъоижьэу къызалъытэжьырэм, иIугъэкIын фежьэщтых. Ом изытет рахъухьагъэр къымыукъомэ, шэкIогъум гъэбэжъум иугъоижьын аухыщт.Чъыгхатэхэм якъэгъэкIынрэ гъэбэжъум иугъоинрэ адакIоу хъызмэтшIапIэм псэолъэшI IофшIэнхэр щэкIох. МыIэрысэр зыщызэхадзыщт чIыпIакIэ ашIы. Ащ фэшъхьафэу, зы чъыгхатэм жъы хъугъэ чъыгхэр щырачыжьыгъэх, кIэхэр щагъэтIысхьащтых.Анцокъо Ирин.