Зэдэлэжьэныгъэм зегъэушъомбгъугъэныр

Адыгэ Республикэм и ЛIышъхьэу КъумпIыл Мурат Урысые Федерацием илIыкIоу быслъымэн хэгъэгухэм язэдэлэжьэныгъэ и Организацие дэжь ренэу щыIэ Турко Даудовым зэIукIэгъу дыриIагъ. Ар IофшIэным епхыгъэ гухэлъ иIэу Мыекъуапэ къэкIуагъ.

Урысые Федерацием иIэкIыб къэрал политическэ курс къыдыхэлъытагъэу дунаим ибыслъымэн хэгъэгухэм респуб­ликэм адыриIэ зэдэлэжьэныгъэм нахь зегъэушъомбгъугъэным иIофыгъохэм лъэныкъохэр атегущыIагъэх. Адыгеим къызэрэкIуагъэм пае хьакIэм зэрэфэразэр къыIуагъ республикэм и ЛIышъхьэ. КъумпIыл Мурат къызэрэхигъэщыгъэмкIэ, гуманитар ыкIи культурнэ зэпхыныгъэхэм нахь зягъэушъомбгъугъэным республикэм ифедэ хэлъ.Ащ фэдэ зэпхыныгъэхэр гъэпытэгъэн­хэмкIэ мэхьанэшхо иI Адыгэ Респуб­ликэмрэ Краснодар краимрэ арыс быслъымэнхэм я ДиндэлэжьапIэ. Респуб­ликэм ихэбзэ къулыкъухэм ащ гъусэныгъэ дыряIэу Адыгеим щыпсэурэ цIыфхэу лъэпкъ зэфэшъхьафхэм ­къахэкIыгъэхэм ыкIи дин зэмылIэужыгъохэр зылэжьыхэрэм язэгурыIоныгъэ къыкIимычынымкIэ шIуагъэ хэлъэу япшъэрылъхэр зэшIуахых. Ащ нэмыкIэу бгъуитIумкIи зэдыряIэ зэпхыныгъэхэм джыри нахь зягъэушъомбгъугъэным Адыгеим ифедэ хэлъ. Мэкъу-мэщым, зекIоным, нэмыкI лъэныкъохэм япхы­гъэу зэдэлэжьэныгъэм нахь хэхъоныгъэ егъэ­шIыгъэнымкIэ республикэм амалышхо­хэр иIэх.ЗэдэгущыIэгъум илъэхъан лъэныкъо­хэр анахьэу къызщыуцугъэхэ Iофыгъо­хэм ащыщ дунэе Iофтхьабзэхэу быслъы­мэн хэгъэгухэм ялIыкIохэр зэзыпхыхэрэм Адыгеир ахэлэжьэныр, илъэс къэс зэхащэрэ дунэе экономическэ форумэу «Россия – Исламский мир: Kazan forum» зыфиIорэр ахэм зыкIэ ащыщ.КъумпIыл Мурат къызэриIуагъэмкIэ, ащ фэдэ зэпхыныгъэхэм амал къаты IофшIэнымкIэ лъэныкъо зэфэшъхьафхэр къыдалъытэнхэу, зэдызэшIуахыщт проектхэм атегущыIэнхэу, бизнесым джыри нахь хэхъоныгъэ ышIынымкIэ амалыкIэхэр гъэфедэгъэнхэу.«Быслъымэн хэгъэгухэм лъэныкъуитIу зэдэлэжьэныгъэу азыфагу илъым нахь зегъэушъомбгъугъэным Адыгеим ифедэ хэлъ. Сатыу-экономикэ зэпхыныгъэхэм зягъэушъомбгъугъэнымкIэ, республикэм ипродукцие нэмыкIхэм аIэкIэгъэхьэгъэ­нымкIэ, культурнэ ыкIи гуманитар зэпхыныгъэхэр гъэпытэгъэнхэмкIэ амалхэр тиIэх. Арышъ, IэкIыб къэрал политикэу тихэгъэгу зэрихьэрэмрэ ­лъэпкъ федэхэмрэ атегъэпсыхьагъэу тизэпхыныгъэ джыри нахь зэрэдгъэпытэщтым, IофтхьэбзакIэхэр пхырыщыгъэнхэм, Адыгеим щыпсэухэрэм федэ къа­фэзыхьыщт IофыгъуакIэхэр зэшIохы­гъэнхэм япхыгъэ IофшIэныр лъыдгъэ­кIотэщт», — къыхигъэщыгъ КъумпIыл Мурат.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.