Апэрэу щэкIо

Мыекъопэ ыкIи Адыгэ епархиер икIэщакIохэу Дунэе Рождественскэ Еджэным ишъолъыр едзыгъо хахьэу чъэпыогъум и 23-м къыщегъэжьагъэу и 25-м нэс Мыекъуапэ Апэрэ НыбжьыкIэ медиафорум щэкIо.

Форумым пшъэрылъэу иIэр къэбарлъыгъэIэс амалхэм яшIуагъэкIэ гушъхьэ­лэжьыгъэ баиныгъэр тиреспубликэ щылъызыгъэкIуатэ зышIоигъо ныбжьыкIэхэр, журналистхэр, блогерхэр зэ­IугъэкIэгъэнхэр ары.Iофтхьабзэм икъызэIухын къырагъэ­блэгъагъэх АР-м гъэсэныгъэмрэ шIэныгъэмрэкIэ иминистрэу Евгений Лебедевыр, АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр, Мыекъопэ къэлэ администрацием илIыкIохэр, нэмыкIхэри.Форумым иIофшIэн хэлэжьагъэх ­Адыгэ Республикэм иапшъэрэ еджапIэхэм ыкIи колледжхэм ястудентхэу журналист, видеограф ыкIи блогер хъу зышIоигъохэр.Мыекъопэ ыкIи Адыгэ епархием яархиепископэу Тихон зэIукIэм къекIолIагъэхэм шIуфэс гущыIэкIэ закъыфигъэзагъ. Ащ къызэриIуагъэмкIэ, непэрэ медиасообществэмрэ Чылысымрэ азыфагу зэпхыныгъэу илъыр гъэпытэгъэным, лъыгъэкIотэгъэным къыткIэхъу­хьэрэ ныбжьыкIэхэм яшIогъэшхо хэлъ.— Диныр зылэжьырэ ныбжьыкIэхэм ямызакъоу, къыткIэхъу­хьэрэ лIэужхэмкIэ мы Iофтхьабзэм мэхьанэшхо зэриIэм щэч хэлъэп. Лъэпкъыбэ зыщыпсэурэ ыкIи дин зэфэшъхьафхэр зыщалэжьырэ Адыгеим чыристан ыкIи быслъымэн ныбжьыкIэхэм гушъхьэлэжьыгъэ баиныгъэу азыфагу илъыр къэухъумэгъэным ыкIи лъыгъэкIотэгъэным алъэныкъокIэ форумыр площадкэу щыт, ащ зэрепхых. Сицыхьэ телъ тапэкIи зэдэлэжьэныгъэр зэрэлъыдгъэкIотэщтым, динхэм азыфагу илъ зэгурыIоныгъэр зэрэдгъэпытэщтым, — ­къыIуагъ архиепископым.АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу К. Щербаковым зэхахьэм къыщыгущыIагъ хэбзэ къулыкъухэм, ныбжьыкIэхэм, чыристаныр, быслъымэн динхэр зылэжьыхэрэм зэпхыныгъэ дэгъу яIэу зэдэлэжьэнхэмкIэ мы форумыр амалышIоу зэрэщытыр къыхигъэщыгъ.Мэфищырэ форумым Iоф ышIэщт. Ащ хэтыщтых пленарнэ зэхэсыгъохэр, режиссурэмкIэ мастер-классхэр, Iэнэ хъу­раехэр. Журналистикэм Iоф щызышIэхэрэм творческэ зэIукIэ ныбжьыкIэхэм адыряIэщт. Iофтхьабзэм хэлэжьэрэ ныбжьыкIэхэр командэхэмкIэ гощыгъэхэу зэнэкъокъущтых, роликхэр, видеохэр тырахыщтых, репортажхэр агъэхьазырыщтых.Нэужым анахь чанэу зыкъэзыгъэлъэ­гъуагъэхэр агъэшIощтых.КIАРЭ Фатим.