М. Гордышов
Республикэ ныбжьыкIэ Гупчэу «Адыгеим иныбжьыкIэхэр» зыфиIорэм ищагу джырэ шапхъэхэм адиштэу зэтегъэпсыхьэгъэным фэгъэхьыгъэ проектым игъэцэкIэн фежьагъэх. Спонсорхэм яIэпыIэгъу ишIуагъэкIэ экранышхо зыхэтыщт лекторие мыщ щагъэпсыщт.
Адыгеим и ЛIышъхьэу КъумпIыл Мурат, Мыекъуапэ имэрэу Геннадий Митрофановым, Гупчэу «Адыгеим иныбжьыкIэхэр» зыфиIорэм ипащэу Абрэдж Заур Iофэу ашIагъэм зыщагъэгъозагъ. Непэрэ мафэм ехъулIэу лекториер зычIэтыщт бгъагъэр агъэуцугъ, джэхашъо радзэ. Щагум газоныр щызэтырагъэпсыхьагъ, чъыгхэмрэ куандэхэмрэ щагъэтIысхьагъэх, быракъхэр зыпылъэгъэщт кIэсэнхэр щагъэуцугъэх.Республикэ мэхьанэ зиIэ тарихъ-архитектурэ псэуалъэу Мыекъуапэ дэтым гупчэу «Адыгеим иныбжьыкIэхэр» зыфиIорэр 2025-рэ илъэсым къыщызэIуахыгъ. НыбжьыкIэ политикэм ипхырыщын тегъэпсыхьэгъэ программэхэм я Урысые зэнэкъокъоу «Шъолъырыр ныбжьыкIэхэм апай» зыфиIорэм Адыгеир зэрэщытекIуагъэм къыхэкIэу ащ фэдэ амал щыIэ хъугъагъэ. Непэ ныбжьыкIэ гупчэм кIэлэцIыкIухэмрэ ныбжьыкIэхэмрэ атегъэпсыхьэгъэ социальнэ Iофтхьабзэхэр щызэрахьэх: лекциехэр, тренингхэр, мастер-классхэр щызэхащэх, хэбзэ къулыкъухэм ялIыкIохэм, хэушъхьафыкIыгъэ дзэ операцием иветеранхэм щаIокIэх, гуфэкIо Iофтхьабзэхэр щызэрахьэх.
Адыгеим и ЛIышъхьэ зэрэхигъэунэфыкIыгъэмкIэ, ныбжьыкIэхэм ягукъэкIхэм адегъэштэгъэныр, къыткIэхъухьэрэ лIэужхэм яамалхэм зыкъызэIуягъэхыгъэнымкIэ ищыкIэгъэ Iофтхьабзэхэр зехьэгъэнхэр къэралыгъом анахьэу анаIэ зытыригъэтырэ лъэныкъохэм ащыщ. Урысые Федерацием и Президентэу Владимир Путиным зэригъэнэфагъэм тетэу ныбжьыкIэ инфраструктурэм изэхэщэнкIэ, республикэм ищыIэныгъэ ахэр хэлэжьэнхэмкIэ Iофтхьэбзэ гъэнэфагъэхэр республикэм щызэрахьэх.«Непэ тикIалэхэмрэ типшъашъэхэмрэ республикэм ихэхъоныгъэкIэ бэ зэшIуахырэр: социальнэ проектхэр пхыращых, гуфэкIо IофшIэным хэлажьэх, спортымкIэ, еджэнымкIэ, творчествэмкIэ гъэхъагъэхэр ашIых. НыбжьыкIэхэм ягукъэкIхэм адегъэштэгъэнымкIэ, ахэм яамалхэм зыкъызэIуягъэхыгъэнымкIэ, Адыгеимрэ хэгъэгумрэ федэ къафэзыхьыщт ягукъэкIхэр пхырыщыгъэнхэмкIэ тэри тфызэшIокIырэр зэкIэ тэшIэ. Лъэпкъ проектхэу «НыбжьыкIэхэмрэ кIэлэцIыкIухэмрэ», «IофышIэхэр» зыфиIохэрэм мы лъэныкъомкIэ яшIуагъэ къэкIуагъ. 2030-рэ илъэсым ехъулIэу Адыгеим имуниципалитет пстэуми ныбжьыкIэ гупчэхэр ащызэхэтщэн тимурад», — къыIуагъ КъумпIыл Мурат.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.