КъэкIорэ 2027-рэ илъэсым ибюджет, 2028 — 2029-мкIэ агъэнэфагъэхэм афэгъэхьыгъэ хэбзэгъэуцугъэм ипроектэу АР-м финансхэмкIэ и Министерствэ ыгъэхьазырыгъэм Адыгеим и ЛIышъхьэ и Координационнэ гупчэ тыгъуасэ щытегущыIагъэх.
Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Павел Стаценкэр, ащ игуадзэу, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ комитетым ипащэу Iэщэ Мухьамэд, Парламентым идепутатхэм ащыщхэр, муниципальнэ образованиехэм, къулыкъу ыкIи ведомствэ зэфэшъхьафхэм, общественнэ организациехэм ялIыкIохэр, студентхэр, нэмыкIхэр.Павел Стаценкэм Iофтхьабзэр къызэIуихызэ, республикэм щыпсэухэрэм къэкIорэ илъэсымкIэ финанс тхылъ шъхьаIэр зэрэгъэпсыгъэщтыр, ащ къыщыдэлъытэгъэщтхэр ашIэнхэм фэшI мы едэIунхэр илъэс къэс джырэ фэдэ уахътэм зэрэзэхащэрэр къыIуагъ. Мыщ тетэу бюджетым ипроект нэIуасэ зэрэфашIыхэрэм имызакъоу, республикэм иинтернет нэкIубгъо шъхьаIи, финансхэмкIэ Министерствэм инэкIубгъуи ар къарэхьэ. ШIоигъоныгъэ зиIэ пстэур хэплъэн, ишIошIхэр къыриIотыкIын ылъэкIыщт.АР-м финансхэмкIэ иминистрэу Виктор Орловым проектым нэIуасэ фишIыгъэх. ПэшIорыгъэшъэу зэрагъэнэфагъэмкIэ, 2027-рэ илъэс бюджетыр хахъохэмкIэ сомэ миллиард 53,6-рэ хъущт, хэбзэIахьэу сомэ миллиард 26,5-рэ, мыхэбзэIахьэу сомэ миллиардрэ миллион 600-м ехъурэ къыхэхъощт, зэкIамыгъэкIожьыщт мылъкоу къыхэлъхьагъэ хъущтыр сомэ миллиард 25,4-рэ.Республикэ бюджетым ихъарджхэр мызыгъэгум нахьыбэщтых. Сомэ миллиард 56,1-у ахэр къалъытагъ. Сомэ миллиарди 2,5-рэ щыкIагъэ иIэщт.Нэужым бюджет ахъщэр зыпэIухьанэу пэшIорыгъэшъэу агъэнэфагъэхэм министрэр игъэкIотыгъэу къатегущыIагъ. Къэралыгъо программэхэм къащыдэлъытагъэхэм сомэ миллиард 51,3-р апэIуагъэхьащт. Ащ лъэныкъо пстэур къызэлъеубыты. ХэушъхьафыкIыгъэу ахэм ягугъу пшIымэ, лъэпкъ экономикэм анахьыбэу, ар бюджетым ипроцент 26,8-р ары, пэIухьащт. АхъщэкIэ къапIомэ, сомэ миллиард 15-м ехъу.Анахьыбэу зыпэIухьащтхэм ащыщ гъэсэныгъэм исистеми. Сомэ миллиард 13,5-рэ ащ пае агъэнэфагъ, ар бюджетым ипроцент 24,2-р ары. Джащ фэдэу псауныгъэм икъэухъумэн миллиарди 9,1-рэ, социальнэ политикэм миллиарди 7,4-рэ, псэупIэ-коммунальнэ хъызмэтым миллиарди 2,6-рэ, культурэм миллиардрэ миллион 500-м ехъурэ апэIуагъэхьан гухэлъ яI. ГъогушIыным, спортым, культурэм, нэмыкI лъэныкъохэм апэIухьанэу финанс тхылъ шъхьаIэм щагъэнэфагъэхэми министрэр игъэкIотыгъэу къатегущыIагъ.Лъэпкъ проектхэм япхырыщыни лъагъэкIотэщт. ГущыIэм пае, 2027-рэ илъэсым ахэм къащыдэлъытагъэхэм ягъэцэкIэн пстэумкIи сомэ миллиард 14,9-рэ пэIуагъэхьащт. Ащ щыщэу миллиард 12,2-р федеральнэ бюджетым къыхэхыгъэщт. Нахьыбэу, ар процент 61-рэ мэхъу, зыфагъэнэфагъэр «ЩыIэныгъэм пае инфраструктурэр» зыфиIорэ лъэпкъ проектыр ары.Министрэм идоклад ыуж зэхэсыгъом хэлажьэхэрэм ащыщхэм упчIэхэр къатыгъ. Лъэпкъ проектхэм, къэралыгъо программэхэм къадыхэлъытагъэу агъэцэкIэжьыщт псэуалъэхэм, муниципальнэ образованиехэм субсидиеу афатIупщыщтым, нэмыкIхэм ахэр афэгъэхьыгъагъэх. Виктор Орловым зэкIэми джэуап къаритыжьыгъ.ХЪУТ Нэфсэт.