Сакъыныгъэшхо зищыкIэгъэ IофшIэн

ЦIыфхэр мафэ къэс зепщэнхэр, ахэм ящыIэныгъэ пIэ илъыныр къызэрыкIоу щытэп. А пшъэдэкIыжьышхор яI общественнэ транспортым рылажьэхэрэм, ахэм ащыщ нэбгырэ пэпчъ шъхьэкIафэ фэпшIыныр тефэ.

Хабзэ зэрэхъугъэу, чъэпыогъум иаужы­рэ тхьаумафэ автомобилистым и Мафэ хагъэунэфыкIы. Мыр зимэфэкIхэм ащыщ Чэсэбый Пщымафэ. Илъэс 30 фэдиз хъугъэу цIыфхэр ащ зэрещэх. ИщыIэныгъэ гъогукIэ тыдэ зигъэзагъэми, IофшIэпIэ заулэ зэблихъугъэми, ыгукIэ зыфэщэгъэ сэнэхьатым къыфигъэзэ­жьыгъ.Пщымафэ Аскъэлае къыщыхъугъ, гурыт еджапIэр къызеухым, Мыекъуапэ дэт техническэ училищым чIэхьагъ, бурильщик сэнэхьатыр зэригъэгъотыгъ. Уахътэр къызэсым, илэгъухэм афэдэу дзэм къулыкъу щихьынэу ащагъ. Къызегъэзэжьым, илъэсрэ бурильщикым иIэпыIэгъоу Iоф ышIагъэу, Мыекъопэ троллейбус гъэIорышIапIэм слесарэу Iухьагъ, ау мазэ нахьыбэрэ Iоф ымышIагъэу троллейбусым водителэу итIысхьагъ. 1982-рэ илъэсым кIалэр апэрэу транспорт иным ируль кIэрытIысхьагъ. А мафэр дэгъоу ыгу къэкIыжьы. Джащ къыщегъэжьагъэу та­къикъ пэпчъ сакъыныгъэ зищыкIэгъэ IофшIэныр егъэцакIэ.— ЦIыфхэр зезыщэрэ транспортым водителэу сисыным фэщагъэ сыхъугъ. СищыIэныгъэкIэ Iоф­шIэпIэ заулэ зэблэсхъунэу хъугъэ, ау тыдэ зызгъэзагъэми, мы сэнэхьатым сыкъыфэкIо­жьы. 2001-рэ илъэсым къыще­гъэжьагъэу 2019-рэ илъэсым нэс Москва троллейбусым иводителэу Iоф щысшIагъ. Ар Iоф­шIэн IэшIэхэп, Урысыем икъэлэ шъхьаIэ игъогухэм сатетыныр къиныгъэми, сесэжьыгъагъ. СиIофшIэн къыхагъэщэуи хъугъэ, илъэситф зэфэхьысыжьэу ашIыгъэмкIэ анахь водитель дэгъухэм ащыщ сыхъуи, сисурэт Щытхъу пхъэмбгъум палъэ­гъагъ. Ау сыдэу пшIыгъэми, укъызщыхъугъэм фэдэ хъун щыIэп, 2019-рэ илъэсым Адыгеим къэзгъэзэжьыгъ ыкIи Мыекъо­пэ троллейбус гъэIоры­шIапIэм IофшIэным щыпысы­дзэжьыгъ, — еIо тигущыIэгъу.

Пщымафэ иIофшIэн шIу зэрилъэгъурэр, гухахъо зэрэхигъуатэрэр игущыIэхэмкIэ къэошIэ. Мафэ къэс пIоми хъунэу зэрищэрэ цIыфхэр анэгухэмкIэ къышIэжьы хъугъэ. КъызщитIысхьащтхэри, зыщи­кIыжьыщтхэри ешIэ. Анахьыжъэу зэрищэхэрэр бэрэ зимылъэгъухэкIэ, ыгукIэ афэгумэкIы.— ЦIыфхэр зесщэнхэр къин къысщыхъурэп. Мы IофшIэныр зэрифэшъуашэу бгъэцэкIэным пае ыпэрапшIэу сакъыныгъэрэ щэIэгъэшхорэ пхэлъынхэ фае. ГъогурыкIоным ишапхъэхэр шIокI имыIэу сэгъэцакIэх. Гъогухэм атет автомобильхэм япчъагъэ нахьыбэ мэхъу зэпыт, ау Москва игъогу- хэу сыкъызтекIыжьыгъэхэм ялъытыгъэмэ, тэ тигъогухэр гупсэфых, ау бэлэрэгъыныгъэ тыди къызыщыхэбгъафэ хъущтэп, — еIо тигущыIэгъу.Илъэс пчъагъэрэ троллейбусым исыгъэу мы илъэсым къыщегъэжьагъэу автобусым Пщымафэ итIысхьажьыгъ. Ар нахь псынкIэ къыфэхъу, аужырэ шапхъэ­хэм адиштэрэ автобусыр зэрифэныр шIогупсэф, ар щынэгъончъэу щыт, видеокамерэ ит, карточкэкIэ цIыфхэм гъогупкIэр атын алъэкIы. Джащ фэдэу сэкъатныгъэ зиIэхэмкIэ Iэрыфэгъу.— СищыIэныгъэ гъогу сырып­лъэжьымэ, сэнэхьатэу къыхэсхыгъэмкIэ сыкIэгъожьыгъэу къыхэкIыгъэп. СыдигъокIи троллейбусым иводительхэм шъхьэ­кIэфэшхо афашIыщтыгъ, фэ­гъэкIотэнхэр тиIагъэх. Унэ къысатынэуи синасып къыхьыгъ. Ау арэп анахь шъхьаIэр, цIыфэу къи­тIыстхьэхэрэр гупсэфэу зыда­кIорэм нэбгъэсхэу, къызэрэпфэразэхэр къыуаIозэ икIыжьыхэ зыхъукIэ ары. Лъэ­хъаным къыздихьырэ зэхъокIыныгъэхэр тэри къыднэсыгъэх, джы автобусхэм тарысыщт, ащи шIэхэу сесагъ. Автобусэу N 47-р къысапхыгъ, — еIо Пщымафэ.