АР-м хэгъэгу кIоцI IофхэмкIэ и Министерствэ наркотикхэр къезыгъэкIокIыхэрэм алъыплъэгъэнымкIэ игъэIорышIапIэ иIофышIэхэр А. Макаренкэм ыцIэ зыхьырэ гурыт еджапIэу N 3-м икIэлэеджакIохэм аIукIагъэх.
ЗэкIэмкIи нэбгыри 100-м ехъу Iофтхьабзэм хэлэжьагъ. Наркотикхэм яягъэу къакIорэр, зыгъэфедэхэрэм япсауныгъэ зэрэзэщагъакъорэр хэбзэухъумакIохэм Iэтахъохэм къафаIотагъ.ГъэIорышIапIэм икъулыкъушIэхэм къызэраIуагъэмкIэ, наркотикхэр зыгъэфедэхэрэм япсауныгъэ ыкIи ящыIэныгъэ зэщыкъуагъэ зэрэхъурэр зэкIэми ашIэми, ащ къыгъэуцухэрэп. Ащ ыпкъ къикIыкIэ унагъохэр зэбгырэзых, цIыфым ипсауныгъэ изытет нахь дэй мэхъу. Ащ къыхэкIыкIэ Iэтахъохэм, кIэлэцIыкIухэм ягупсэхэм алъэныкъокIэ жъалымыгъэ зекIуакIэхэр зэрахьэх. ГухэкI нахь мышIэми, зыныбжь имыкъугъэ ныбжьыкIэхэми мы гумэкIыгъор ашъхьащыт.Наркотик зыхэлъ веществор зэ нахь умыгъэфедагъэми, ащ псауныгъэм зэрар зэрэрихырэр гъэIорышIапIэм иIофышIэхэм Iэтахъохэм агурагъэIуагъ. Полицием икъулыкъушIэхэр кIэлэцIыкIухэм къяджагъэх шэн дэйхэр къызхамыгъэфэнхэу, ялэгъухэм наркотикхэр къырагъэкIокIэу егуцафэхэмэ, нахьыжъхэм, кIэлэегъаджэхэм ыкIи хэбзэухъумэкIо къулыкъухэм макъэ арагъэIунэу.Джыри зы гумэкIыгъо шъхьаIэу зэхэсыгъом къыщаIэтыгъэхэм ащыщ наркотикхэм яIугъэкIын ныбжьыкIэхэр зэрэхащэхэрэр. Ахъщэ аратызэ наркотик зыхэлъ веществохэр гъэбылъыпIэхэм арагъэгъэтIылъых. АщкIэ бзэджашIэхэм интернетым иамалхэр къызфагъэфедэх. Ащ фэдэхэм ныбжьыкIэхэр ащыухъумэгъэнхэм фэшI сакъыныгъэ къызхагъэфэнэу, зикъэбар амышIэрэ цIыфхэм цыхьэ афамышIынэу араIуагъ. Джащ фэдэу хэбзэнчъэу наркотикхэр къезыгъэкIокIыхэрэм пшъэдэкIыжьэу арагъэхьын алъэкIыщтым щагъэгъозагъэх.КIэухым наркотикхэм апкъ къикIэу зищыIэныгъэ къутагъэ хъугъэ Iэтахъохэу хьапсым чIэсхэм афэгъэхьыгъэ видеотехыгъэ къафагъэлъэгъуагъ. Зэфэхьысыжьхэр ашIызэ наркокъулыкъум иIофышIэхэм кIэлэцIыкIухэм къараIуагъ ящыIэныгъэ ежьхэм аIэ зэрилъыр, тапэкIэ гъогоу къыхахыщтымкIэ пшъэдэкIыжь зэрахьырэр.АР-м хэгъэгу кIоцI IофхэмкIэ и Министерствэ ипресс-къулыкъу.