Дзэм къулыкъу зэрэщахьыщтымкIэ зэзэгъыныгъэ адэзышIыгъэхэу хэушъхьафыкIыгъэ дзэ операцием хэлэжьэнэу кIохэрэм зэтыгъо ахъщэр сомэ миллиони 2,6-м нэсэу къафэIэтыгъэным ехьылIэгъэ Указым Адыгеим и ЛIышъхьэ кIэтхэжьыгъ. Сомэ мин 400 хъурэ федеральнэ мылъкумрэ муниципальнэ мылъкумрэ къыдыхэплъытэхэмэ, зэтыгъо ахъщэр сомэ миллиони3,5-м нэсэу алъагъэIэсыщт.
«ТидзэкIолIхэм IэпыIэгъу тызэрафэхъурэ амалхэм ащыщэу ар сэлъытэ. Шъолъыр зэтыгъо ахъщэм ренэу хэтэгъахъо. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм нэмыкI федеральнэ, республикэ фэгъэкIотэныгъэхэри афашIых. Ащ хэхьэх ыпкIэ хэмылъэу чIыгу Iахьхэр ахэм къазэрафыхагъэкIырэр, хэбзэIахьхэмкIэ фэгъэкIотэныгъэхэр зэрафашIыхэрэр, кIэлэцIыкIу зиIэхэм зэтыгъо ахъщэ IэпыIэгъу зэраратырэр, апшъэрэ еджапIэхэм, гурыт сэнэхьат гъэсэныгъэ языгъэгъотырэ еджапIэхэм ачIэхьанхэмкIэ фэгъэкIотэныгъэхэр зэряIэхэр, ыпкIэ хэмылъэу кIэлэцIыкIу IыгъыпIэхэм, кружокхэм, секциехэм ыкIи нэмыкIхэм зэрэкIохэрэр. ХэушъхьафыкIыгъэ дзэ операцием хэлажьэхэрэмрэ ащ иветеранхэмрэ IэпыIэгъу икъу республикэм щарагъэгъоты. Урысые Федерацием и Президент игукъэкIкIэ зэхащэгъэ фондэу «Хэгъэгум иухъумакIохэр» зыфиIорэм, республикэмрэ муниципалитетхэмрэ ямылъку къэкIуапIэхэр, ащкIэ къызфэтэгъэфедэх партиеу «Единэ Россиер», гуфэкIо организациехэр, цIыф гумыпсэфхэр IэпыIэгъу къытфэхъух. Хэгъэгум непэ ушэтынышхохэр зэрэпэкIэкIырэр, тидзэкIолIхэм псэемыблэжьныгъэу, лIыхъужъныгъэу ахэлъым Урысыем исуверенитетрэ мамыр цIыфхэм ящынэгъончъагъэрэ бэкIэ зэрялъытыгъэр къыдгурэIо. Ащ пае дзэ къулыкъур ахьы зыхъукIи, ащ ыужкIи зыфэныкъо пстэури кIалэхэм ягъэгъотыгъэным тынаIэ тетэгъэты. Ахэми, яунагъохэми зэрафэгумэкIыхэрэм, сыд фэдэрэ Iофыгъо изэшIохынкIи IэпыIэгъу зэрафэхъущтхэм ахэм яцыхьэ телъын фае», — къыIуагъ КъумпIыл Мурат.