Ясатырэ хэхъуагъ

Урысые кIэлэцIыкIу-ныбжьыкIэ общественнэ движениеу «Юнармием» зиушъом­бгъугъ. Илъэс къэс рагъэкIокIырэ Iофтхьабзэу «Урысыем къулыкъу фэсхьынэу сэкIо!» зыфиIорэм къыдыхэлъытагъэу ащ исатырэ нэбгырэ 30 хэхъуагъ.Ащ фэгъэхьыгъэ Iофтхьабзэу Урысыем и ЛIыхъужъэу Вадим Лемеш ыцIэ зыхьырэ Мыекъуа­пэ игурыт еджапIэу N 2-м щыкIуагъэм хэлэжьагъэх къэ­лэ администрацием ныбжьыкIэ политикэмкIэ иотдел ипащэу Егор Сергеевыр, Юнармием ишъолъыр штаб ипащэу Ирина Князевар, гурыт еджапIэу N 2-м ипащэу Бэсные Саидэ, ветеранхэм я Урысые общественнэ организацие и Адыгэ рес­публикэ къутамэу «ДзэкIолI зэкъошныгъэр» зыфиIорэм итхьаматэу Алексей Харитоновыр ыкIи ветеран пограничникхэм яшъолъыр Совет итхьаматэу Игорь Кубановыр.— Тиорганизацие зызэхащагъэр мыгъэ илъэси 10 хъу­гъэ. А уахътэм къыкIоцI ныбжьыкIэ мин пчъагъэмэ мыр еджапIэ афэхъугъ. Адыгеим щыщ нэбгырэ мин 14-м ехъу ащ хэхьэ, непэ ахэм джыри 30 къахэхъуагъ, — хигъэ­у­нэфыкIыгъ Ирина Князевам.Юнармейцэ хъугъэхэм бгъэхалъхьэхэр ыкIи удостоверениехэр аратыжьыгъэх. Ахэм ­гъогу тэрэз къызэрэхахыгъэр ипсалъэ къыщыхигъэщыгъ ныбжьыкIэ политикэмкIэ къэлэ отделым ипащэ.Мэкъэ жъынчкIэ присягэм къеджагъэ­хэм анахь ныбжьыкIэу ахэтыгъэр илъэс 12 зыныбжь Анастасия Дудаевар ары.— Лъэшэу сызэрэгумэкIыщтыгъэм къыхэкIэу сипсалъэ хэукъоныгъэхэр хэсшIыхьагъэх. Ау «командир» чIыпIэм сызэритыгъэр лъэшэу сыгу рихьыгъ, — гушIозэ къыIуагъ ащ.Тхьаркъохъо Тамерлани организацием исатырэ хэхьагъэ­хэм ащыщ.— Юнармием сыфаеу сыхэхьагъ, сыда пIомэ, сыпатриотэу зысэлъытэжьы. Къы­зэрэзгурыIорэмкIэ, мы гущыIэм къи­кIырэр зи Хэгъэгу шIу зылъэ­гъоу, щэIэфэ ар къэ­згъэгъунэщт цIыфыр ары, — еIо кIэлэ ныбжьыкIэм.ИлъэсипшI гъогу къэзыкIугъэ ныбжьыкIэ-патриотическэ организацием щытхъур къылэжьыгъ. ЩыIэныгъэм илъэныкъо зэфэшъхьафхэр къызэлъиубытыхэзэ лIэужхэр епIух. Ахэр ахэлажьэх шIум, гукIэгъум, шъыпкъагъэм, Хэгъэгур шIу алъэгъуным ныбжьыкIэхэр фепIух.IЭШЪЫНЭ Сусан.