БаскетболымкIэ Урысыем ичемпионат иапшъэрэ лигэ хэт «Динамо-МГТУ-р» Екатеринбург къэзыгъэлъэгъорэ «ТСК-УРАЛ-УрГУПС-м» мы мафэхэм тIогъогогъо IукIагъ. Мыекъуапэ щыкIогъэ ешIэгъуитIури хьакIэхэм ахьыгъ.
Апэрэ зэIукIэгъум бысымхэм алъэкI къагъэнагъэп, текIоныгъэм фэбэнагъэх. Апэрэ такъикъипшIыр 16:16-у командэхэм аухыгъ, ятIонэрэр хьакIэхэм 18:20-у ахьыгъ. Ащ къыкIэлъыкIогъэ едзыгъохэми Екатеринбург ибаскетболистхэр нахьыбэрэ ыпэ илъыгъэх ыкIи 63:78-у текIоныгъэр къыдахыгъ.ЯтIонэрэ ешIэгъум ипэублэ къыщегъэжьагъэу уральцэхэр хэпшIыкIэу нахь лъэшыгъэх ыкIи ащ ыгузэгу ехъулIэу пчъагъэр 46:24 ашIыгъ. ЯтIонэрэ кIэлъэныкъоми хьакIэхэм яешIакIэ къыщагъэкIагъэп, 86:48-у текIоныгъэр къыдахыгъ ыкIи апшъэрэ лигэм пэрытныгъэ щаубытын гухэлъ зэряIэр джыри зэ къагъэшъыпкъэжьыгъ.Турнир таблицэм «Динамо-МГТУ-м» ятфэнэрэ чIыпIэр щеубыты. Зичэзыу ешIэгъухэр шэкIогъум и 2 — 3-м иIэщтых. Магнитогорскэ икомандэу «Металлург-2-р» тихьакIэщт.Командэхэр зыдэщыт чIыпIэхэр ыкIи очко пчъагъэу рагъэкъугъэр
- «ТСК-УРАЛ-УрГУПС» (Екатеринбург) – 8
- «Тверь-Политех» (Тверь) – 7
- «Динамо-2» (Уфа) – 7
- «Нефтехимик» (Тобольск) – 6
- «Динамо-МГТУ» (Мыекъуапэ) – 6
- «Химки-2» (Московскэ хэкур) – 5
- «Металлург-2» (Магнитогорск) – 5
- «Ставбаскет» (Ставрополь) – 4.