Зэдегъэштэн есынымкIэ Урысые зэнэкъокъу къалэу Кисловодскэ щыкIуагъ. Зыныбжь илъэс 13-м ыкIи 10-м емыхъугъэ кIалэхэмрэ пшъашъэхэмрэ заушэтыгъ.
Турнирым хэлэжьагъэх Адыгеим, Къырым, Краснодар ыкIи Ставрополь крайхэм, Ленинград, Москва ыкIи Ростов хэкухэм, Севастополь ялIыкIохэр.Олимпийскэ резервым испорт еджапIэу В.С. Максимовым ыцIэ зыхьырэм зыщызыгъасэхэрэм Адыгеир къагъэлъэгъуагъ. Тиспортсменхэм текIоныгъэр ыкIи хагъэунэфыкIырэ чIыпIэхэр къахьыгъэх. ШIокI зимыIэ программэм хэлэжьэгъэ пшъашъэхэм зэкIэми анахь лъэшыгъ Виолетта Журавлевар. КIалэхэм язэнэкъокъу текIоныгъэр къыщыдихыгъ Ярослав Стародубцевым. Зыныбжь илъэс 13-м емыхъугъэхэр зыхэхьэгъэ тикомандэ пэрытныгъэр ыубытыгъ, лъэныкъо зэфэшъхьафхэр зыхэхьэрэ программэмкIэ тиспортсменхэм тыжьын медальхэр къафагъэшъошагъэх.Тикомандэхэм ахэтыгъэх: Ярослав Стародубцевыр, Виолетта Журавлевар, Софья Тришинар, Лъэустэн Беллэ, Каролина Крицкаяр, София Колисниченкэр, Аниса Каташевар ыкIи Нэтэо Дианэ (зыныбжь илъэс 13-м емыхъугъэхэр); Амалия Клыбик, Бэгъ Аминэ, Бэгъ Даринэ, Аврора Лазаречивар ыкIи Мария Нефедовар (зыныбжь илъэси 10-м шIомыкIыгъэхэр).Тиспортсменхэм ыкIи ахэм ятренер-кIэлэегъаджэу, Урысыем изаслуженнэ тренерэу Нина Говорковам тафэгушIо, тапэкIи гъэхъэгъэшIухэр ашIынхэу афэтэIо.