АР-м и Парламент
АР-м и Къэралыгъо Совет – Хасэм я II-рэ зэхэсыгъоу тыгъуасэ иIагъэм ащ илIыкIоу сенатор Iофыр зыгъэцэкIэщтыр щагъэнэфагъ.
Зэхэсыгъом АР-м иминистрэхэм я Кабинет хэтхэр, федеральнэ ыкIи республикэ къулыкъухэм япащэхэр, нэмыкIхэр хэлэжьагъэх. Iофтхьабзэр зэрищагъ Парламентым и Тхьаматэу Павел Стаценкэм. Зэхэсыгъор рагъэжьэным ыпэкIэ республикэ Парламентым идепутат хъугъэхэм ар къэзыушыхьатырэ тхылъхэр ащ аритыжьыгъ.АР-м и Къэралыгъо Совет – Хасэм илIыкIо — УФ-м исенатор пшъэрылъхэр Хъопсэрыкъо Мурат етыгъэнхэр ары анахь шъхьаIэу депутатхэр зытегущыIагъэхэр. Хэбзэгъэуцугъэм къызэрэщыдэлъытагъэу, ыпэрапшIэу Парламентым икомитетхэр Iофым хэплъагъэх. ХэбзэихъухьанымкIэ, законностымкIэ ыкIи чIыпIэ зыгъэIорышIэжьыным иIофхэмкIэ комитетым ипащэу Осмэн Альберт зэфэхьысыжьэу ашIыгъэхэм афэгъэхьыгъэ доклад кIэкI къышIыгъ.Ащ къызэриIуагъэмкIэ, АР-м и Къэралыгъо Совет – Хасэм и Регламент ия 129-рэ статья диштэу Хъопсэрыкъо Мурат икандидатурэ депутатхэм къагъэлъэгъуагъ. Ар сенатор пшъэрылъхэр ыштэнхэу къезэгъыгъ, тхылъэу къыгъэхьазырыгъэхэр «Урысые Федерацием и Федеральнэ ЗэIукIэ ФедерациемкIэ и Совет игъэпсын» ехьылIэгъэ Федеральнэ хэбзэгъэуцугъэу 2020-рэ илъэсым тыгъэгъазэм и 22-м къыдэкIыгъэм ыкIи АР-м и Къэралыгъо Совет – Хасэм и Регламент адештэх.Нэужым зэхэсыгъом зэпыугъо фашIи шъэф шIыкIэм тетэу амакъэхэр атыгъэх. Депутат 45-у хэлажьэрэм зэкIэми Хъопсэрыкъо Мурат АР-м и Къэралыгъо Совет – Хасэм илIыкIо — УФ-м исенатор пшъэрылъхэр етыгъэнхэм дырагъэштагъ.Хъопсэрыкъо Мурат Къырым-Чэрый ыкъор 1978-рэ илъэсым къалэу Карачаевскэ къыщыхъугъ, Московскэ къэралыгъо юридическэ академием юрист сэнэхьат щызэригъэгъотыгъ, народнэ хъызмэтымкIэ ыкIи къэралыгъо къулыкъумкIэ Урысые академиеу УФ-м и Президент дэжь къыщызэIуахыгъэм ишIэныгъэхэм ащыхигъэхъуагъ.2008—2011-рэ илъэсхэм АР-м и ЛIыкIоу УФ-м и Президент дэжь щыIагъ, ащ ыуж АР-м и Къэралыгъо Совет – Хасэм иятфэнэрэ зэIугъэкIэгъу идепутатэу хадзыгъагъ. Адыгеим и Парламент илIыкIоу сенатор IофшIэныр зигъэцакIэрэр 2012-рэ илъэсым къыщегъэжьагъ.Джыри зэ цыхьэ къыфашIи АР-м и Къэралыгъо Совет – Хасэм илIыкIоу УФ-м исенатор пшъэрылъхэр къызэрэратыжьыгъэхэм фэшI къызэрафэразэр Хъопсэрыкъо Мурат ипсалъэ къыщыхигъэщыгъ.«АР-м и ЛIышъхьэу КъумпIыл Мурат, Адыгеим и Парламент якомандэ сыхэтэу Iоф сшIэнэу зэрэхъугъэр сэркIэ шъуашэ. Цыхьэу къысфэшъушIыгъэр къэзгъэшъыпкъэжьыным сыпылъынэу, республикэм ифедэхэр федеральнэ Гупчэм щыпхырыщыгъэнхэм, УФ-м и Президент ыкIи АР-м и ЛIышъхьэ пшъэрылъэу къагъэуцухэрэр гъэцэкIэгъэнхэм сишIэныгъи, сиIэпэIэсэныгъи, сиамалхэри фэзгъэIорышIэнхэу шъусэгъэгугъэ», — къыIуагъ сенаторым.ХЪУТ Нэфсэт.