БаскетболымкIэ Урысыем ичемпионат иапшъэрэ лигэ хэт «Динамо-МГТУ-м» мы илъэс ешIэгъум къыдыхэлъытэгъэ апэрэ зэIукIэгъуитIу Мыекъуапэ щыриIагъ. Къалэу Тобольскэ къэзыгъэлъэгъорэ «Нефтехимикыр» тихьакIагъ.
«Динамо-МГТУ» — «Нефтехимик» — 74:70Апэрэ ешIэгъум ипэублэ «Динамо-МГТУ-р» хэпшIыкIэу нахь лъэшыгъ. Тибаскетболистхэр ыпэкIэ дэгъоу щешIагъэх, ухъумэнри зэрифэшъуашэу зэхащагъ. ЯтIонэрэ такъикъипшIыми тикомандэ иешIакIэ къыщыкIагъэп, апэрэ кIэлъэныкъор 42:27-у къыхьыгъ. Ау зыгъэпсэфыгъо уахътэм ыуж хьакIэхэм нахьыбэ къадэхъугъ, ящэнэрэ едзыгъор 28:15-у ахэм ахьыгъ ыкIи пчъагъэр 57:55-рэ хъугъэ. Аужырэ такъикъипшIым командэхэм яешIакIэ зэфэдагъ, ау бысымхэр нахь цыхьэшIэгъоу джэгугъэх ыкIи 74:70-у текIоныгъэ къыдахыгъ.
Анахь къахэщыгъэ баскетболистхэр:«Динамо-МГТУ-м»: Клементьевыр (23), Широковыр (12), Медведевыр (11). «Нефтехимикым»: Ленькиныр (22), Морозовыр (16 + 10).«Динамо-МГТУ» — «Нефтехимик» — 76:68ЯтIонэрэ ешIэгъур джыри нахь къиныгъ. Апэрэ такъикъхэм къащегъэжьагъэу «Нефтехимикым» ибаскетболистхэм ухьазырыныгъэ дэгъу къагъэлъэгъуагъ, пчъагъэмкIэ ыпэ ишъыгъэх. Апэрэ такъикъипшIыр 14:18-у хьакIэхэм ахьыгъ. ЯтIонэрэм «Динамо-МГТУ-м» иешIакIэ нахь ыгъэлъэшыгъ, ау пчъагъэр зэфэдиз ышIын ылъэкIыгъэп. Ящэнэрэ едзыгъом изэфэхьысыжьхэмкIэ командэхэм очко пчъагъэу рагъэкъугъэр зэфэдиз. Аужырэ такъикъипшIыр зыщырагъэжьэщтым 51:54-у хьакIэхэр ыпэ итыгъэх. КIэух едзыгъом тибаскетболистхэр нахь псынкIэу джэгугъэх ыкIи пчъагъэм хагъахъозэ 76:68-у зэIукIэгъур къахьыгъ. «Динамо-МГТУ-м» зэкIэлъыкIоу текIоныгъитIу къыдихыгъ.Анахь къахэщыгъэ баскетболистхэр:«Динамо-МГТУ-м»: Клементьевыр (17), Медведевыр (17), Павловыр (15), Кочневыр (12+12), «Нефтехимикым»: Морозовыр (15+11), Ленькиныр(14).