А. Гусев
АР-м и Къэралыгъо Совет – Хасэм ия VIII-рэ зэIугъэкIэгъу тыгъуасэ апэрэ зэхэсыгъо иIагъ.Iофтхьабзэм хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, муниципальнэ образованиехэм янароднэ депутатхэм ясоветхэм, федеральнэ ыкIи шъолъыр къулыкъухэм япащэхэр, нэмыкIхэр. Хабзэм тетэу, депутатхэм анахьыжъ Евгений Саловым ар къызэIуихыгъ.
Пстэумэ апэу АР-м хэдзынхэмкIэ и Гупчэ комиссие и Тхьаматэу Сэмэгу Нурбый УФ-м и Къэралыгъо Думэ ыкIи АР-м и Къэралыгъо Совет – Хасэм ядепутатхэм яхэдзынхэу Iоныгъо мазэм щыIагъэхэм якIэух къызэфихьысыжьыгъ.Адыгеим и Парламент ияенэрэ зэIугъэкIэгъу идепутатынэу пстэумкIи нэбгырэ 50 хадзыгъ. Мызыгъэгум партиитфымэ — Урысые политическэ партиеу «Единэ Россием», Урысые Федерацием и Коммунистическэ партие, Урысыем и Либеральнэ демократическэ партие, Социалистическэ партиеу «Справедливая Россия» зыфиIорэм ыкIи партиякIэу «Новые люди» ялIыкIохэр Парламентым хэхьагъ.Депутат 25-р зыкI хэдзыпIэ шъолъырхэмкIэ хадзыгъэх. Ахэм ащыщэу «Единэ Россием» илIыкIор 18 мэхъу, «Справедливэ РоссиемкIэ» зы нэбгыр, КПРФ-м илIыкIор нэбгыри 3, «Новые люди» зыфиIорэ партием хэтэу зы нэбгыр. Адрэ 25-р зы мандат хъурэ хэдзыпIэ шъолъырхэмкIэ хадзыгъэх. Ахэм ащыщэу нэбгырэ 24-р «Единэ Россием», зыр ЛДПР-м ялIыкIох.
Мы зэIугъэкIэгъум идепутат хъугъэхэм ащыщых хэушъхьафыкIыгъэ дзэ операцием иветеранхэу Алексей Самоквитовымрэ Юрий Барковымрэ.Зэхэсыгъом иповесткэу агъэнэфагъэм тегущыIэхи зыдырагъаштэм ыуж АР-м и ЛIышъхьэ гущыIэр ыштагъ. Хэдзынхэм текIоныгъэр къащыдэзыхыгъэхэм ар пстэумэ апэу къафэгушIуагъ, хэбзэихъухьан IофшIэнэу зызфагъэзагъэр шIуагъэ къытэу лъагъэкIотэшъунэу къафэлъэIуагъ. ЦIыфхэм цыхьэ къазэрафашIыгъэр къэгъэшъыпкъэжьыгъэныр, хэдзакIохэм яунашъохэр, ежьхэм зэрагъэгугъагъэхэр гъэцэкIэгъэнхэр зэкIэмэ анахь шъхьаIэу зэрэщытым шъолъырым ипащэ къыкIигъэтхъыгъ.КъумпIыл Мурат республикэм игъэцэкIэкIо ыкIи ихэбзэихъухьэ къулыкъухэм зэгурыIоныгъэ азыфагу илъэу илъэситфым Iоф зэрэзэдашIагъэр къыхигъэщызэ, хэпшIыкIэу гъэкIэжьыгъэ хъугъэ Парламентым тапэкIи ащ тетэу дэлэжьэнхэу зэрэщыгугъырэр къыIуагъ. Мы зэIугъэкIэгъум нэбгырэ 17 кIэу къыхэхьагъ.«Пшъэрылъыбэ тиI. Ахэр гъэцэкIэгъэнхэм базэ пытэ ищыкIагъ. Республикэм иэкономикэ зыпкъ ит, социальнэ лъэныкъоми хэхъоныгъэ ешIы. Илъэситфым еджапIэу, кIэлэцIыкIу IыгъыпIэу дгъэцэкIэжьыгъэр, кIэу тшIыгъэр, культурэм иунэу, спорт псэуалъэу дгъэкIэжьыгъэр пшIы пчъагъэ мэхъу, гъогухэр, щагухэр, общественнэ чIыпIэхэр зэтедгъэпсыхьагъэх, псэупIэ-коммунальнэ хъызмэтым зеушъомбгъу, мэхьанэшхо зиIэ проектышхохэр пхырытэщых. А зэпстэур республикэ парламентымрэ шъолъырым игъэцэкIэкIо хабзэрэ Iофэу зэдашIагъэм къыкIэкIуагъ», — къыIуагъ КъумпIыл Мурат.АР-м и ЛIышъхьэ къызэрэхигъэщыгъэмкIэ, шъолъырыр ыпэкIэ лъыкIотэным фытегъэпсыхьэгъэ къэкIуапIэхэр, лъэпкъ проектхэр, къэралыгъо программэхэр щыIэх, республикэми амалэу иIэри егъэфедэ. Ахэм зэхэубытагъэу шIуагъэ къатын фае.КъумпIыл Мурат тапэкIэ анахьэу яIофшIэнкIэ анаIэ зытырагъэтын фаехэр къыгъэнэфагъэх. ХэушъхьафыкIыгъэ дзэ операцием хэлажьэхэрэмрэ ахэм ягупсэхэмрэ IэпыIэгъу ятыгъэныр, экономикэм хэхъоныгъэ егъэшIыгъэныр, социальнэ пшъэрылъхэр гъэцэкIэгъэнхэр, кIэлэцIыкIу зэрыс унагъохэм адеIэгъэныр анахьэу къыхигъэщыгъэх.Хэбзэгъэуцугъэм къызэрэщыдэлъытагъэм тетэу, ыпэрапшIэу АР-м и Къэралыгъо Совет – Хасэм и ЛъытэкIо комиссие агъэпсыгъ. Ащ нэбгыритф хагъэхьагъ, депутатэу Къуижъ Саидэ пащэ фашIыгъ. Джащ фэдэу Секретариатыр ыкIи Редакционнэ комиссиер зэхащагъэх, нэбгырэ щырыщ ахэм ахэхьагъ.Нэужым Адыгэ Республикэм и Къэралыгъо Совет – Хасэм и Тхьаматэ хадзыгъ. Хэбзэгъэуцугъэм къызэрэщыдэлъытагъэмкIэ, ащ икандидатурэ депутатхэм къагъэлъагъо, нэужым шъэф шIыкIэм тетэу амакъэхэр фатых. Депутатэу Iэщэ Мухьамэд партиеу Парламентым хэхьагъэхэм зэкIэми ацIэкIэ Павел Стаценкэм икандидатурэ къыгъэлъэгъуагъ. Зэхэсыгъом зэпыугъо фашIи шъэф шIыкIэм тетэу депутатхэм амакъэхэр затыхэм, депутат 47-у хэлажьэрэмэ ащ дырагъэштагъ.Стаценко Павел Павел ыкъор Урысые политическэ партиеу «Единэ Россием» хэт. Ар 1977-рэ илъэсым къалэу Мыекъуапэ къыщыхъугъ, апшъэрэ гъэсэныгъитIу иI, Адыгэ къэралыгъо университетым юрист ыкIи экономист сэнэхьатхэр щызэригъэгъотыгъэх. Мыекъопэ къэралыгъо гуманитар колледжым, «Гъомылэпхъэ бэдзэршIыпIэм игъэIорышIэнкIэ Адыгэ Республикэм и Агентствэ», АР-м и Къэралыгъо Совет – Хасэм и Аппарат Iоф ащишIагъ, 2014-рэ илъэсым АР-м и УплъэкIокIо-лъытэкIо палатэ ипащэ игуадзэу агъэнэфэгъагъ, нэужым, 2020-м къыщыублагъэу, ащ ипэщагъ. Унагъо иI, ишъхьэгъусэрэ ежьыррэ сабыитIу зэдапIу.Павел Стаценкэм цыхьэ къыфашIи шъолъыр Парламентым и Тхьамэтэ IэнатIэм зэрэIуагъэхьагъэм фэшI къызэрафэразэр, ар къыгъэшъыпкъэжьыным зэрэпылъыщтыр къыхигъэщыгъ.«БлэкIыгъэ зэIугъэкIэгъоу Владимир Нарожнэр зипэщагъэхэм лъэпсэ пытэ агъэпсыгъ. Джы пшъэрылъ шъхьаIэу тиIэр ар къызэтедгъэнэныр ыкIи хэдгъэхъоныр ары. Хэбзэгъэуцуным ибазэ зыкI механизмэу щытын, республикэм щыпсэурэ пэпчъ щыIэкIэшIу иIэным фэIорышIэн фае», — къыIуагъ Павел Стаценкэм.АР-м и ЛIышъхьэ ащ фэгушIуагъ, хэбзэ къулыкъу IофшIэным IэпэIэсэныгъэ ин зэрэщыриIэр, джы IэнатIэу зыIухьагъэмкIэ ащ ишIуагъэ къызэрэкIощтым ицыхьэ зэрэтелъыр къыхигъэщыгъ.Нэужым Парламентым изэхэсыгъо зэрищагъ Павел Стаценкэм. Депутатхэм АР-м и Къэралыгъо Совет – Хасэр зэрэзэхэтыщтыр агъэнэфагъ, ащ и Тхьаматэ игуадзэхэр, комитетхэм, комиссиехэм япэщэщтхэр хадзыгъэх.Шъэф шIыкIэм тетэу амакъэхэр атыхи, зэкIэми зэдаштэу Парламентым ипащэ игуадзэу хадзыжьыгъэх Iэщэ Мухьамэдрэ Цэй Эдуардрэ. ТIури партиеу «Единэ Россием» хэтых.Джащ фэдэу Iэщэ Мухьамэд бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб экономикэ зэпхыныгъэхэмкIэ комитетэу нэбгыри 8 зыхэхьагъэм пэщэныгъэр дызэрихьащт, Цэй Эдуард мэкъумэщ политикэмкIэ, мылъку ыкIи чIыгу зэфыщытыкIэхэмкIэ комитетым ипэщэщт. Мыщ нэбгыри 6 хагъэхьагъ.АР-м и Къэралыгъо Совет – Хасэм хэбзэихъухьанымкIэ, законностымкIэ ыкIи чIыпIэ зыгъэIорышIэжьыным иIофхэмкIэ икомитети нэбгыри 6 хэтыщт, ащ пащэ фашIыгъ партиеу «Справедливая Россия» зыфиIорэм хэтэу Осмэн Альберт.ПсэолъэшIынымкIэ, транспортымкIэ, зэпхыныгъэмкIэ ыкIи псэупIэ-коммунальнэ хъызмэтымкIэ комитетым ипащэу хадзыгъ «Единэ Россием» илIыкIоу Валерий Картамышевыр. Мыщ нэбгыри 5 хэхьагъ.ГъэсэныгъэмкIэ, наукэмкIэ, ныбжьыкIэ IофхэмкIэ, спортымкIэ, къэбар жъугъэм иамалхэмкIэ ыкIи общественнэ организациехэм адыряIэ зэпхыныгъэхэмкIэ комитетыр анахь ин, ащ нэбгырэ 11 хагъэхьагъ, пэщэныгъэр дызэрихьащт Либеральнэ-демократическэ партием илIыкIоу Юрий Горносталевым.Парламентым социальнэ политикэмкIэ, унагъом иIофхэмкIэ, псауныгъэм икъэухъумэнкIэ ыкIи культурэмкIэ икомитетэу нэбгыри 4 зыхэхьагъэм ипащэу агъэнэфагъ УФ-м и Коммунистическэ партие илIыкIоу Евгений Саловыр.ЗекIонымкIэ, экологиемкIэ ыкIи чIыопсым игъэфедэнкIэ комитетым нэбгыри 5 хэтыщт, ащ ипащэу хадзыгъ политическэ партиеу «Новые люди» зыфиIорэм илIыкIоу Лъэустэнджэл Руслъан.Къэралыгъо Советым – Хасэм статусымкIэ, регламентымкIэ ыкIи депутат этикэмкIэ икомиссие итхьаматэу хадзыгъ «Единэ Россием» илIыкIоу Шъхьэлэхъо Мурат.Хэбзэгъэуцугъэм къызэрэщыдэлъытагъэм тетэу АР-м и Къэралыгъо Совет – Хасэм и Аппарат ипащи мы зэхэсыгъом щагъэнэфагъ. Депутатхэм зэдаштэу а IэнатIэм Iуагъэхьажьыгъ Зеушъэ Айдэмыркъан.Нэужым республикэм ипащэ АР-м и Къэралыгъо Совет – Хасэм ия VIII-рэ зэIугъэкIэгъу иIофшIэн зэрэригъэжьагъэм фэшI къафэгушIуагъ.«ШъузэгурыIоу шъолъырым ихэбзэихъухьан базэ игъэкIэжьын Iоф дэшъушIэнэу сыкъышъоджэ. Хэгъэгум икъэралыгъо политикэ илъэныкъохэм адиштэу IофшIэныр лъыжъугъэкIотэн фае. Президентэу Владимир Путиным тызэрэфытыригъэпсыхьэу цIыфхэм ящыIакIэ нахьышIу хъуным тынаIэ тетыныр типшъэрылъ шъхьаI. Республикэм ихабзэ икъутэмэ пстэуми тызэпэблагъэу тапэкIи тызэдэлэжьэнэу сыщэгугъы», — къыIуагъ КъумпIыл Мурат.ХЪУТ Нэфсэт.