Пцэжъыеешэн спортымкIэ Евразием ичемпионат Урысыем ихэшыпыкIыгъэ командэ пэрытныгъэр щиубытыгъ.
Дунэе мэхьанэ зиIэ зэнэкъокъур ятIонэрэу Адыгэ Республикэм и Мыекъопэ район ипсэупIэу Кужорскэм щырагъэкIокIыгъ ыкIи къэралыгъо 12-мэ ялIыкIохэр хэлэжьагъэх.2025-рэ илъэсым зэхащэгъэ Урысыем ичемпионат изэфэхьысыжьхэмкIэ Адыгеим пцэжъыеешэн спортымкIэ и Федерацие испортсменхэу Чэтыжъ Тимур – Руслан Брызгуновыр, Сергей Ткаченкэр – Александр Нитиевскэр, Сергей Артюхиныр – Алексей Артюхиныр къэралыгъом ихэшыпыкIыгъэ командэ хэхьагъэх. Ахэр Вадим Гасановым егъасэх.
Тишъолъыр илIыкIохэм къаубытыгъэ пцэжъыехэм зэкIэмкIи килограмм 610,4-м ехъу къащэчыгъ, ахэм балли 6 рагъэкъугъ ыкIи команднэ зэнэкъокъум текIоныгъэр къыщыдахыгъ.Унэе зэнэкъокъухэр пштэмэ, Алексей Артюхинымрэ Сергей Артюхинымрэ тыжьын медальхэр къафагъэшъошагъэх.