ЩыIэныгъэм хэгъэгъозэжьыгъэнхэм фэIорышIэ

Мысатыу организациеу «Шаг вперед» зыфиIорэм хахьэу гъэпщынэн зытыралъхьагъэхэу Адыгэ Республикэм пшъэдэкIыжь щызыхьыхэрэр щыIэныгъэм нахь псынкIэу хэгъэгъозэжьыгъэнхэм епхыгъэ IэпыIэгъур зыщызэрагъэгъотын алъэкIыщт гупчэ бэмышIэу Мыекъуапэ къыщызэIуахыгъ. Хьапсым къычIэкIыжьыгъэхэу щыIэныгъэм чIыпIэ къин ригъэуцуагъэхэм социальнэ IэпыIэгъу афэхъугъэным, нэмыкI бзэджэшIагъэхэр зэрамыхьанхэм мы гупчэр фэIорышIэ.

Ащ иIофшIэн зэрэзэхэщагъэм къытегущыIагъ бзэджашIэхэм пшъэдэкIыжь ягъэхьыгъэнымкIэ федеральнэ къулы­къум и ГъэIорышIапIэу Адыгэ Республикэм щыIэм ипащэ игуадзэу, хэгъэгу кIоцI къулыкъум иполковникэу ШIуцIэ Юрэ.Ащ къызэриIуагъэмкIэ, гупчэу «Шаг вперед» зыфиIорэр уголовнэ-правовой нэшанэ иIэу хьапс зытыралъхьагъэхэм, джащ фэдэу бзэджашIэхэр зыщагъэпщынэхэрэ учреждениехэм къачIэкIыжьыгъэхэу щыIэныгъэм чIыпIэ къин ригъэуцуагъэхэм охътэ гъэнэфагъэкIэ Iэпы­Iэгъу афэхъугъэнымкIэ амалышIу. Мы къулыкъум исубъектхэм уголовнэ-гъэцэкIэкIо системэм имызакъоу джы гъэцэкIэкIо хэбзэ къулыкъур, цIыфхэм IофшIэпIэ чIыпIэхэр языгъэгъотырэ къулыкъур, джащ фэдэу социальнэ ыкIи медицинэ фэIо-фашIэхэр языгъэгъотырэ учреждениехэр хэхьагъэх. Мы пшъэрылъым игъэцэкIэн мэхьанэшхо раты. Сыда пIомэ хьапсхэм къачIэкIыжьыгъэхэм IэпыIэгъу ящыкIагъэу макIэп къызэрэхэкIырэр. Ахэм икIэрыкIэу бзэджэшIагъэхэр зэрамыхьанхэм, щыIэныгъэм хэгъэгъо­зэжьыгъэнхэм мы къулыкъур фэIорышIэ.— Мы лъэныкъомкIэ мыр ятIонэрэ гупчэу республикэм щагъэпсыгъ. Гъэ­рекIо шэкIогъум шIушIэ фондэу «Рука помощи» зыфиIорэм Мыекъопэ районым ит станицэу Къурджыпсым мыщ фэдэ гупчэ къыщызэIуихыгъ. Хьыкумым иуна­шъокIэ хьапсым чIэсыгъэ цIыфыр къызычIэкIыжьыкIэ Iоф зыщишIэн иIэн, медицинэ фэIо-фашIэхэр, гъэсэныгъэ ыкIи сэнэхьат зэригъэгъотын, кIэкIэу къэпIон хъумэ, щыIэкIэ тэрэз иIэу псэуным зыхигъэгъозэжьын фае. Джащ фэдэу хьапсым чIэсыфэ шIокIодыгъэ социальнэ зэпхыныгъэхэр зыпкъ ригъэ­уцожьынхэ фае. Зыпари къыдемыIэу изакъоу къызынэкIэ, зытетыгъэ бзэджэшIэ гъогум техьажьын ылъэкIыщт. Ащ фэдэхэм социальнэ IэпыIэгъу тафэхъуныр, обществэм ыкIи щыIэныгъэм хэгъэгъозэжьыгъэнхэмкIэ тишIуагъэ ядгъэ­кIыныр типшъэрылъ шъхьаI, — къы­Iуагъ ШIуцIэ Юрэ.ШэпхъэшIухэм адиштэу зэтегъэпсыхьэгъэ гупчэр зычIэт унэм квадрат метрэ 380-рэ къызэлъеубыты. Ащ чIэтых пIэ­кIо­р­­­хэр, шхапIэр, спортзалыр ыкIи нэмыкI псэуалъэхэр. ПсэупIэ зимыIэ ыкIи Iэпы­Iэгъу зищыкIэгъэ нэбгырэ 20 фэдиз мыщ чIэфэ.— Мы уахътэм ехъулIэу япсауныгъэ елъытыгъэу IэпыIэгъу зищыкIэгъэ хъулъфыгъитIу гупчэм чIэс, ахэм волонтерхэр алъэплъэ. Мэфэ благъэхэм джыри Кемеровэ бзылъфыгъитIу ыкIи Иркутскэ дэт хьапсым къычIэкIыжьыгъэ зы хъулъ­фыгъэ къаращынхэу щыт, — къыIуагъ гупчэу «Шаг на встречу» зыфиIорэм ипащэ.IэпыIэгъу зищыкIагъэхэр илъэс пIалъэ­кIэ гупчэм щыпсэунхэ алъэкIыщт. А уахътэм къыкIоцI ахэм медицинэ ыкIи социальнэ IэпыIэгъу арагъэгъотыщт, ядокументхэр афагъэпсыщтых, нэмыкI лъэныкъохэмкIи яшIуагъэ арагъэкIыщт.— IэпыIэгъу тызыфэхъухэрэм янахьыбэм бзэджэшIагъэ зэрахьагъэми, хабзэр аукъуагъэми, ахэм ягумэкIыгъохэр тэркIэ анахь шъхьаI. Бэрэ къыхэкIы цIыфыр хьапсым къызычIэкIыжьыкIэ ыгу кIодэу, зыми имыщыкIагъэу къыщыхъоу: иунагъо шIокIодыгъ, IофшIапIэ иIэжьэп, документхэр IэкIэлъэп. Арэу щытми, цIыфыр щыIэн, шхэн фае. ИкIэрыкIэу щыIэныгъэр ригъэжьэжьынэу фай, ау пэрыохъухэр къыкъокIых. Гъэпщынэн зытыралъхьагъэу Адыгэ Республикэм пшъэдэкIыжь щызыхьыхэрэр щыIэны­гъэм нахь псынкIэу хэгъэгъозэжьыгъэнхэм фытегъэпсыхьэгъэ гупчэр мыщ фэдэ цIыфхэм IэпыIэгъу афэхъу, анахь шъхьа­Iэр джыри бзэджэшIагъэ зэрамыхьаным щыухъумэгъэнхэр ары. Хьапсым къы­чIэкIыжьыгъэхэр щыIэныгъэм хэгъэгъо­зэжьыгъэнхэм, ахэм щыIэкIэ тэрэз яIэу псэунхэм афэшI зэкIэми тызэгъусэу тишIуагъэ ядгъэкIын фае. Ащ нэмыкIэу къэралыгъо е сатыу организациехэм ащылажьэхэрэр IэпыIэгъу афэхъунхэу шIоигъоныгъэ яIэмэ, мы Iофыгъом изэшIохын къыхэлэжьэнхэ алъэкIыщт, — къыIуагъ бзэджэшIагъэ зезыхьагъэхэм пшъэдэкIыжь зыщарагъэхьырэ ГъэIорышIапIэу Адыгэ Республикэм щыIэм иотдел ипащэу Е. Малюковам.Хьапсым къычIэкIыжьыгъэхэм IофшIэпIэ чIыпIэхэр зэрагъэгъотынхэм, джащ фэдэу обществэм хэгъэгъозэжьыгъэнхэм афэIорышIэрэ площадкэу гупчэр щы­тыщт. Психологхэр ыкIи социальнэ IофышIэхэр, юристхэр щылэжьэщтых, ыпкIэ зыхэмылъ IэпыIэгъур зищыкIагъэхэм арагъэгъо­тыщт.КIАРЭ Фатим.