Хэбзэгъэуцу IофшIэныр

Адыгэ Республикэм и Къэралыгъо Совет – Хасэм я 62-рэ зэхэсыгъо тыгъуасэ иIагъ. Ащ зыщытегущыIэнхэу агъэнэфэгъэ Iофыгъо 40-мэ депутатхэр ахэплъагъэх.Федеральнэ хэбзэгъэуцугъэхэм атегъэпсыхьэгъэнхэм пае хэбзэгъэуцухэм зэхъокIыныгъэхэр афашIыгъэх респуб­ликэ законхэу N 342-м ыкIи N 265-м. Ахэр зыфэгъэхьыгъэхэр карантин объе­кт­хэм ахамылъытэхэу къэкIыхэрэу къы­ращэхэрэр щынагъо къызпыкIыхэу ылъытэнхэмкIэ ыкIи ахэм якъыхэгъэщынкIэ, зямыгъэушъомбгъугъэнымкIэ, джащ фэдэу гъэкIодыгъэнхэмкIэ Iофхэр зыдызэшIохыгъэн фаехэмкIэ министрэхэм я Кабинет ыгъэнэфэнымкIэ фитыныгъэу иIэр ары. ТичIыопс зиягъэ екIын ылъэкIыщт, анахьэу къагъэгъунэрэ шъолъыр ыкIи чIыпIэ мэхьанэ зиIэхэм къащыкIырэ анахь щынэгъо лъэпкъхэм псынкIэу ябэныгъэныр ащкIэ зэшIохыгъэ хъущт.Джащ фэдэу аштагъ АР-м и Хэбзэгъэуцугъэу «Адыгэ Республикэм и Хэбзэгъэуцугъэу «ЦIыфхэм IофшIэн ягъэгъотыгъэным ылъэныкъокIэ Iофыгъо шъхьафхэм ягъэзекIон ехьылIагъ» зыфиIорэм зэхъокIыныгъэхэр фэшIыгъэнхэр». Ащ къыдыхелъытэ сэкъатныгъэ зиIэм IофшIэн егъэгъотыгъэнымкIэ фитыныгъэу иIэхэр шъолъыр гъэнэфагъэм къыщыухъумэгъэнхэр, ежь IофшIэныр къэзытырэ компаниер («ащ ышъхьэ офисыр») УФ-м инэмыкI шъолъыр щытхыгъэми ыкIи итыми.УплъэкIун-лъытэн палатэм и Тхьаматэу П. Стаценкэм ипIалъэм къыпэу IэнатIэу ыIыгъыр къыгъэтIылъынымкIэ къытыгъэ лъэIу тхылъыр яIэубытыпIэу депутатхэм ащ дырагъэштагъ, иIэнатIэ IуагъэкIыгъ.Ащ нэмыкIэу къэралыгъом ишъолъыр­хэм яхэбзэгъэуцухэм федеральнэ законхэмкIэ проектэу къатыгъэхэмкIэ унашъо аштагъ. Шъолъырхэм яхэбзэ­гъэуцухэм мы шIыкIэр чанэу агъэфедэ зэдырагъэштэным ыкIи пэшIорыгъэшъ экспертизэ ашIыным апае УФ-м и Къэ­ралыгъо Думэ халъхьаным ыпэкIэ. Фэдэ зэдэлэжьэныгъэм хэбзэгъэуцухэм лъэныкъо зэфэшъхьафхэмкIэ Iофыгъохэр къаIэтых: бюджет гъэпсынымкIэ ыкIи чIыгу зэфыщытыкIэхэмкIэ; коммунальнэ фэIо-фашIэхэм якъызIэкIэгъэхьанкIэ ыкIи апкIэ тыгъэнымкIэ; экологическэ IофтхьабзэхэмкIэ ыкIи зекIонымкIэ; псауныгъэм икъэухъумэнкIэ, гъэсэныгъэмкIэ, нэмыкIхэмкIи.МэшIодз Саид.