Урысыем ыкIуачIэ хагъахъозэ

Урысые общественнэ организациеу «Деловая Россия» зыфиIорэм ия XXI-рэ зэфэс щыIагъ. Организациер зызэхащагъэм ия 25-рэ илъэс ар фэгъэхьыгъагъ. Ащ итхьаматэу Алексей Репик Iофтхьабзэр зэрищагъ. Мы хъугъэ-шIагъэм хэгъэгум ичIыпIэ зэфэшъхьафхэм ялIыкIуабэ зэрипхыгъ. ПэIудзыгъэ шIыкIэм тетэу кIогъэ зэIукIэм хэлэжьагъэх хэгъэгум ыкIи шъолъырхэм яхэбзэ къулыкъухэм, лъэныкъо зэфэшъхьафхэмкIэ Iоф зышIэхэрэм ялIыкIохэр. Адыгеим ыцIэкIэ а Iофтхьабзэм хэлэжьагъэх республикэм и ЛIышъхьэу КъумпIыл Мурат, АР-м иминистрэхэм я Кабинет и Тхьаматэу КIэрэщэ Анзаур, ащ игуадзэу ЛIыхэсэ Махьмуд, АР-м экономикэ хэхъоныгъэмкIэ ыкIи сатыумкIэ иминистрэ иапэрэ гуадзэу Александр Павловскэр.

Хэгъэгум и Президентэу Владимир Путиным зэфэсым хэлажьэхэрэм къа­фэгушIуагъ организациеу «Деловая Россия» зыфиIорэр зызэхащагъэм ия 25-рэ илъэскIэ. Президентым къыхигъэ­щыгъ лъэныкъо зэфэшъхьаф­хэмкIэ бизнесым ылъэныкъокIэ Iоф зышIэхэрэм федеральнэ министерствэ­хэм, шъолъырхэм, чIыпIэхэм якъулыкъу пстэуми зэдэлэжьэныгъэ зэрадыряIэр. Илъэс 15-кIэ узэкIэIэбэжьмэ, мы организацием иIэгъэгъэ зэфэсым Лъэпкъ предприниматель IофшIэнымкIэ зэшIуа­хыщтхэр щырахъухьэгъагъэх. Бизнесым административнэ лъэныкъомкIэ тегъэ­кIагъэм къыкIегъэчыгъэным иIофыгъохэми нахь анаIэ атырадзэгъагъ.«Непэ «Деловой Россиер» шэпхъэ гъэнэфагъэхэм къапкъырыкIыхэзэ бизнесыр нахь дэгъоу зэхэщэгъэным чанэу хэлажьэ, зэнэкъокъуныр зылъэпсэ Iоф­тхьабзэхэм ынаIэ атыредзэ, Урысые Федерацием ишъолъырхэм япащэхэм ягъусэу инвестиционнэ шIыкIакIэхэр шъолъырхэм ащыпхырыщыгъэнхэмкIэ IофшIэн гъэнэфагъэ егъэцакIэ, — къы­Iуагъ Владимир Путиным. — Джыри зэ къыхэзгъэщынэу сыфай: а IофшIэнымкIэ анахь чIыпIэ шъхьаIэ зыубытырэр бизнесыр ары, гугъапIэхэр къэзытырэ проектхэр ащ IэубытыпIэ ешIых, къа­лэхэмрэ нэмыкI псэупIэхэмрэ джырэ уахътэм диштэрэ IофшIэпIэ чIыпIа­кIэхэр ащызэхэщэгъэнхэм ынаIэ тырегъэты».

УФ-м и Президент джащ фэдэу къыхигъэщыгъ шIушIэ Iофтхьабзэхэми а организацием ынаIэ зэратыригъэтырэр. ГущыIэм пае, хэушъхьафыкIыгъэ дзэ операцием хэлажьэхэрэм ыкIи иветеранхэм, ахэм яунагъохэм адеIэ, общественнэ чIыпIэхэм язэтегъэпсыхьан тэрэзэу зэшIохыгъэным лъэплъэ.«Типредпринимательхэм мафэ къэс зэшIуахырэ Iоф къинымкIэ къаушыхьаты ахэм яшIэныгъи, якъулаиныгъи Урысыем пытэу зэрепхыгъэхэр, тицIыфхэм ящыIакIэ нахьышIу зэрэхъущтым къызэрэпкъырыкIыхэрэр. Арышъ, хэгъэгу лъэшыр ары зэнэкъокъур зылъэпсэ бизнесри нахь лъэш зышIырэр», — къы­хигъэщыгъ Владимир Путиным.Организацием итхьаматэу Алексей Репик Путиныр къызэрафэгушIуагъэм пае зэрэфэразэр къыхигъэщыгъ ыкIи мы аужырэ лъэхъаным бизнесым иIоф­шIакIэ зэхъокIыныгъэ гъэнэфагъэхэр зэрэфэхъугъэхэр къыIуагъ. А зэхъокIыныгъэхэр зэпхыгъэхэр социальнэ лъэныкъор, шIушIэ IэпыIэгъур ары. Бизнесым ежь пайи амалыкIэхэр къыхехых. ЛIэужыкIэхэр предпринимательствэм нахьыбэу хахьэхэ хъугъэ, ахэм кIэухы­шIухэм зафакъудыи. Ащ фэдэ предприниматель ныбжьыкIэхэм IэпыIэгъу ятыгъэныр организацием къыдилъытэрэ лъэныкъо шъхьаIэхэм ащыщ.Шъугу къэтэгъэкIыжьы: 2001-рэ илъэ­сым организацием иIофшIэн ригъэжьэгъагъ, непэкIэ ащ зиушъомбгъугъ, предприниматель мини 10-м ехъу хэт. Ахэм ахэхьэх Адыгеим илIыкIохэри. 2023-рэ илъэсым организациеу «Деловой Россием» и Адыгэ республикэ шъолъыр къутамэ щыIэ хъугъэ. Ащ фагъэзагъэр гъэпсэфыпIэу «Здравница Лаго-Наки» зыфиIорэм ипащэу Татьяна Мамонтовар ары. Къутамэр шъолъырым иIофышIэ купхэм язэдэлэжьэныгъэ нахь гъэпытэгъэным фэлажьэ, адыгэ шэн-хабзэхэм якъэухъумэнкIэ фестивалэу «ЩыIэны­гъэм итхыпхъэхэр» зыфиIорэм хэлэжьагъ, ныбжьыкIэхэм апае гъэсэныгъэ программэхэм ателъытэгъэ проектэу «НыбжьыкIэ палатэр» зыфиIорэми дэлажьэ. Къутамэм ипащэхэм яIэпыIэгъу хэлъэу гъэпсэфыпIэу «Лэгъо-Накъэ» хэушъхьафыкIыгъэ дзэ операцием иветеран 49-мэ ыпкIэ хэмылъэу IэпыIэгъу щаратыгъ.Владимир Путиныр зэфэсым хэла­жьэхэрэм къаIэтырэ Iофыгъохэм апае зэрафэразэр къыIуагъ, анахьэу унагъо­хэм IэпыIэгъу ятыгъэным, сабый къызфэхъунэу щытхэм тэрэзэу алъыплъэгъэнхэм алъэныкъокIэ пшъэрылъ гъэнэфагъэхэри къафишIыгъэх. Унашъоу аштэрэ пэпчъ тэрэзэу гъэцэкIагъэ хъуным министерствэхэм икъоу анаIэ атырамыгъэтымэ зэрэмыхъущтыр къыхи­гъэщыгъ. Инфляцием къыкIегъэчыгъэным, инвестиционнэ амалыкIэхэр гъэфедэгъэнхэм ыкIи нэмыкI лъэныкъохэм анаIэ атыраригъэдзагъ.«Урысыем зэшIуихын фэе пшъэры­лъэу ыпашъхьэ итхэм ащыщых инвестиционнэ IофтхьэбзакIэхэр зэшIохыгъэнхэр, инновационнэ компаниехэм ахъщэу апэIуагъахьэрэм хагъэхъоныр, къыдэгъэкIыжьыным, зекIоным ыкIи нэмыкI лъэныкъохэм япхыгъэ проектхэм япхырыщын лъэныкъо пстэумкIи икъоу анаIэ атырагъэтыныр», — къыIуагъ Владимир Путиным.Адыгеим и ЛIышъхьэ зэфэсым икIэух­хэм афэгъэхьыгъэу къыхигъэщыгъ Президентым къыгъэнэфэгъэ пшъэрылъхэр ыкIи лIыкIоу къекIолIагъэхэм IофшIэнымкIэ ячаныгъэ джыри нахь хэхъонымкIэ Iофтхьабзэхэу зигугъу къашIыгъэхэм хэгъэгумкIи шъолъырхэмкIи мэхьанэшхо зэряIэр. А лъэныкъомкIэ Адыгеим Iоф­шIэн гъэнэфагъэ щагъэцакIэ: бизнесым ищыкIэгъэ амалхэр рагъэгъотых, предпринимательствэ цIыкIумрэ гурытымрэ IэпыIэгъу зэрафэхъущтхэмкIи инфраструктурэм зырагъэушъомбгъу. Гупчэу «Сибизнес» зыфиIорэм предпринимательхэмкIэ мэхьанэшхо иI.«Лъэпкъ проектхэмрэ къэралыгъо программэхэмрэ къыдалъытэрэ амалхэр нахь игъэкIотыгъэу дгъэфедэнхэм тыдэ­лажьэ, бизнесым ипшъэрылъхэр на­хьышIоу зэшIуихынхэм фэлэжьэщтхэм ялъэныкъо шъхьаIэхэр тэгъэунэфых. ГущыIэм пае, АР-м хэхъоныгъэмкIэ и Унэе программэ къыдилъытэрэ Iофтхьабзэхэр нахьыбэрэмкIэ зыфэгъэхьыгъэхэр экономическэ пшъэрылъхэм язэшIохын. Ащ къыхеубытэх къыдэгъэкIыжьыным ипредприятиехэмрэ чIыгулэжьынымкIэ бизнесымрэ. Непэ ащ фэдэ IофшIэным кIэухэу фэхъурэр тинэрылъэгъу. Респуб­ликэм зэхэубытэгъэ продукциеу къыщахьыжьырэр нахьыбэ хъугъэ. 2026-рэ илъэсым ищылэ мазэ къыщегъэжьагъэу шышъхьэIум нэс къыдэгъэкIыжьыным ииндекс проценти 105-м нэсыгъ, Къыблэ федеральнэ шъолъырым а чэзыумкIэ апэрэ чIыпIэр ащ щиубытыгъ. Мы илъэ­сым пыкIыгъэ мэзи 8-м IофшIэн лъэпкъ пстэухэмкIи хахъо тшIыгъэ», — къыхигъэщыгъ КъумпIыл Мурат.Промышленнэ паркэу «Инэмым» амалышIухэр къызэритыщтхэм игугъапIэ зэрэщыIэр, непи къатефэрэр шIуагъэ хэлъэу а лъэныкъомкIэ зэрашIэрэр рес­публикэм и ЛIышъхьэ къыхигъэщыгъ. Адыгеим иэкономикэкIэ чIыгулэжьынми мэхьанэу иIэр ин дэд. Ахэм адакIоу зекIонми гугъэпIэшхохэр рапхых, респуб­ликэр а лъэныкъомкIэ хэпшIыкIэу лъыкIотагъ. ПсэолъэшIыным джащ фэдэу хэхъоныгъэ ешIы, тицIыф псэупIэхэм ятеплъэ ар къеушыхьаты. АР-м и ЛIышъхьэ къызэриIуагъэмкIэ, Адыгеим иэкономикэ илъэныкъо шъхьаIэхэм тапэкIи хэхъоныгъэ ашIынымкIэ зэфэсым зи­гугъу къыщашIыгъэ Iофтхьабзэхэм яшIогъэшхо къэкIощт.«Iофтхьабзэу непэрэ уахътэм диштэу зигугъу къашIыгъэхэр пхырыщыгъэнхэмкIэ Iофэу дгъэцакIэрэм тишъолъыр инэшанэхэри къыщыдэтэлъытэх. ЗэкIэ министерствэхэр республикэм ипредпринимательхэм, бизнесым гъусэныгъэ пытэ адыряIэу, хэгъэгум технологиехэмкIэ исуверенитет ихэхъоныгъэ къып­къырыкIырэ пшъэрылъхэм язэшIохынкIэ зэдэлажьэх. А IофшIэныр джыри нахь дэгъоу зэшIохыгъэ хъуным пае федеральнэ гупчэм игъоу ылъэгъухэрэмрэ «Деловой Россием» иIэгъэ зэфэсым щаштэгъэ унашъохэмрэ такъыпкъырыкIыщт. Предпринимательствэм IэпыIэгъу етыгъэнымкIэ анахь амалышIухэу щы­Iэхэр зэкIэ дгъэфедэщтых», — къы­Iуагъ КъумпIыл Мурат.АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.