ДзюдомкIэ Урысыем ичемпионат чъэпыогъум и 15-м къыщегъэжьагъэу и 18-м нэс Ставрополь краим икъалэу Минеральные Воды щэкIо.
Зэнэкъокъум иапэрэ мафэ килограмм 60-м нэс къэзыщэчыхэрэм якуп хэтыгъэ Адыгеим ибэнакIоу Мерэм Дамир ухьазырыныгъэ дэгъу къыщигъэлъэгъуагъ, кIэух едзыгъор къыхьи, дышъэ медаль къыфагъэшъошагъ.Гъэхъэгъэшхо зышIыгъэ Мерэм Дамир фэгушIуагъ Адыгэ Республикэм и ЛIышъхьэу КъумпIыл Мурат. Ар зыгъэсэгъэ тренерхэу Хьакурынэ Дамиррэ Мудрэнэ Аслъанрэ ирэзэныгъэ гущыIэхэр апигъохыгъэх. Шъолъырым физическэ культурэм ыкIи спортым хэхъоныгъэ щашIыным анаIэ зэрэтырагъэтырэр, ащкIэ къэралыгъо программэу «Урысыем испорт» игъэцэкIэн ишIогъэшхо къызэрэкIорэр хигъэунэфыкIыгъ.Килограмм 60-м нэс къэзыщэчыхэрэм якуп пэрытныгъэр щиIыгъыгъ Урысыем и Кубок къызфагъэшъошагъэу ыкIи къэралыгъом ичемпионат хагъэунэфыкIырэ чIыпIэхэр къащыдэзыхыгъэ Кан-Демир Суге-Маадыр (Республикэу Тывар). Ау ащ «иппонкIэ» къытекIуагъ Чэчэн Республикэм испортсменэу Магомед Абдулаевыр. Камчатскэ краим щыщ Турпал Хабибулаевыр М. Абдулаевым нахь лъэшыгъ ыкIи кIэух едзыгъом Мерэм Дамир щыIукIагъ. Адыгеим испортсмен «иппонкIэ» текIоныгъэр къыдихыгъ ыкIи турнир шъхьаIэм апэрэу идышъэ медаль къыфагъэшъошагъ.— Непэ сызэрэбэнагъэм сигъэрэзагъ. КIэух едзыгъом сызэнэкъокъугъэ спортсменым ыпэкIэ сыIукIагъэп. БэнэнымкIэ Адыгеим еджэпIэ дэгъу иI, ау бэшIагъэ тиреспубликэ илIыкIохэм Урысыем ичемпионат дышъэ медаль къызыщамыхьыгъэр, — къыIуагъ Дамир.Мы зэнэкъокъум аужырэу тилIыкIохэм пэрытныгъэ зыщаубытыгъэр 2013-рэ илъэсыр ары. Къалэу Санкт-Петербург щыкIогъэ зэнэкъокъум апэрэ чIыпIэр къыщыдихыгъагъ ШъэоцIыкIу Рустам.Адыгеим ыцIэкIэ Урысыем ичемпионат хэлажьэх Бэслъэнэй Темирлан, Рабадан Исмаиловыр, Тао Адам, Тао Инат, Кантемир Латоковыр, Мыс Казбек, Рамазан Хидировыр, Датхъужъ Алый, Бэгъ Аслъан, Бэгъ Салим ыкIи Камилл Дзагаловар. ЗэкIэмкIи зэнэкъокъум спортсмен 483-рэ хэлажьэ.