C. Чернышевич ихъарзынэщ
Непэрэ урысые литературэм хъугъэ-шIэгъэшхо хэхъухьагъ. Эпическэ поэмэу «1517. Мишель ыкIи Диана» зыфиIоу урысыбзэкIэ атхыгъэм икIыхьагъэкIэ рекорд ыгъэуцугъ, зыусыгъэр — Станислав Чернышевич, уахътэр — 2026-рэ илъэс.
Произведени-ем иинагъэ шIошъгъэхъугъуай, ау ар шъыпкъэ! Усэ шапхъэм илъэу сатырэ 20 000 мэхъу! Поэмэм Урысыем сертификатищ къыщилэжьыгъ, тхылъэу «Урысыем ирекордхэр» зыфиIорэм дэхьагъ. Ар урысыбзэкIэ тхыгъэ поэмэ анахь кIыхьэ къодыеп, КъохьэпIэ Европэр пштагъэми, ащ нахь поэмэ ин щыIэгоп. ЕтIани, зы шэпхъэ гъэшIэгъон авторым ыгъэфедагъ. ХьарыфиплI: «И», «Н», «Т», «С» язэпэчыжьагъэхэр зэфэдизхэу хьарыф пэпчъ гъогогъу 27500-рэ къыхэфэх. Классикхэм ыкIи ижъырэ лъэхъаным IорIуатэхэр е пшысэхэр зэрагъэфедэщтыгъэхэр щигъэзыехи, Станислав Чернышевич ежь иавторскэ сюжет къыугупшысыгъ. Произведениер 1517-рэ илъэсым хъугъэхэм къатегущыIэ, а лъэхъаным чIыгукIэхэр къагъотыщтыгъэх, зэошхохэр кIощтыгъэх. Тарихъымрэ сюжетэу къэугупшысыгъэмрэ щызэголъхэу произведениер авторым ыгъэпсыгъ. Поэмэм еджэхэрэм — зэрэдунаеу Европэм къыщегъэжьагъэу Азием нэс — геройхэм ягъусэхэу къакIухьащт.Мы поэмэм адыгэмэ афэгъэхьыгъэ пычыгъо къыхэфэ. Ар ежь авторым, Станислав Чернышевич, редакцием къыфигъэхьыгъ. Тигъэзетеджэмэ ашIогъэшIэгъонынэу ар къытщыхъугъ ыкIи адыгабзэкIэ пычыгъор зэтыдзэкIыжьыгъ.«…Черкесмэ а лъэхъаным щытхъоуДзэ сэнаущыгъэр къафалъэгъу.Тхылъыжъмэ къатхы: инэплъэгъоуОрдэ лъэпкъышхом Кавказ мэхъу,ХъункIэн гупшысэр зыдаIыгъэу,ЧIыналъэм екIух фаузэнкIыгъэу.КъэбэртэелIэу Идар пщышхорЛIыхъужъэу пыим пэгъокIыгъ.Зэхигъэтакъоу кощырэ лъэпкъырДзэ лъыпсыр псыхъоу щигъэчъагъ,Къэнэгъэ тIэкIур нахь чыжьэуЧеркес чIыгужъым пэIуидзыгъ.Ежь хэгъэгу щытхъур къыщилэжьэу«ЧIыгу угъоякIоу» алъытагъ…Къушъхьитфымэ щытхъур ашъхьэдэкIы,Зэпыйхэр пщым зэрегъэшIужьых,Ипхъорэлъф пIомэ, Гощэунаеу,Зитеплъэ узыушхъухьэу,Зымакъэ псыхъоу, шъхъашъхъэу чъэрэр,Нэплъэгъур — жъогъо нэфым фэдэр,— Шъхьэгъусэу Иван Грознэм раты,Урыс хэгъэгум рагъэблагъэ.Ащ щагъэшIагъоу идэхагъэМариер цIакIэу къыфаусы.Ыш шъыпкъэу, шIу дэдэ ылъэгъоу,Ащ къыфэхъугъэ игъусэгъоуДзэкIолI лIыбланэу Сэлтанкъулэм,ЦIэ тедзэр — Михаил Черкасскэм,Ыгъэщынагъ литовцэ купыр,Дифыгъэх Полоцкэ а пыйхэр,Къыгъэгъунагъ ащ Ржев, Тарусу,ЗеIэты дзэ пащэм нэсэу,Урысмэ яIэм къэлэ шъхьаIэуЩыпсэурэ цIыфмэ яшIулъэгъуЗэхешIэ мафэ къэс нахь лъэшэу…»Усэ пычыгъор зэзыдзэкIыгъэрДэрбэ Тимур.