Iэшъынэ А.
«Искусствэ хъугъэ IэшIагъэхэр-2» зыфиIорэ проектым изэфэхьысыжьхэр зыщашIыгъэ зэхахьэ КъокIыпIэм щыпсэурэ лъэпкъхэм искусствэхэмкIэ ямузей и Къутамэ щыкIуагъ.
Республикэ грантым ишIуагъэкIэ проектыр агъэцэкIагъ. Адыгэ лъэпкъым итарихъ къэзыIотэ-рэ пкъыгъоу къыднэсыжьыгъэхэм якъэбар амыгъэкIодэу, ахэм яшIыкIэ къэIэтыжьыгъэным ар фэIорышIэ. Проектым лъэныкъо зэфэшъхьафхэр къызэлъиубытыгъ.— Мы етхьыжьэгъэ Iофым къыдыхэлъытагъэу кIэлэцIыкIухэм заIудгъакIэщтыгъ. Ижъырэ лъэпкъ IэшIагъэхэр зыфэдагъэхэр ахэм ядгъэлъэгъунэу къетщэкIыгъэх. Культурэм иунэу республикэм ирайонхэм ыкIи икъалэхэм ащыIэхэм Iофтхьабзэхэр ащыкIуагъэх. Ахэр кIэлэцIыкIухэм ашIогъэшIэгъоныгъ. Ащ тыкъыщымыуцоу мы проектым джыри нахь ныбжьыкIабэ хэщэгъэным тыдэлэжьэщт, — къыIуагъ Адыгеим лъэпкъ IэшIагъэхэмкIэ и Ассоциацие ипащэу Гумэ Ларисэ.— Лъэпкъ музеим чIэлъ бзылъфыгъэ адыгэ шъуашэм «ыпсэ» къыпыдгъэкIэжьы тшIоигъуагъ. Ащ ныбжь дэхэкIае иI, дышъэидэр нахь къызэтенагъ, ау шэкIэу зыхэшIыкIыгъэр дэи хъугъэ. Ар зыфэдагъэр цIыфхэм ядгъэлъэгъуным пае ащ фэдэу тшIынэу тыфежьагъ. Мары мы Iэшъхьэ бэлагъэр пштэмэ, ащ ишIын дышъэидэм пылъ IэпIэIасэхэм зэкIэми тыхэлэжьагъ, — еIо дышъэидэнымкIэ IэпэIасэу Сетэ Сафиет.«Искусствэ хъугъэ IэшIагъэхэр-2» зыфиIорэ проектым изэфэхьысыжьхэм зэхахьэм щатегущыIэгъэхэ къодыеп, лъэпкъ культурэр зышIогъэшIэгъонхэм ар нэрылъэгъу къафашIыгъ. Ежь Ассоциацием хэтхэм ныбжьыкIэу проектым хэлэжьэгъагъэхэм яIофшIагъэхэр ыкIи музеим чIэлъ пкъыгъохэр зыхэхьэгъэ къэгъэлъэгъон агъэхьазырыгъ. ЗиIэпэIэсэныгъэ къэзыгъэлъагъо зышIоигъохэми ащ фэдэ амал аратыгъ, дышъэидэным ишъэфхэм зыщагъэгъуазэзэ мэстэ-Iуданэр шэкIым щыпхыращыгъ.Цэй Замир.