А. Гусев
Адыгеим и ЛIышъхьэу КъумпIыл Муратрэ УФ-м культурэмкIэ иминистрэ игуадзэу, статс-секретарэу Жанна Алексеевамрэ хэлэжьагъэх креативнэ индустриехэмкIэ еджапIэу Тульскэм мэфэкI шIыкIэм тетэу къыщызэIуахыгъэм.
Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, Адыгеим культурэмкIэ иминистрэу Аулъэ Юрэ, Мыекъопэ районым ипащэу Михаил Марьиныр.ИскусствэхэмкIэ кIэлэцIыкIу еджапIэу Тульскэм дэтыр зэнэкъокъум анахь дэгъоу къыщыхагъэщыгъэхэм ахэфагъ ыкIи креативнэ индустриехэм яеджапIэ изэхэщэн пае федеральнэ бюджетым сомэ миллион 50-м ехъу къыхагъэкIыгъ. Унэм игъэцэкIэжьынрэ ящыкIэгъэщт Iэмэ-псымэхэм ящэфынрэ апэIухьанэу республикэ бюджетым сомэ миллиони 4 фэдиз къытIупщыгъ.Республикэм и ЛIышъхьэ еджапIэм амалыкIэу иIэ хъугъэхэм защигъэгъозагъ, кIэлэегъаджэхэми, кIэлэеджакIохэми гущыIэгъу афэхъугъ. ИскусствэхэмкIэ кIэлэцIыкIу еджапIэу псэупIэу Тульскэм дэтым ипащэу ГъукIэлI Батыррэ креативнэ индустриехэмкIэ еджапIэм иIэшъхьэтетэу Наталья Шпаковскаямрэ зэдэгущыIэгъум хэлэжьагъэх.
Квадрат метрэ 360-м ехъу зыубытыщт унэхэр Тульскэ еджапIэм къыфыхагъэкIыгъэх, ахэм студии 4 ащызэхащагъ: «Анимация и 3D графика», «Дизайн», «Фото и видеопроизводство», «Звукорежиссура и звуковой дизайнер» зыфиIохэрэр. КIэлэеджакIохэм дизайным, медиам, искусствэм алъэныкъокIэ Iоф ашIэным пае уахътэм диштэрэ Iэмэ-псымэхэр къызфагъэфедэнхэ алъэкIыщт, лъэныкъо зэфэшъхьафхэмкIэ къулаиныгъэ аIэ къырагъэхьашъущт.
Егъэджэныр зытегъэпсыхьагъэр я 5 — 11-рэ классхэм арысхэр ары, зэреджэщтхэ пIалъэр илъэси 2. Апэрэ купэу зэIуагъэкIагъэр зэрэхъурэр кIэлэеджэкIо 80, къихьащт илъэсым джыри нэбгырэ 80 къахэхъощт. Программэ гъэнэфагъэкIэ еджэныр гъэпсыгъэщт: апэ кIэлэеджакIохэм лъэныкъо зэфэшъхьафхэм нэIуасэ зафашIыщт, творческэ гъэцэкIэнхэм зэряхъулIэхэрэр аушэтыщт, нэужым ежьхэм агукIэ нахь ашIогъэшIэгъон студиер къыхахыщт.
Урысыем культурэмкIэ иминистрэ игуадзэ кIэлэцIыкIухэм арагъэгъотыгъэ амалхэм осэшхо къафишIыгъ, сэнэхьатэу зызфагъэсэщтхэмкIэ Iэмэ-псымэу, оргтехникэу къызIэкIагъэхьагъэхэм яшIогъэшхо къызэрэкIощтыр къыхигъэщыгъ. Гъогоу зытехьагъэхэм гъэхъагъэхэр щашIынхэу къафэлъэIуагъ ыкIи графическэ планшетым къафытетхагъ.
«ЕджэпIакIэм икъызэIухын дакIоу амалыкIэхэм ядунайи кIэлэцIыкIухэр хэтэщэх. Мыщ фэдэ еджапIэхэмкIэ анахь мэхьанэшхо зиIэр кIэлэегъэджэ-гъэсакIохэр ары. Iофэу зыфэгъэзэгъэщтхэм фэкъулаеу хъунхэмкIэ шъо шъуздэлэжьэщт кIэлэцIыкIухэм ясэнаущыгъэ нахь хэхъон ылъэкIыщт. ШъуикIэлэпIухэм гъэхъагъэу ашIыхэрэм шъузэрарыгушхощтым сицыхьэ телъ!», — къыхигъэщыгъ Жанна Алексеевам кIэлэегъаджэхэм гущыIэгъу зафэхъум.
КIэлэеджакIохэм япроектхэр хьакIэхэм къарагъэлъэгъугъэх, зэрагъэшIэнэу игъо зыфифагъэхэм нэIуасэ афашIыгъэх. КIэлэцIыкIухэр зыгъасэхэрэм зыкIэ ащыщэу, Адыгэ Республикэм инароднэ артисткэу Зыхьэ Мэлайчэтрэ ащ игъусагъэхэмрэ аудиопшысэхэмкIэ урысые зэнэкъокъоу «Урысыем щыпсэурэ цIыф лъэпкъхэм япшысэхэр» зыфиIорэм пае адыгэ лъэпкъ пшысэхэм къяджагъэх. Анимационнэ фильмхэм язэхэщакIи, дизайным ылъэныкъокIи адыгэ мэкъамэхэр агъэфедэх.КъумпIыл Мурат АР-м культурэмкIэ и Министерствэ пшъэрылъ фишIыгъ шъолъырымкIэ мэхьанэшхо зиIэ Iофтхьабзэхэм кIэлэцIыкIухэр нахь ахащэнхэу, гущыIэм пае, адыгабзэм икъэухъумэнкIэ ыкIи изэгъэшIэнкIэ екIолIэкIэ гъэнэфагъэ яIэ хъуным дэлэжьэгъэнымкIэ гуманитар ушэтынхэм апылъ Адыгэ республикэ институтым и Проектнэ офис фэдэхэм.
«Креативнэ индустриехэмкIэ республикэм щызэхащэгъэ яплIэнэрэ еджапIэу мыр щыт. Джырэ уахътэм диштэрэ лъэныкъохэмкIэ кIэлэцIыкIухэм шIэныгъэу ахэм ащызэрагъэгъотырэр шIуагъэ къэзыхьырэ проект гъэшIэгъонхэм ащагъэфедэнхэм иамал ахэм ятыгъэн фае: адыгэ эпосымрэ фольклорымрэ атегъэпсыхьэгъэ мультфильмхэр, адыгабзэкIэ аудиотхылъхэр къыдагъэкIынхэу», — къыIуагъ Адыгеим и ЛIышъхьэ.
Мы аужырэ илъэси 3-м креативнэ индустриехэмкIэ еджапIэхэр республикэм щызэхэщэгъэнхэм пае федеральнэ мылъкоу сомэ миллиони 187-м ехъу къафатIупщыгъ. А ахъщэмкIэ Мыекъуапэ искусствэхэмкIэ икIэлэцIыкIу еджапIэхэу N 1-мрэ N 6-мрэ атегъэпсыхьагъэу креативнэ индустриехэмкIэ еджэпIи 2, къуаджэу Кощхьабли искусствэхэмкIэ М. Хьагъэуджым ыцIэкIэ щыт кIэлэцIыкIу еджапIэм тегъэпсыхьагъэу креативнэ индустриехэмкIэ еджапIэ къащызэIуахыгъ.АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.