Адыгеим икIэлэеджакIохэр къахэщыгъэх

Адыгэ къэралыгъо университетым я V-рэ Къыблэ-Урысые хьисап олимпиадэу «Ассара» зыфиIорэр мы мафэхэм щыкIуагъ. Хабзэ зэрэхъугъэу, ащ пшъэшъэжъыехэр ары хэлажьэхэрэр.

Мы илъэсым олимпиадэм Урысыем ишъолъыр 21-мэ ыкIи Абхъазым, Узбекистан къарыкIыгъэ кIэлэеджэкIо 52-рэ хэлэжьагъ. Адыгеир нэбгыри 8-мэ къагъэлъэгъуагъ. Ахэм ащыщэу Мамый Ярэ тыжьын медаль ыкIи ятIонэрэ шъуашэ зиIэ диплом, Саният Мирзаалиевам джэрз медальрэ ыкIи ящэнэрэ шъуашэ зиIэ дипломрэ къалэжьыгъ.

— Урысыем мыщ фэдэ олимпиадэ щызэхащэрэп. Пшъэшъэжъыехэр мыщ щызэнэкъокъухэрэ къодыеп, хьисап шIэныгъэм фэщагъэ мэхъух. Программэр зэхэдгъэуцо зыхъукIэ, хьисапым ящыIэныгъэ гъогу рапхын зэралъэкIыщтыр къэтэгъэлъагъо. Бзылъфыгъэу хьисапым ылъэныкъо­кIэ гъэхъагъэ зышIыгъэхэм нэIуасэ афэтэшIых. Мыщ фэдэ екIолIакIэм шIуагъэ къызэрихьырэр тэлъэгъу. Илъэ­ситфым тихэгъэгу имызакъоу, IэкIыб къэралыгъохэм якIэлэ­еджакIохэу хьисапым фэщагъэхэр зэрепхых, — къы­Iуагъ АКъУ-м иректорэу Мамый Даутэ.

Урысые хьисап олимпиадэу «Ассарар» 2022-рэ илъэсым къыщегъэжьагъэу зэхащэ. Пшъэшъэжъыехэр хьисапым нахь фэщэгъэнхэр ары пшъэрылъ шъхьаIэу зэхэщакIохэм зыфагъэуцужьырэр.

Олимпиадэм кIэщакIо фэхъугъэх Адыгэ къэралыгъо университетымрэ республикэ естественнэ-хьисап еджапIэмрэ. Ащ изэхэщэнкIэ IэпыIэгъу къа­фэхъугъ Адыгэ Республикэм гъэсэныгъэмрэ шIэныгъэмрэкIэ и Министерствэрэ «Сбербанкымрэ».

Олимпиадэр уцугъуитIоу кIуагъэ. Ары пэпчъ гъэцэкIэн плIырыплI иIагъ. Аныбжь елъытыгъэу пшъэшъэжъыехэр гощыгъагъэх: я 8-рэ ыкIи я 9 — 10-рэ классхэм арысхэр.IофшIэнхэр олимпиадэ движением илIыкIохэм ауплъэкIугъэх. ОсэшIхэм ахэтыгъэх кIэлэеджакIохэм я Урысые олимпиадэхэм текIоныгъэ къащыдэзыхыгъэхэр, апшъэрэ еджапIэхэм якIэлэегъа­джэхэр, хьисапымкIэ гъэхъэгъэ инхэр зышIыгъэ бзылъфыгъэхэр.

Зэфэхьысыжьхэм къызэрагъэлъэгъуа­гъэмкIэ, нахьыкIэхэмкIэ дышъэ медаль ыкIи апэрэ шъуашэ зиIэ дипломыр къа­лэжьыгъ Ростов шъолъырым щыщхэу Светлана Терликовам ыкIи Полина Крохалевам, джащ фэдэу Самарскэ шъолъырым щыщэу Мария Глуховам. Нахьыжъхэм Москва шъолъырым щыщ Тала Никитинар къахэщыгъ. Ащ дышъэ медаль ыкIи апэрэ шъуашэ зиIэ диплом къылэжьыгъ.ОсэшIхэм япащэу, Дунэе хьисап олимпиадэм УрысыемкIэ илъэпкъ командэ итренер шъхьаIэу, АКъУ-м хьисап гухэлъхэмкIэ ыкIи технологие егъэджэнымкIэ илабораторие ипащэу Кирилл Суховым къызэриIуагъэмкIэ, мы илъэсым IофшIэнхэр нахь къиныгъэх, олимпиадэм хэлажьэхэрэм яшIэныгъэхэм ахагъэхъо­ным зэхэщакIохэр пылъыгъэх.

Пшъэшъэжъыехэм программэ гъэшIэгъон афызэхащэгъагъ. Мыекъуапэ ичIыпIэ дахэхэр къарагъэплъыхьагъэх, Еутых Асе иордэунэ, хьисап паркым ащагъэх, пшахъокIэ сурэтхэр зэрашIырэр ТIэшъу Мэзагъо къаригъэлъэгъугъ, Жэнэ Заур кавказ йогэм щигъэгъозагъэх, дизайнерэу Татьяна Фроловам IукIагъэх, лекциеу «Девичья история: традиции и современность» зыфиIорэм КIэдэкIое Нэфсэт къафеджагъ ыкIи концерт къафагъэлъэгъуагъ.

ДЕЛЭКЪО Анет.