ФутболымкIэ (8x8) Адыгэ Республикэм ичемпион хъугъэ Красногвардейскэ районым икомандэу «Кавказ-Адэмыер».
Зэнэкъокъум икIэух едзыгъо щызэIукIагъэх «Кавказ-Адэмыемрэ» «Зихимрэ» (Кощхьэблэ район). Шъугу къэдгъэкIыжьын, чемпионатым иешIэгъу пэпчъ такъикъ 25-рэ зырыз хъурэ таймитIу къыдыхэлъытагъ. «Кавказ-Адэмыем» ифутболистхэу Даниил Бруякиным, Тагир Стращенкэм ыкIи Сергей Белозерцевым зэкIэлъыкIоу Iэгоуищ къэлапчъэм дадзагъ, пчъагъэр 3:0 хъугъэ. Ау кощхьаблэхэр къызэкIэкIуагъэхэп, Джыгунэ Арсен тIогъогогъо Iэгуаор къэлапчъэм дидзагъ, пчъагъэр 2:3 ышIыгъ, ау ащ нахьыбэ къадэхъугъэп.
Красногвардейскэ районым илIыкIохэм пэрытныгъэр аубытыгъ. Мыекъопэ районыр къэзыгъэлъэгъорэ «Алиро» ящэнэрэ хъугъэ, ар 3:1-у «Факелым» текIуагъ.
Адыгеим и Суперкубок икъыдэхын фэбэнэщтых «Кавказ-Адэмыер» ыкIи «Алиро». ЕшIэгъур чъэпыогъум и 24-м щыIэщт.