Имыкартэ къызфигъэфедагъ
Джырэблагъэ полицием идежурнэ часть иотделэу Тэхъутэмыкъое районым щыIэм илъэс 55-рэ зыныбжь бзылъфыгъэм зыфигъэзагъ. Ащ зэрариIуагъэмкIэ, банкым икартэу шIокIодыгъэм мызэу, мытIоу ахъщэ рахыгъ. ЗэкIэмкIи зэрарыр сомэ мини 6-м ехъу.
Ахъщэр рахыным лъапсэ фэхъугъэр зэрагъашIэзэ полицием икъулыкъушIэхэм агъэунэфыгъ ащ икартэ къызфагъэфедэзэ ащ илъымкIэ тучаным зэрэщыщэфагъэхэр.
Лажьэ зиIэм икъычIэгъэщын епхыгъэ Iофтхьабзэхэр зэрахьэхэзэ полицием икъулыкъушIэхэм илъэс 49-рэ зыныбжь хъулъфыгъэр къаубытыгъ. Ар ышIагъэм къеуцолIэжьыгъ, картэр къызэригъотыгъэр къариIуагъ, ау ар зием римытыжьэу, тучанхэм ачIахьэзэ мызэу, мытIоу рыщэфагъ.Район полицием иследовательхэм мы хъугъэ-шIагъэмкIэ уголовнэ Iоф къызэIуахыгъ.
Хъулъфыгъэр агъэпцIагъ
Урысыем хэгъэгу кIоцI IофхэмкIэ и Министерствэ иотделэу Мыекъопэ районым щыIэм Краснодар щыщ илъэс 28-рэ зыныбжь хъулъфыгъэм гъэпцIагъэ къыдызэрахьагъэу зыфигъэзагъ. Ащ къызэриIуагъэмкIэ, финанс упчIэжьэгъоу къезыIогъэ кIэлэ ныбжьыкIэм ИнтернетымкIэ нэIуасэ фэхъугъ. Нэужым инэIосакIэ къыриIуагъ онлайн-биржэм зыщитхын ыкIи ахъщэр бизнесым хилъхьан зэрилъэкIыщтыр, а шIыкIэмкIэ федэшхо къызэрэIэкIэхьащтыр.
ГъэпцIакIом къыриIуагъэр хъулъфыгъэм ышIошъ хъуи, ахъщэр зыфиIогъэ реквизитым рилъхьагъ ыкIи компание зэфэшъхьафхэм яакциехэр къыщэфыгъэх. Сомэ миллионым ехъу ахэм захелъхьэ нэуж хъулъфыгъэм къыгурыIуагъ биржэм къыщызэIуихыгъэ исчет зэрэзэфашIыгъэр. «IэпыIэгъу языгъэгъотырэ къулыкъоу» къыраIуагъэм зыкIэупчIэм счетыр къызэIуахыжьыным фэшI сомэ мини 150-рэ ащ ригъэхьан фаеу къычIэкIыгъ. КъызэрэраIуагъэм тетэу хъулъфыгъэр зекIуагъэ нахь мышIэми, иахъщэ къыригъэгъэзэжьышъугъэп. ЗэкIэмкIи миллион 1,3-м ехъу гъэпцIакIохэм къызIэкIагъэхьагъ.
Мы хъугъэ-шIагъэм епхыгъэу Мыекъуапэ иполицие иследовательхэм уголовнэ Iоф къызэIуахыгъ. Мы уахътэм гъэпцIакIом икъычIэгъэщын епхыгъэ Iофтхьабзэхэр зэрахьэх.Iэтахъор къаубытыгъ
Хэгъэгу кIоцI IофхэмкIэ Министерствэм и Къэралыгъо автоинспекциеу Адыгэ Республикэм щыIэм икъулыкъушIэхэм гъогурыкIоным ишапхъэхэр зыукъохэрэм якъыхэгъэщын епхыгъэ Iофтхьабзэхэр ренэу зэхащэх.
Джырэблагъэ Мыекъуапэ игъогу-патруль къулыкъу иIофышIэхэм къулыкъур ахьызэ, гъогум рычъэрэ автомобилэу ВАЗ-р зыгъэIорышIэщтыгъэ Iэтахъор къагъэуцугъ. Рулым Iусыгъэ водителыр агъэунэфынэу зыфежьэхэм, ащ машинэр ыгъэIорышIэнымкIэ фитыныгъэ къезытырэ тхьапэр имыIэу къычIэкIыгъ.
Гъогу-патруль къулыкъум иIофышIэхэм Iэтахъом янэ къыращэлIагъ. Зыныбжь имыкъугъэм административнэ протокол фызэхагъэуцуагъ, автомобилыр Iахи, хэушъхьафыкIыгъэ уцупIэм дагъэуцуагъ.
АР-м хэгъэгу кIоцI IофхэмкIэ и Министерствэ зыныбжь имыкъугъэхэм янэ-ятэхэм зафегъазэ правэр ямыIэу ахэр машинэм кIэрамыгъэтIысхьанхэу. Джащ фэдэу агу къегъэкIыжьы якIалэхэм ямызакъоу ежьхэми административнэ ыкIи уголовнэ пшъэдэкIыжьхэр зэрарагъэхьыщтхэр.
БзэджэшIагъэ къыжъудызэрахьагъэмэ, полицием зызэрэфэбгъэзэн плъэкIыщытыр
Шъуифитыныгъэхэр аукъуагъэу шъолъытэмэ, псынкIэу полицием макъэ ежъугъэIу. БзэджэшIагъэ къыбдызэрахьагъэу щытмэ, сыд фэдэрэ уахъти АР-м хэгъэгу кIоцI IофхэмкIэ и Министерствэ е къулыкъум ичIыпIэ отделхэм лъэIу тхылъкIэ зафэбгъэзэн плъэкIыщт е телефон номерэу 02-м (мобильнэ номерэу 102-м) шъутеон шъулъэкIыщт.
Охътабэ тешъумыгъашIэу полицием макъэ ежъугъэIумэ бзэджашIэр нахь псынкIэу къаубытын алъэкIыщт. ШъулъэкъуацIэ, шъуцIэ, шъуятацIэ ыкIи шъузщыпсэурэ чIыпIэр яшъуIу. Хъугъэ-шIагъэр зыщыхъугъэ чIыпIэм шъуIумыкIыжьэу полицием икъулыкъушIэхэм шъуяж. ИгъэкIотыгъэу ыкIи шъыпкъагъэ хэлъэу зэкIэ къышъущышIыгъэр ахэм къафэшъуIуат. Зыщышъумыгъэгъупш, лажьэ зырахыгъэм полицием макъэ зыримыгъэIукIэ, бзэджашIэм пшъэдэкIыжь ымыхьэу хэтыщт.Хэбзэукъоныгъэ зезыхьагъэм итеплъэ, ищыгъын, ицуакъэ зыфэдэм (жакIэ, пакIэ тетмэ, ыкIышъо сурэт хэутыгъэ тешIыхьагъэмэ) шъунаIэ тешъудз. БзэджэшIагъэр зылъэгъугъэм шъуелъэIуи, полициер къэкIофэ IушъумыгъэкIыжь. Яжэн ымылъэкIыщтмэ, ителефон номер, зыщыпсэурэ чIыпIэр къежъугъаIу.
Тхыгъэ е жэрыIо шIыкIэм тетэу дежурнэ частым зыфэжъугъэзэн шъулъэкIыщт. Ар къулыкъушIэхэм атхыщт ыкIи талон къышъуфыратхыкIыщт. Нэужым хъугъэ-шIагъэм епхыгъэу упчIэхэр къышъуатыщтых.
Ащ нэмыкIэу общественнэ рэхьатныгъэм икъэухъумэнкIэ полицием иучастковэ пунктэу къышъупэгъунэгъум зыфэжъугъэзэн шъулъэкIыщт.
БзэджэшIагъэ е хъугъэ-шIагъэ горэм шъурихьылIагъэмэ Адыгэ Республикэм хэгъэгу кIоцI IофхэмкIэ и Министерствэ макъэ ежъугъэIунэу зыкъышъуфегъазэ. Ар шIыкIэ зэфэшъхьафхэмкIэ пшIын плъэкIыщт.
Тхьапэм тептхэрэм итын фаер:
- ЦIыфым ытхыгъэр къэзыгъэшъыпкъэжьырэ документхэр.Зыгъэхьазырыгъэр КIАРЭ Фатим.
- Хэгъэгу кIоцI IофхэмкIэ къулыкъоу е ащ Iоф щызышIэу зызыфэбгъазэрэм ыцI, IэнатIэу ыIыгъыр.
- Зафэзыгъазэрэм ылъэкъуацI, ыцI, ятэ ыцI.
- Джэуапыр зыдагъэхьыжьыщт адресыр.
- Ежь ышъхьэкIэ зэрэкIэтхэжьыгъэр ыкIи мафэу зитхыгъэр.