АР-м и ЛIышъхьэ ипресс-къулыкъу
Мыекъуапэ щагъэпсырэ унакIэхэм ащыщым ишIын зэрэкIорэм Адыгеим и ЛIышъхьэу КъумпIыл Мурат зыщигъэгъозагъ.
ЧIыпIэхэм хэхъоныгъэ ягъэшIыгъэнымкIэ программэм къыдыхэлъытагъэу аэропортыр зыдэщытыгъэм проектыр щагъэцакIэ. Джырэ уахътэм диштэрэ псэупIэхэу социальнэ, транспорт ыкIи инженер инфраструктурэу ящыкIэгъэщтыр зэкIэ ахэтынэу ащ къыделъытэ.
Республикэм и ЛIышъхьэ псэолъэшIыпIэм зыщэIэм компаниеу а Iофым фэгъэзэгъэщтым илIыкIохэм гущыIэгъу афэхъугъ, проектым илъэныкъо шъхьаIэхэм, тапэкIэ а чIыпIэм хэхъоныгъэ зэришIыщтым, зэрэзэтырагъэпсыхьащтым япхыгъэ Iофыгъохэм анэсыгъэх.
ЗэдэгущыIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ПсэолъэшI компаниеу НВМ»-р зие Темур Намоевыр.
Проектым иинвесторыр «Стройпаркыр» ары, чIыпIэхэм хэхъоныгъэ ягъэшIыгъэнымкIэ проекти 2-мэ ягъэцэкIэн ар фэгъэзагъ. Зыр гектар 14,3-рэ мэхъу, КъумпIыл Мурат зыдэщыIэгъэ чIыпIэр — гектар 26,5-рэ. Фэтэрыбэу зэхэт унэ 30-у а чIыпIэм щагъэпсыщтым квадрат метрэ мин 280-м ехъу ыубытыщт. Социальнэ псэуалъэхэри ащ щашIыщтых: IэзапIэр, нэбгырэ 1100-м телъытэгъэ еджапIэр, кIэлэцIыкIу IыгъыпIэр, пшъэрылъыбэ зэшIозыхыщт гупчэр, чылысыр, мэщытыр. Сабыибэ зэрыс унагъохэм къафыхагъэкIыгъэгъэ чIыгу Iахьхэм апае инженер инфраструктурэри агъэпсыщт.ПсэупIакIэр Мыекъуапэ игупчэ саугъэт зэхэтым пэблэгъэщт. КъумпIыл Мурат къыхигъэщыгъ «ЕгъэшIэрэ машIом» къыпэIулъ чIыпIэри ащ зэрэхэтэу, лъэшэу анаIэ тырагъэтызэ IофшIэнхэр агъэцэкIэнхэ зэрэфаер.
«А чIыпIэм лъэшэу тынаIэ тетэу IофшIэнхэр щызэшIотхын фае. «ЕгъэшIэрэ машIор» — шIэжьым ичIыпI. Арышъ, къалэмрэ республикэмрэкIэ саугъэт зэхэтым мэхьанэшхо зэриIэм тыкъыпкъырыкIызэ, ащ къыпэIулъ чIыпIэм изэтегъэпсыхьанкIэ ищыкIагъэр зэкIэ дэгъоу дгъэцэкIэн фае», — къыхигъэщыгъ КъумпIыл Мурат.
Адыгеим и ЛIышъхьэ зэрэхигъэунэфыкIыгъэмкIэ, проектым изы Iахьышхоу хъун фае щагухэмрэ ахэм къапэIулъ чIыпIэхэмрэ чъыгхэр ыкIи къэгъагъэхэр ащыгъэтIысхьэгъэнхэр, транспортыр Iэрыфэгъоу щытыныр, цIыфхэр зычIэсыщтхэ унэхэм архитектурнэ теплъэ дахэ яIэныр.
«Тэ типшъэрылъыр — унакIэхэр тшIын закъор арэп, цIыфхэмкIэ гупсэфэу щытыщт къэлэ щыIакIэ ядгъэгъотыныр ары. Ащ пае псэолъэшIыным илъэхъан зэкIэ лъэныкъохэр къыдэлъытэгъэнхэ фае, чIыпIакIэр цIыфхэмкIэ Iэрыфэгъу хъуным анаIэ тырамыгъэт хъущтэп», — къыIуагъ Адыгеим и ЛIышъхьэ.
Республикэм ипащэ къызэрэхигъэщыгъэмкIэ, Адыгеим къэлэгъэпсынымкIэ иполитикэ илъэныкъо шъхьаIэхэм зыкIэ ащыщ чIыпIэхэм хэхъоныгъэ ягъэшIыгъэныр. Ащ фэдэ екIолIакIэм амал къеты а зы уахътэм гъогухэр, инженер ыкIи социальнэ инфраструктурэр шIыгъэнхэр, общественнэ чIыпIэхэр зэтегъэпсыхьэгъэнхэр.
Республикэм джырэ инфраструктурэр къызщыдэлъытэгъэ кварталыкIэхэр щыгъэпсыгъэнхэм епхыгъэ IофшIэнхэр щызэшIуахыгъэх ыкIи ахэр лъагъэкIуатэх. А лъэныкъом епхыгъэу зэзэгъыныгъэ 16 республикэм щызэдашIыгъ, ащ амал къытыщт 2035-рэ илъэсым нэс цIыфхэр зычIэсыщтхэ унэ квадрат миллиони
3,8-м ехъу атIупщынэу. Мыекъуапэ ащ фэдэ проекти 8 щагъэцакIэ, Тэхъутэмыкъое районым — 7, Адыгэкъалэ — 1.
АР-м псэолъэшIынымкIэ и Министерствэ къызэритыгъэмкIэ, зы нэбгырэм квадрат метрэ 1,2-рэ тефэ. 2025-рэ илъэсым цIыфхэр зычIэсыщтхэ унэу республикэм щашIыгъэр квадрат метрэ мин 600,90-рэ мэхъу. Мы илъэсми ащ къыкIырамыгъэчынэу ары.
Адыгеим и ЛIышъхьэ къызэрэхигъэщыгъэмкIэ, цIыфхэр зычIэсыщт унэхэм яшIын экономическэ мэхьэнэ закъоп иIэр, социальнэ мэхьанэшхо ащ иI, сыда пIомэ цIыф куп зэфэшъхьафхэм: кIэлэцIыкIу ибэхэм, сабыибэ зэрыс ыкIи унэгъо ныбжьыкIэхэм псэупIэм ылъэныкъокIэ пшъэрылъхэр зэшIохыгъэнхэм иамал къеты.
ПсэолъэшIыпIэу зыдэщыIагъэм къыщаIэтыгъэ Iофыгъохэм ялъытыгъэу АР-м и ЛIышъхьэ пшъэрылъ гъэнэфагъэхэр афишIыгъ.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет, ЛIышэ Саныет.