А. Гусев
Зэхэпхъэгъэ бэнэн лъэпкъхэмкIэ профессиональнэ турнирэу «Файт Найтс 142» зыфиIорэр апэрэу республикэм икъэлэ шъхьаIэ дэт Адыгэ къэралыгъо университетым и Ордэунэу Кобл Якъубэ ыцIэ зыхьырэм щыкIуагъ. Спорт мэхьанэшхо зиIэ Iофтхьабзэм къекIолIагъ Адыгэ Республикэм и ЛIышъхьэу КъумпIыл Мурат.
Зэнэкъокъум ММА-м испортсмен анахь лъэшхэу 22-рэ хэлэжьагъ. Ахэм ахэтыгъэх Адыгеим илIыкIохэу ЕлъэшIыIэ Инал, Джарымэ Айдэмыркъан, Сихъу Казбек, Батмэн Амир ыкIи Лъэустэнджэл Амир.
ЗэIукIэгъу шъхьаIэр:Тагировыр — Гасановыр
Гран-прим ифиналныкъо щызэIукIагъэх Убайдула Тагировымрэ Ахмад Гасановымрэ. Едзыгъуищым изэфэхьысыжьхэмкIэ Тагировым текIоныгъэр къыдихыгъ. Ащ кIэух уцугъом зыщиушэтын ыкIи ахъщэ шIухьафтын шъхьаIэр къыдихыным фэбэнэн амал иIэ хъугъэ.
Мыщ ыуж Роман Силагадзерэ Арыпш Замиррэ зэIукIагъэх. Судьяхэм къызэралъытагъэмкIэ, Арыпшым очко нахьыбэ ригъэкъугъ ыкIи текIоныгъэр фагъэшъошагъ. IэпэIэсэныгъэшхо зыIэкIэлъ Евгений Игнатьевыр Багашар Кораласовым нахь лъэшыгъ.
Адыгеим ибэнакIохэми тагъэгушIуагъ. Джарымэ Айдэмыркъан техническэ нокауткIэ Виктор Ромеро текIуагъ. ЕлъэшIыIэ Инал Гамид Казахмедовым нахь лъэшыгъ. Ухьазырыныгъэ дэгъу къагъэлъэгъуагъ ыкIи апэрэ раундым текIоныгъэхэр къыщыдахыгъэх Батмэн Амиррэ Сихъу Казбекрэ. Ахэр Богдан Кишманрэ Сергей Толмачевымрэ анахь лъэшыгъэх.