АвтобусыкIэхэр аратыгъэх

АР-м и ЛIышъхьэу КъумпIыл Мурат хэлажьэзэ, еджапIэхэм апае автобусыкIэ 14-мэ яIункIыбзэхэр яты­жьыгъэнхэм фэгъэхьыгъэ Iофтхьабзэр концерт Унэу «Налмэсым» дэжь щыкIуагъ.

КIэлэцIыкIу IыгъыпIэхэм яIофышIэхэм, гурыт сэнэхьат гъэсэныгъэ, гъэсэныгъэ тедзэ языгъэгъотыхэрэм, кIэлэегъаджэм ямафэхэм афэгъэхьыгъэ мэфэкI Iоф­тхьабзэу республикэм щыкIохэрэр ащкIэ къызэIуахыгъэх. А Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, рес­публикэм гъэсэныгъэмрэ шIэныгъэмрэкIэ иминистрэу Евгений Лебедевыр.

КъумпIыл Мурат къызэрэхигъэщы­гъэмкIэ, хабзэ хъугъэ республикэм иеджапIэхэм яавтопарк гъэкIэжьыгъэныр. Урысыем и Правительствэ иунашъокIэ автотранспортыр республикэм къыIэкIэхьэ. Федеральнэ гупчэм иIэпыIэгъу ишIуагъэкIэ еджапIэхэм яавтобусхэр зэкIэ агъэкIэжьыгъэх. Ахэр джырэ шапхъэхэм адештэх, видеокамерэхэмкIэ, ГЛОНАСС-м исистемэкIэ зэтегъэпсыхьагъэх. Непэ къаIэкIэхьэгъэ автобусхэр зэкIэ тихэгъэгу къыщыдагъэкIыгъэх: нэбгырэ 16-м къыще­гъэжьагъэу 31-м нэс ахэм арыфэщт. ПстэумкIи атефагъэр сомэ миллион 28,8-рэ.

Адыгеим и ЛIышъхьэ автобусыкIэхэр къыплъыхьагъэх ыкIи АР-м гъэсэны­гъэм­рэ шIэныгъэмрэкIэ иминистрэ игъу­сэу кIэлэцIыкIухэр щынэгъончъэу еджапIэм нэгъэсыгъэнхэм, ядэжь щэжьыгъэн­хэм, цIыфхэр жъугъэу зыхэлэжьэхэрэ Iоф­тхьабзэхэм кIэлэеджакIохэр ящэлIэгъэн­хэм япхыгъэ Iофыгъохэм атегущы­Iагъэх.

«КIэлэцIыкIухэм ящынэгъончъагъэ ренэу тынаIэ тетэгъэты. ЕджапIэхэм яавтопарк игъэ­кIэ­жьын Адыгеим икIэлэеджа­кIо­хэм щынэгъончъэ, Iэрыфэгъу амалхэр ягъэгъотыгъэнхэмкIэ IофшIэнэу зэшIотхырэм изы Iахь. Непэ муниципалитетхэм кIэу автобус 14 ятэты, респуб­ликэмкIэ ахэм япчъагъэ 142-м нэсыгъ. ТехникакIэр цыхьэшIэ­гъоу кIэлэцIыкIухэм, кIэлэегъа­джэхэм ыкIи ны-тыхэм зэрафэлэжьэщтым сицыхьэ телъ», — къыхигъэщыгъ КъумпIыл Мурат.

АвтобусыкIэхэр къалэу Мыекъуапэ, псэупIэхэу Новэм, ХьакIэмзые, Абдзэ­хэхьаблэ, Дахъо, Кужорскэм, Каменномостскэм, Суповскэм, Новый Сад, Нэшъукъуае, Къунчыкъохьаблэ, Нэчэ­рэзые аIэкIагъэхьащтых. Джащ фэдэу еджэпIэ-интернатэу зипсауныгъэкIэ пыч зиIэ кIэлэцIыкIухэр зычIэсхэм автобусыкIэ ратыщт. ТехникакIэр кIэлэеджа­кIохэм язещэнкIэ агъэфедэщт. Мыщ дэжьым АР-м и ЛIышъхьэ анахьэу анаIэ зытыраригъэдзагъэр щынэгъончъэным ишапхъэхэр амыукъонхэр, гъогур зэ­рэгъэтхъыгъэр гъэкIэжьыгъэныр, техни­кэм ылъэныкъокIэ транспортым изытет лъыплъэнхэр ары.

АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.