А. Балабась
ФутболымкIэ Адыгэ Республикэм ичемпионат ифиналныкъо ихьагъэхэр къэнэфагъэх.
Командэ пэпчъ ешIапIэм футболисти 8 къыригъахьэрэр. Зэнэкъокъур блэкIыгъэ тхьамафэм рагъэжьагъ. Ащ текIоныгъэ къыщыдэзыхырэр футболымкIэ Урысыем ичемпиона-тэу шэкIогъум Шъачэ щыкIощтым хэлэжьэн ылъэкIыщт.
Апэрэ едзыгъом командэхэр купитIоу гощыгъагъэх. Апэрэм текIоныгъэ къыщыдихыгъ Кощхьэблэ районыр къэзыгъэлъэгъорэ «Зихим». Мыщ ешIэгъуищ иIагъ, зэкIэми ащытекIуагъ. ЯтIонэрэ хъугъэ командэу «Факелыр». Джащ фэдэу купэу «Б-м» икомандэ анахь лъэшхэр къэнэфагъэх: «Кавказ-Адэмый» (Красногвардейскэ район) ыкIи «Алиро» (Мыекъопэ район). Мы командэхэм очко пчъагъэу рагъэкъугъэр зэфэдиз, ау Красногвардейскэ районым икуп къэгъэлъэгъон тедзэхэмкIэ ыпэ ишъыгъ.
Финалныкъом къыдыхэлъытэгъэ зэIукIэгъухэр стадионэу «Юностым» щыкIощтых. «Зихи» ыкIи «Алиро», нэужым «Кавказ-Адэмый» ыкIи «Факел» зэдешIэщтых.