Грант IэпыIэгъум ишIуагъэкIэ

Мысатыу организациехэу социальнэ Iофтхьабзэхэр зезыхьэхэрэм грант IэпыIэгъоу арагъэгъотырэм ишIуагъэкIэ мэхьанэ зиIэ общественнэ проектхэр нахьыбэу Адыгэ Республикэм щыпхыращыхэ хъугъэ.

«Театр путешествий. По следам древних цивилизаций» зышъхьэ гастрольнэ проектым «Театр у трех дорог» зыфиIорэр икIэщакIу. Республикэ грантхэмрэ IофшIэнымрэ социальнэ хэхъоныгъэмрэкIэ Министерствэмрэ яIэпыIэгъукIэ илъэсым ыкIэм нэс тишъолъыр щыпсэухэрэм ыпкIэ хэмылъэу спектаклэ зэфэшъхьафхэр къафагъэлъэгъощт.

Режиссерэу, актерэу Сергей Переверткиным ижъырэ лъэпкъэу майя зыфаIорэм ищыIакIэ зыфэдагъэр, Iэпэ­рытхэу къакIэныгъэхэр зыгъэунэфыгъэ шIэныгъэлэжьым фэгъэхьыгъэ спектаклэр ыгъэуцугъ. Сценариер зэритхыгъэм имызакъоу, къэгъэлъэгъоным хэлэ­жьагъ.

— Майянскэ культурэр тшIогъэшIэ­гъон хъугъэу нахь куоу тылъыхъозэ, шIэныгъэлэжьэу Юрий Морозовым иIофшIэнхэм таIукIагъ. Ащ лъэпкъым итарихъ къызэригъэзэфагъ. Я 16-рэ лIэшIэгъум щыIэгъэ лъэпкъым ишэн-хабзэхэр хьа­лэмэтэу къычIэкIыгъ, сшIогъэшIэгъонэу ащ техыгъэ сценарий стхыгъэ, — еIо режиссерым.

Театрэм къыщагъэлъэгъорэ спектаклэхэр зэкIэ яунаех, ежьхэм атхых ыкIи агъэуцу. ГущыIэм пае, зы актерым роль зытIущ къышIын ылъэкIыщт.

— Нэбгырэ 50 нахь зычIэмыс къэгъэлъэгъоным хэушъхьафыкIыгъэ атмосферэ иI. ЗэдэгущыIэгъу ахэм адытиIэм фэд, — еIо театрэм иактрисэу Леся Белаям.

ЫпкIэ хэмылъэу театрэм щагъэуцугъэ спектаклэ хьалэмэтхэр республикэм щыпсэухэрэм зэралъэгъущтым имыза­къоу Федеральнэ грантэу мин 720-м ехъурэм ишIуагъэкIэ театрэм иактерхэм гастроль 16 фэдиз зэхащэщт. Ящэнэрэу мыщ фэдэ проектхэр театрэм егъэцакIэх, культурнэ ыкIи лъэпкъ зыкIыныгъэм дэлажьэх.

— Театрэр — щыIэныгъэм игъундж. Мыщ фэдэ проектхэм яшIуагъэкIэ къыт­кIэхъухьэрэ ныбжьыкIэхэм лIэшIэгъу чыжьэхэм ащыпсэущтыгъэ лъэпкъ зэфэшъхьафхэм нэIуасэ афэтэшIых. Лъэшэу тигуапэу къутырэу Садовэм ящэнэрэу теблэгъэщт. Къутыр цIыкIум щыщ нэбгырэ 20 ныIэп къэгъэлъэгъоным къекIуа­лIэрэр, — къыIуагъ «Театр у трех дорог» зыфиIорэм ипащэу Елена Денисовам.

КъекIолIагъэхэр зэкIэ фэбагъэ зы­хэлъ къэгъэлъэгъоным зэрипхыгъэх, «Театр у трех дорог» зыфиIорэм иартист ныбжьыкIэхэм цIыфхэр лъэпкъыжъым идунай хьалэмэт хащагъэх, шъошэ лъа­гэм илъэу спектаклэр агъэуцугъ.

Социальнэ проектым къыдыхэлъытагъэу тыгъэгъазэм нэс къекIокIырэ къэгъэлъэгъонхэр тишъолъыр ичIыпIэ зэфэшъхьафхэм къащатыщтых. Проектым игъэцэкIэн дакIоу спектаклыкIэхэм ягъэ­уцун дэлажьэх.

НэкIубгъор зыгъэхьазырыгъэр Лъэпшъыкъо Фатим.