АР-м и ЛIышъхьэ ипресс-къулыкъу
Щынэгъончъэ ыкIи зэтегъэпсыхьэгъэ гъогухэм яшIын республикэм щылъагъэкIуатэ. АР-м ГъогухэмкIэ ифондрэ лъэпкъ проектэу «ЩыIэныгъэм пае инфраструктурэр» зыфиIорэмрэ ащкIэ IэпыIэгъушIух.
Федеральнэ гупчэр республикэм IэпыIэгъу къыфэхъузэ гъогухэмкIэ ГъэIорышIапIэу «Черноморье» зыфиIорэр зыхэлэжьэрэ проект инхэр шъолъырым щагъэцакIэх. АР-м и ЛIышъхьэу КъумпIыл Мурат ахэм ынаIэ атет. Ахэм ащыщ автомобиль гъогоу «А-160-рэ Мыекъуапэ-Бжэдыгъухьабл-Адыгэкъал-Лэбапэ-Кореновск» зыфиIорэр игъэкIотыгъэу агъэцэкIэжьы. А гъогу Iахьыр Красногвардейскэ районым щыпхырэкIы.
— ГъогурыкIоным пэрыохъу фэмыхъухэу гъэцэкIэжьын IофшIэнхэр джыдэдэм мыщ щызэшIуахых. Гъогум рыкIохэрэми ащ гу къылъатэ. Ащ телъ асфальтыр, инженернэ коммуникациехэр зэрэзэблахъухэрэм имызакъоу, гъогур нахь шъуамбгъоу, сатыриплIкIэ зэтеутыгъэу ашIы. Адыге-им пхырыкIырэ гъогоу А-160-м къыхиубытэрэ километрищыр ары сатыриплIэу ашIырэр.Ащ нэмыкIэу Шъхьэгуащэ телъ лъэмыджыри сатыриплIкIэ урыкIошъунэу агъэпсыщт. Джырэ уахътэм диштэрэ шапхъэхэм атетэу гъогур зэтырагъэпсыхьащт. Автомобильхэм къапыIукIырэ мэкъэшхом уащызыухъумэщт экранхэр, нэфрыгъуазэхэр гъогухэм къатырагъэуцощтых. Общественнэ транспортым иуцупIэхэр, лъэсрыкIуапIэхэр зэтырагъэпсыхьащтых. 2027-рэ илъэсым ыкIэм нэс гъогур къызэIуахыжьыщт.Джащ фэдэу мы илъэсым ыкIэм нэс Мыекъуапэ иурамэу Хьахъуратэм ыцIэ зыхьырэм игъэцэкIэжьын аухынэу пшъэрылъ афэсшIыгъ. Къалэм пхырыкIырэ гъогу шъхьаIэмэ ащыщым изытет ащ блэбгъэкIыжьы мыхъунэу слъытагъэ. Унашъоу сшIыгъэм елъытыгъэу игъэкIотыгъэ IофшIэнхэр макIох. Гъогум изытет нахь зыщыдэй чIыпIэхэр агъэцэкIэжьых, ар километри 2,2-рэ зэрэхъурэр. Республикэм ГъогухэмкIэ ифонд къикIэу сомэ миллиони 145-рэ пэIуагъэхьагъ.Ощхыпс дэчъыпIэхэр, лъэсрыкIуапIэхэр дгъэцэкIэжьынхэуи тэгъэнафэ. Ащ текIодэщт мылъкум икъэкIуапIэхэм тягупшысэ. НэмыкI гъогухэми тынаIэ атет. Федеральнэ IэпыIэгъум ишIуагъэкIэ, цIыфхэм щынэгъончъэу ыкIи Iэрыфэгъоу агъэфедэшъущт ыкIи зекIохэр къушъхьэхэм языщэлIэшъущт гъогухэм яшIын лъытэгъэкIуатэ, — къыщитхыгъ ихъытыу нэкIубгъо АР-м и ЛIышъхьэу КъумпIыл Мурат.