А. Гусев
Тыгъуасэ концерт Унэу «Налмэсым» щыкIуагъ АР-р зызэхащагъэр илъэс 36-рэ зэрэхъурэм фэгъэхьыгъэ мэфэкI зэхахьэ. Iофтхьабзэм хэлэжьагъэх илъэс зэфэшъхьафхэм шъолъырым апшъэрэ IэнатIэ щызыIыгъыгъэхэр, хэбзэухъумэкIо къулыкъухэм ыкIи федеральнэ министерствэхэмрэ ведомствэхэмрэ ячIыпIэ къулыкъухэм япащэхэр, АР-м иминистрэхэм я Кабинет хэтхэр, АР-м и Къэралыгъо Совет — Хасэм идепутатхэр, общественнэ IофышIэхэр, лэжьакIохэм ыкIи ветеран организациехэм, ныбжьыкIэхэм ялIыкIохэр. Адыгеим и ЛIышъхьэу КъумпIыл Мурат къэзэрэугъо-игъэхэм афэгушIонэу ащ къекIолIагъ.
Республикэм и ЛIышъхьэ ипсалъэ агу къыщигъэкIыжьыгъ хэдзынхэу рекIокIыгъэхэр, УФ-м и Президентэу Владимир Путинымрэ партиеу «Единэ Россиемрэ» пхыращырэ Iофыгъохэм Адыгеим щыпсэухэрэм зэрадырагъэштагъэр. КъумпIыл Мурат къыхигъэщыгъ Урысыем щыпсэурэ лъэпкъхэм языкIыныгъэ и Илъэсэу Президентым ыгъэнэфагъэм цIыфхэм язэдегъэштэныгъэ итамыгъэу зэрэхъугъэр. АР-м и ЛIышъхьэ къыкIигъэтхъыгъ Урысыемрэ Адыгеимрэ яхэхъоныгъэ ылъапсэу а зыкIыныгъэр зэрэщытыгъэр ыкIи непи къызэрэнэжьырэр. Республикэм иуцун ылъапсэ щытыгъэхэм ыкIи непэ шъолъырым хэхъоныгъэ ышIыным зиIахь хэзышIыхьэхэрэм зэрафэразэр ащ къыхигъэщыгъ.
Лъэныкъо зэфэшъхьафхэмкIэ зэхъокIыныгъэу псэупIэхэр зэкIэ къызэлъызыубытхэрэм афэгъэхьыгъэу КъумпIыл Мурат къыIотагъ. Илъэс къэс амбулаториякIэхэр, фельдшер-мамыку IэзапIэхэр къызэIуахых, еджапIэхэр, кIэлэцIыкIу IыгъыпIэхэр, культурэм иунэхэр, музейхэр ыкIи тхъылъеджапIэхэр, спорт псэуалъэхэр агъэпсых ыкIи агъэкIэжьых. УщыпсэунымкIэ Iэрыфэгъоу щыт унэхэу цIыфхэр зычIэсыщтхэр республикэм къетаджэх, гъогухэр, коммунальнэ хъытыухэр, цIыфхэм якIопIэ чIыпIэхэр зэтырагъэпсыхьэх. Адыгеим зыпкъитыныгъэ хэлъэу экономикэм хэхъоныгъэ щешIы: инвестициехэр нахьыбэ мэхъух, стратегическэ мэхьанэшхо зиIэ инвестпроектхэр лъэныкъо шъхьаIэхэм япхыгъэу зэхагъэуцох, бюджетым ежь ихахъохэри нахьыбэ мэхъух.
Адыгеим хэхъоныгъэ зэришIырэм дакIоу ынаIэ зытыригъэтырэ Херсон хэкум щыпсэухэрэми ящыIакIэ нахьышIу хъунымкIэ IэпыIэгъу фэхъу. ЦIыфхэр ежьхэм яшIоигъоныгъэкIэ зыхэлэжьэхэрэ проектхэм апае Адыгеим и ЛIышъхьэ гуфакIохэм, предпринимательхэм, общественнэ организациехэм зэрафэразэр къыIуагъ. ХэушъхьафыкIыгъэ дзэ операцием иветеранхэмрэ ащ хэлажьэхэрэмрэ шъхьафэу рэзэныгъэ гущыIэхэр афигъэшъошагъ. Республикэм и ЛIышъхьэ къызэрэхигъэщыгъэмкIэ, лIыхъужъхэм ацIэхэр егъэшIэрэу Адыгеим итарихъ хэхьагъэх.
«Тарихъыр зышIыхэрэр цIыфхэр ары: Iофэу агъэцакIэрэмкIэ, ячIыгу гупсэ шIулъэгъоу фыряIэмкIэ, ар къаухъумэным ренэу зэрэфэхьазырхэмкIэ. КIэлэегъаджэхэм, врачхэм, псэолъэшIхэм, мэкъумэщышIэхэм, экономистхэм ыкIи юристхэм — хэти ежь иIофшIэпIэ чIыпIэ Iофэу щигъэцакIэрэр зэкIэми зэдыряIофэу щыт. А IофшIэнышхом епхыгъ Адыгеим инепэрэ ыкIи инеущырэ мафэхэр зыфэдэщтхэр. Гуетыныгъэ хэлъэу Iоф зышIэрэ нэбгырэ пэпчъ сызэрэфэразэр къэсэIо. Анахьэу рэзэныгъэ гущыIэхэр зыфэзгъазэхэрэр тиветеранхэр, тинахьыжъхэр ары. Республикэм иуцунрэ ихэхъоныгъэрэ шъо шъукIуачIэ хэшъулъхьагъ, непэ тызэкъотыным ыкIи ти ЧIыгу гупсэ къырыкIощтым тыфэгумэкIыным тыфэшъогъасэ», — къыIуагъ КъумпIыл Мурат.
ЗэкIэми акIуачIэ зэхэлъымэ, пшъэрылъэу республикэм ыпашъхьэ итхэр шIокI имыIэу зэшIохыгъэ зэрэхъущтхэм ицыхьэ зэрэтелъыр Адыгеим и ЛIышъхьэ къыхигъэщыгъ. ИкIэухым КъумпIыл Мурат республикэм и Мафэ фэшI джыри зэ къафэгушIуагъ, Мыекъуапэ щыпсэухэрэми – къалэм и Мафэ фэшI, ари чъэпыогъум и 5-м хагъэунэфыкIы.
Ащ нэужым АР-м и Къэралыгъо Совет — Хасэм и Тхьаматэу Владимир Нарожнэр республикэм щыпсэухэрэм мэфэкIымкIэ къафэгушIуагъ. ИкIэухым Адыгеим искусствэхэмкIэ иIэпэIасэхэм ыкIи итворческэ купхэм къагъэхьазырыгъэ къэгъэлъэгъонхэм мэфэкIыр лъагъэкIотагъ.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.