А. Гусев
Урысыемрэ Адыгеимрэ якъэралыгъо тынхэр защаратыжьыгъэ Iофтхьабзэ концерт Унэу «Налмэсым» щыкIуагъ. АР-м и ЛIышъхьэу КъумпIыл Мурат ар зэрищагъ. Залым чIэсыгъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр.
Iофтхьабзэм хэлажьэхэрэм шIуфэс къарихи, республикэм ипащэ зэрэхигъэунэфыкIыгъэмкIэ, мы аужырэ илъэсхэм Адыгеим бэ щызэшIуахыгъэр: экономикэмрэ социальнэ лъэныкъомрэ язэтегъэпсыхьан лъагъэкIуатэ, лъэныкъо шъхьаIэхэмкIэ мэхьанэшхо зиIэ проектхэр пхыращых, цIыфхэм ящыIакIэ нахьышIу зышIыщт пшъэрылъхэр чэзыу- чэзыоу зэшIуахых.
«Шъощ фэдэ специалист дэгъухэр — проектхэр зэхэзыгъэуцохэрэр, псэолъэшIыным фэгъэзагъэхэр, цIыфхэм яIазэхэрэр, кIэлэцIыкIухэр езыгъаджэхэрэр, предприятиехэм е губгъохэм ащылажьэхэрэр ары ащ фэдэ гъэхъагъэхэм къафэкIуагъэхэр. Тэ зэкIэми тызэгъусэу ти Адыгей гупсэрэ Урысыемрэ нахь зэтегъэпсыхьагъэ, нахь лъэш хъунхэм тыдэлажьэ. Ау мы Iофым анахьэу зиIахьышхо хэзышIыхьэхэрэр тидзэкIолIхэу хэушъхьафыкIыгъэ дзэ операциер зыщыкIорэ чIыпIэм Хэгъэгум ифедэ къыщызыгъэгъунэхэрэр ары. ДзэкIолI пэпчъ ипшъэрылъ еIолIэнчъэу егъэцакIэ, Хэгъэгум ишъхьафитыныгъэ псэемыблэжьэу къеухъумэ», — къыIуагъ КъумпIыл Мурат.
Республикэм и ЛIышъхьэ зэрэхигъэунэфыкIыгъэмкIэ, лIыхъужъныгъэшхо зезыхьэгъэ тидзэкIолIыбэмэ тын лъапIэхэр къафагъэшъошагъэх.
Къэралыгъо, муниципальнэ къулыкъум иIофышIэхэм къатегущыIэзэ, къэралыгъо пшъэрылъхэр шIуагъэ къытэу агъэцэкIэнхэмкIэ, псэуалъэхэм ягъэпсынкIэ, гурыт еджапIэхэм, сымэджэщхэм, культурэмрэ спортымрэ яучреждениехэм тэрэзэу Iоф ашIэнымкIэ ахэм бэ зэрялъытыгъэр республикэм ипащэ агу къыгъэкIыжьыгъ.
ТапэкIэ гъэхъагъэу ашIыщтхэм лъапсэ афэзышIырэр кIэлэегъаджэхэр ары. ШIэныгъэ кIэлэцIыкIухэм зэрарагъэгъотырэм дакIоу IофшIэным аIэ екIунэу, тэрэзэу гупшысэнхэу ахэр агъасэх. ШIэныгъэмрэ экономикэмрэ тапэкIэ хэхъоныгъэ языгъэшIыщт ныбжьыкIэхэр зыпIухэрэр кIэлэегъаджэхэр ары.
«ТикIэлэегъэджэ, гъэсэкIо зэчыишIухэм «тхьашъуегъэпсэу» ясэIо щэIагъэрэ шIулъэгъурэ кIэлэцIыкIухэм зэрафыряIэм фэшI. Амалэу сиIэр къызфэзгъэфедэзэ, непэ тынхэр зэратыжьыщт кIэлэегъаджэхэми, республикэм ис кIэлэегъэджэ пстэуми ямэфэкIэу къэблагъэрэмкIэ сафэгушIо сшIоигъу. Псауныгъэ пытэ шъуиIэнэу, шъукIуачIэ къыкIимычынэу, кIэлэеджакIохэр къышъуфэрэзэнхэу сышъуфэлъаIо!» — къыIуагъ АР-м и ЛIышъхьэ.
Джащ фэдэу социальнэ лъэныкъом щылажьэхэрэми, общественникхэми, цIыфхэм IэпыIэгъу афэхъурэ пстэуми ирэзэныгъэ гущыIэхэр КъумпIыл Мурат афигъэзагъ.
Республикэм и ЛIышъхьэ зэрилъытэрэмкIэ, чIыпIэ къин ифэгъэ чIыпIэгъум IэпыIэгъу фэхъуным зэрэфэхьазырхэм къегъэлъагъо цIыфхэр зэрэзэкъотхэр. ЦIыф зэрымысэу быбырэ пкъыгъоу Адыгеим къыщефэхыгъэм зэщигъэкъуагъэхэр зыпкъ игъэуцожьыгъэнхэмкIэ бэ зэшIозыхыгъэ предпринимательхэмрэ псэолъэшIхэмрэ «тхьашъуегъэпсэу» япIоныр атефэ. «А мафэхэм ищыкIэгъэ унашъохэр псынкIэу штэгъэнхэм, узэдеIэжьыным мэхьанэшхо иIагъ. СатыушIхэм ищыкIэгъэ техникэр, пкъыгъохэр, цIыф кIуачIэр къарагъэолIагъ, зэщыкъогъэ фэтэрхэр зыпкъ игъэуцожьыгъэнхэмкIэ IэпыIэгъу афэхъугъэх. А мафэхэм зишIуагъэ къэзыгъэкIогъэ пстэуми — гуфакIохэм, республикэм исхэу ячIыпIэгъухэм зишIуагъэ языгъэкIыгъэхэм сызэрафэразэр къэсэIо», — къыIуагъ АР-м и ЛIышъхьэ.
ИкIэухым КъумпIыл Мурат къызэрэхигъэщыгъэмкIэ, сэнэхьат зэфэшъхьафхэм арылажьэхэрэр: врачхэр, культурэм, искусствэм, къыдэгъэкIыжьыным, энергетикэм яIофышIэхэр, псэолъэшIхэр, юристхэр залым къыщызэрэугъоигъэх. Республикэ гупсэр нахь зэтегъэпсыхьагъэ хъуным яIахьышIу а пстэуми хашIыхьэ.
«Гуетыныгъэ фышъуиIэу къыхэшъухыгъэ сэнэхьатым илъэсыбэ хъугъэу шъузэрэрылажьэрэм шъузэрепхы. ТапэкIи гъэхъагъэ хэлъэу Iоф зэрэшъушIэщтым, Адыгеир нахь дахэ хъуным пае зэкIэми тызэгъусэу тызэрэдэлэжьэщтым сицыхьэ телъ. Хэгъэгум и Президентэу Владимир Путиным унашъо зэришIыгъэм тетэу Урысыем щыпсэурэ лъэпкъхэм языкIыныгъэ и Илъэс шъузэрэдгъашIорэм мэхьанэшхо иI, сыда пIомэ тигъэхъагъэхэмрэ титекIоныгъэхэмрэ якъэкIуапIэр зыкIыныгъэмрэ чIыгу гупсэм къырыкIощтымкIэ пшъэдэкIыжь зэрэтхьырэр къызэрэдгурыIорэмрэ ары»,— къыIуагъ АР-м и ЛIышъхьэ.
Урысые Федерацием и Президент и УказкIэ тынэу «Хэгъэгум ыпашъхьэ гъэхъагъэу щыриIэхэм афэшI» зыфиIоу я II-рэ шъуашэ зиIэр афагъэшъошагъ АР-м культурэмкIэ иминистрэу Аулъэ Юрэ, АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэрэ гуадзэу Лафышъ Рэмэзан.
ЩытхъуцIэу «УФ-м цIыфхэр социальнэу ухъумэгъэнхэмкIэ изаслуженнэ IофышI» зыфиIорэр фагъэшъошагъ АР-м IофшIэнымрэ социальнэ хэхъоныгъэмрэкIэ и Министерствэ иотдел ипащэу Къэндаур Тэмарэ. УФ-м и Президент и Щытхъу тхылъ фагъэшъошагъ АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ июридическэ отдел иупчIэжьэгъу шъхьаIэу Наталья Машкина-Мартыненкэм.
УФ-м и Президент и Рэзэныгъэ тхылъ къулыкъу зэфэшъхьафхэм Iоф ащызышIэрэ нэбгыри 9-мэ къаратыгъ. АР-м икъэралыгъо тынхэр, АР-м и ЛIышъхьэ ищытхъу ыкIи ирэзэныгъэ тхылъхэр нэбгырэ 30-м ехъумэ къафагъэшъошагъ.
АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет