А. Гусев
Кавказ инвестиционнэ зэхахьэм пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Траст-М» зыфиIорэм щыдашIыгъэгъэ зэзэгъыныгъэхэм атегъэпсыхьагъэу зекIоным ылъэныкъокIэ инвестиционнэ проектхэр Адыгеим щагъэцакIэх. ЗекIоным епхыгъэ псэуалъэхэм яшIын нэмыкIэу Мыекъопэ Iэзэгъу чIычIэгъыпс къэкIуапIэу щытыгъэм дэжь бальнеологическэ гупчэ щагъэпсыщт.
Адыгэ Республикэм и ЛIышъхьэу КъумпIыл Мурат псэолъэшIыпIэм щыIагъ ыкIи «Траст-М» зыфиIорэм изэхэщакIоу Максим Жиденкэм IофшIэнхэр зэрэкIохэрэм епхыгъэ зэдэгущыIэгъу щыдыриIагъ. Инвесторым къызэриIуагъэмкIэ, Iэзэгъупс IэзапIэу щытыгъэм ычIыпIэ 2025-рэ илъэсым къыщегъэжьагъэу гупчакIэр щашIы. 2027-рэ илъэсым бальнеологиемкIэ ыкIи реабилитациемкIэ гупчэу «Майкоптермы «Министочник» зыфиIорэр къыщызэIуахын мурад яI. Ащ номер 26-рэ хэтыщт. Зэхэубытагъэу инвестициехэр сомэ миллион 300-м къехъущтых. «МинисточниккIэ» тызаджэщтыгъэр зыпкъ зырагъэуцожьырэ нэужым цIыфэу зишIуагъэ зэрагъэкIыщтхэм япчъагъи хэпшIыкIэу хэхъощт. ТапэкIэ мазэм нэбгырэ мини 5 фэдизмэ IэпыIэгъу афэхъущтыгъэх.
Мы лъэхъаным анахьэу инженер-коммуникациехэр ары Iофтхьэбзэ гъэнэфагъэхэр зэрашIылIагъэхэр. Унэ кIоцIхэм япхыгъэ IофшIэнхэр рагъэжьагъэх. Максим Жиденкэм къызэриIуагъэмкIэ, график гъэнэфагъэм тетэу яIофшIэн агъэцакIэ. Iэзэгъупс къычIэщыпIэм изэтегъэпсыхьан анахьэу анаIэ тырагъэты, зэрагъэунэфыгъэмкIэ йодымрэ бромымрэ а псым бэу хэлъых. ЦIыфым ыпкъынэ-лынэкIэ ахэм мэхьанэшхо яI. Уз зэфэшъхьафхэм: гу-лъынтфэхэм, Iэпкъ-лъэпкъхэм ыкIи нервэхэм япхыгъэхэмкIэ а псым ишIуагъэ къэкIощт.
Iэзэгъупсхэм анэмыкIэу саекIэ зыщяIэзэщтхэ чIыпIэ мыщ къыщыдэлъытэгъэным иIофыгъо хэплъэнхэу АР-м и ЛIышъхьэ игъоу афилъэгъугъ. Псэуалъэм къыпэIулъ чIыпIэри нахь зэтегъэпсыхьэгъэн зэрэфаер ащ къыхигъэщыгъ. Инвесторым къызэриIуагъэмкIэ, гуIэтыпIэу, лъэпкъ нэшанэхэр къыдэлъытагъэхэу а чIыпIэр шIыгъэн фае.
Адыгеим и ЛIышъхьэ джыри зы проектышхо игъэцэкIэн зэрэкIорэм зыщигъэгъозагъ. Ар псыхъоу Шъхьэгуащэ инэпкъ щашIырэ зыгъэпсэфыпIэу «Red Bridge Resort» зыфиIорэр ары. Номери 100-м ехъу ащ хэтыщт, кIэлэцIыкIухэр зыщыджэгущтхэ унэхэр, шхапIэр, зызщагъэпскIыщтыр ыкIи нэмыкIхэр.Проектыр чэзыу-чэзыоу зэшIохыгъэ хъущт. 2022-рэ илъэсым номер 24-рэ агъэпсыгъ, сомэ милион 220-рэ инвесторым ахэм апэIуигъэхьагъ. 2024-рэ илъэсым рестораным Iоф ышIэу ригъэжьагъ, зыгъэпсэфыпIэм епхыгъэу ар щыт. Лъэпкъ проектэу «ЗекIонымрэ хьэкIэпэгъокIынымрэ» зыфиIорэм телъытагъэу инвесторым сомэ миллион 30 субсидиеу къыIэкIэхьагъ. Ежь икъэкIуапIэхэм ащыщэу сомэ миллиони 160-рэ зыхегъахъом, номер 20-кIэ хьакIэщым ифонд нахьыбэ хъугъэ.
Мы илъэсым ыкIэм ехъулIэу джыри зы псэуалъэ ашIыщт: зекIо-къэбар гупчэр рестораным къыгоуцощт. ЗекIоу къихьэхэрэм республикэм, ащ ичIыпIэ гъэшIэгъонхэм, цIыфэу щыпсэухэрэм яшэн-хабзэхэм, анахьэу нэIуасэ зызфашIымэ ашIоигъо чIыпIэхэм ыкIи нэмыкIхэм япхыгъэ къэбарыр къызIэкIагъэхьан алъэкIыщт. Автомобиль гъогухэм къапэблэгъэ чIыпIэхэри нахь зэтегъэпсыхьэгъэнхэм епхыгъэ Iофыгъохэри а проектым къыделъытэх.2030-рэ илъэсым гъэпсэфыпIэ гупчэм ишIын аухынэу ары. Ащ пае 2027-рэ илъэсым номер 72-рэ зыхэтыщт хьакIэщ унэ шъхьаIэм ишIын изичэзыу IофшIэнхэр аублэщтых. А номерхэм квадрат метрэ мини 6,2-рэ фэдиз зэлъаубытыщт. ГъэпскIыпIэ зыхэтыщт спа-комплексышхом ишIыни ащ къыхеубытэ. ПстэумкIи инвестициехэр сомэ миллиард 1,2-рэ фэдиз хъущтых.
Зэрэзэдэлэжьэщтхэ Iофыгъохэм ятегущыIэн зынэсхэм, Адыгеим и ЛIышъхьэ къыхигъэщыгъ проектхэмрэ Iофтхьабзэхэмрэ язэшIохын республикэм зекIоным зыщиушъомбгъунымкIэ мэхьанэшхо зэриIэр.«Адыгеим зекIоу къихьэхэрэм япчъагъэ илъэс къэс нахьыбэ зэрэхъурэр тэлъэгъу. Арышъ, гугъапIэ къэзытырэ проектхэр пхырыщыгъэнхэм тифедэ хэлъ, пшъэдэкIыжь зыхьырэ предпринимательхэм тишIуагъэ ядгъэкIыщт, фэIо -фашIэхэу къэуцухэрэри нахь дэгъоу зэшIохыгъэ зэрэхъущтхэм тыдэлэжьэщт. Ахэм къахеубытэх Iэзэгъупсхэм ямызакъоу, саемкIэ зэряIэзэщтхэри. Мы аужырэ илъэсхэм чIычIэгъ Iэзэгъупсхэр къызфэзыгъэфедэхэрэм япчъагъэ хэхъо. «Министочникэу» советскэ лъэхъаным цIыфхэм игъэкIотыгъэу къызфагъэфедэщтыгъэм епхыгъэ IофшIэнхэр зыпкъ зидгъэуцожьхэкIэ, Адыгеим щыпсэухэрэмрэ ихьакIэхэмрэ нахьыбэу екIуалIэхэзэ ашIыщт. ПроектыкIэхэм язэшIохын амал къытыщт фэIо-фашIэхэр нахьыбэ хъунхэмкIэ, загъэпсэфынымкIэ ыкIи япсауныгъэ нахь агъэпытэнымкIэ тишъолъыр къихьэрэ зекIохэми япчъагъэ хэхъощт», — къыхигъэщыгъ КъумпIыл Мурат.Илъэсэу икIыгъэм республикэм бэдэд зекIоу къихьагъэр — нэбгырэ миллион фэдиз. ГъэрекIопагъэ елъытыгъэмэ, зекIохэм япчъагъэ процент 17-кIэ нахьыбэ хъугъэ. 2024-рэ илъэсым къыщыублагъэу лъэпкъ проектхэм атетэу модульнэ хьакIэщ 11 ашIыгъ, мы илъэсым хьакIэщи 4 ахэм къахэхъуагъ. ФэIо-фашIэхэм къакIэкIорэ ахъщэр процент 12-кIэ нахьыбэ хъугъэ ыкIи сомэ миллиарди 3,7-м нэсыгъ. Республикэм ибюджет хэбзэIахьэу къихьэрэри фэдитIукIэ нахьыбэ хъугъэ, нэмыкIэу къэпIон хъумэ, сомэ миллион 227-м нэсыгъ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.