Сэнэхьатым илIэужыкIэхэр тиIэнхэм пае

«Шъолъыр журналистикэм иеджапI» зыфиIорэ проектым иIофшIэн Адыгеим щиублагъ.

Ащ иеджакIо хъу зышIоигъохэм якъы­хэхын джырэкIэ зэхэщакIохэр дэлажьэх. Мыекъуапэ ия 8-рэ лицей къыкIэлъыкIоу (ащ нэбгырэ 15 къыщыхахыгъагъ) рес­публикэ гимназием ахэр еблэгъагъэх. Я 8 — 11-рэ классхэм арыс кIэлэеджакIо­хэм зэхэщакIохэр аIукIагъэх, зырызэу адэгущыIэхэзэ, адыгабзэкIи урысыбзэкIи журналистикэм нэIуасэ зыфэзышIы, зыфэзыгъасэ зышIоигъохэр ныбжьыкIэхэм къахахыгъэх.— АР-м ижурналистхэм я Союз шъо­лъыр журналистикэм инеущ фэгумэкIы. «Шъолъыр журналистикэм иеджапI» зыфиIорэ проектыр республикэ грантэу къыдихыгъэм ихьатыркIэ егъэцакIэ. БлэкIыгъэ илъэсми ащ ишIуагъэкIэ Iоф тшIагъэ. «Лъэпкъ журналистикэм иеджа­пIэ» тыдэлэжьагъ ыкIи республикэм игурыт еджэпIэ зэфэшъхьафхэм аще­джэрэ ныбжьыкIэ 24-мэ адыгабзэкIэ Iоф адэтшIагъ. Ахэм ащыщэу еджэныр лъы­зыгъэкIуатэ зышIоигъохэм мы илъэс еджэгъуми Iоф адэтшIэщт, джырэкIэ купыкIэм игъэпсын ыуж тит — къыщи­Iуагъ пэублэ гущыIэм АР-м изаслужен­нэ журналистэу, АР-м ижурналистхэм я Союз итхьаматэу ТIэшъу Светланэ.НыбжьыкIэхэр шъолъыр журналистикэм хэзыщэщтхэ кIэлэегъаджэхэм нэIуасэ афашIыгъэх. Мыгъэ ахэм ясатырэ нэбгыритIу къыхэхъуагъ. ЗэкIэмкIи, ТIэшъу Светлани ахэтэу нэбгырих кIэлэеджакIохэм адэлэжьэщт: Урысыем изаслуженнэ журналистэу, республикэ гъэзетэу «Адыгэ макъэм» иредактор шъхьаIэ игуадзэу Тэу Замир, АР-м иза­служеннэ журналистэу, КъТРК-у «Адыгеим» радиомкIэ икъулыкъу ипащэу ХьакIэмыз Сусан, АР-м изаслуженнэ журналистэу, КъТРК-у «Адыгеим» итематическэ къулыкъу ипащэу Къуижъ Аминэт, АР-м изаслуженнэ журналистэу, КъТРК-у «Адыгеим» итематическэ къулыкъу иотдел ипащэу ГъукIэлI Сусан ыкIи республикэ гъэзетэу «Советская Адыгея» зыфиIорэм иIофышIэу Татьяна Филоновар. Пстэури нэIуасэ зызэфэхъу­хэм кIэлэегъаджэхэм загощи, ныбжьыкIэхэм зырызэу гущыIэгъу афэхъугъэх. УпчIэхэр аратыгъ, гъэцэкIэн мыинхэр къарагъэшIыгъ. АдыгабзэкIэ шъолъыр журналистикэм иеджапIэ щеджэ зышIоигъоу къыхахыгъэхэм ащыщ республикэ гимназием ия 10-рэ «Б» класс щеджэрэ КIыкI Самирэ. Журналист сэнэхьатым ар тIэкIу фэнэIуасэу щыт. Гимназием щагъэпсыгъэ медиагупчэм икуп хэт, еджэпIэ къэбархэр егъэхьазырых.

— Шъолъыр журналистикэм щеджэщтхэр къыхахынэу къызэрэтфэкIощтхэр зызэхэсэхым ащ хэлажьэ зышIоигъохэм захэстхагъ. Журналистикэр лъэшэу сыгу рехьы, арышъ, зыфэзгъэсэнэу сыфай, адыгабзэкIэ журналист сыхъуным сыкIэ­хъопсы, — къыIуагъ пшъэшъэжъыем.ЗэкIэмкIи мы гимназием иныбжьыкIэ нэбгырэ 18 еджэкIо 50 фэдизмэ къахахыгъ. Пчъагъэм щыщэу 5-мэ адыгабзэкIэ журналистикэм зыфагъэсэщт. Зичэзыу дэкIыгъор шъолъыр журналистикэм иеджапIэ икIэлэегъаджэхэм Красногвардейскэ районым щыряIэщт, ащ иныбжьыкIэхэми ахэдэщтых. Ащ ыуж илъэсыкIэм нэс кIощт егъэджэнхэр ауб­лэщтых. КъТРК-у «Адыгеим» (телевидениери радиори зэхэтэу), республикэ гъэзетхэу «Адыгэ макъэм» ыкIи «Советскэ Адыгеим» ахэр ащыкIощтых, чэзыу-чэзыоу кIэлэеджакIохэр яблэгъэ­щтых, теле-радио ыкIи гъэзет журналистикэм зыфагъэсэщт. Лъэпкъ журналистикэм гъэрекIо зыфэзыгъэсагъэхэу мыгъэ еджэныр лъызыгъэкIуатэ зышIоигъохэм 2027-рэ илъэсым ищылэ мазэ къыщегъэжьагъэу Iоф адашIэщт. Ащ фэдэ шIоигъоныгъэ нэбгырипшIымэ яI.Анцокъо Ирин.