Шэуджэн район администрациер
Къуаджэу Къэбэхьаблэ модельнэ тхылъеджапIэ къыщызэIуахыгъ.
Лъэпкъ проектэу «Унагъом» къыдыхэлъытагъэу IофшIэнхэр зэшIуахыгъэх. ЗэкIэмкIи сомэ миллиони 8-м ехъу ахэм апэIухьагъ. Джы ащ ихьатыркIэ шэпхъакIэхэм адиштэрэ тхылъеджэпIитIу Шэуджэн районым щэлажьэ.Модельнэ тхылъеджэпIакIэм игъэпсын къоджэдэсхэмкIэ хъугъэ-шIэгъэ ин. Ныбжь зэфэшъхьаф зиIэхэм ар афытегъэпсыхьагъ. КIэлэцIыкIухэм ыкIи зыныбжь икъугъэхэм ятIысыпIэхэр зэхэушъхьафыкIыгъэх. УщеджэнымкIэ гупсэфыпIэу зэрэщытым дакIоу, компьютерхэми уарылэжьэн, ищыкIагъэмэ, дунэе хъытыуми ущыхэхьан плъэкIыщт. Тхылъхэм япчъагъэ тедзэгъу 3424-кIэ агъэкIэжьыгъ. Джащ фэдэу псэолъакIэр Iофтхьэбзэ зэфэшъхьафхэр, егъэджэнхэр, къэгъэлъэгъонхэр, литературнэ пчыхьэзэхахьэхэр щызэхэщэгъэнхэм фытегъэпсыхьагъ.
ТхылъеджэпIакIэр мэфэкI шIыкIэм тетэу къызэIуахыгъ. Ащ хэлэжьагъэх АР-м культурэмкIэ иминистрэ игуадзэу ПхъэчыяшI Суандэ, АР-м и Лъэпкъ тхылъеджапIэ ипащэу КIыкI Бэллэ, Шэуджэн район администрацием ипащэу Аулъэ Рэщыдэ, общественнэ зэхахьэхэм ялIыкIохэр, къоджэдэсхэр. ЦIыфхэмкIэ ар культурнэ гупчэ зэрэхъущтым яцыхьэ зэрэтелъыр къэгущыIагъэхэм къыхагъэщыгъ.Анцокъо Ирин.