Лъэпшъыкъо Ф.
АР-м культурэмкIэ и Министерствэ иIэпыIэгъоу Адыгэ Республикэм лъэпкъ культурэмкIэ и Гупчэ шъолъыр семинар зэхищагъ. Лъэпкъ хъулъфыгъэ ыкIи бзылъфыгъэ шъуашэм ишIынкIэ амалэу агъэфедэхэрэм афэгъэхьыгъэ шъолъыр семинарыр республикэм и Лъэпкъ музей щыкIуагъ.
Ижъырэ Iэпэщысэхэм къафэгъэзэжьыгъэнымкIэ ыкIи зэлъягъэшIэгъэнхэмкIэ IэпэIэсэныгъэу ахэлъымкIэ ащ щызэхъожьыгъэх, лъэпкъ шъуашэм ишIынкIэ IэпэIасэхэм язэпхыныгъэ-зэдэлэжьэныгъэ нахь гъэпытэгъэным Iофтхьабзэр фэлажьэ. Лъэпкъ культурэм фэлажьэхэрэр, культурэм иунэхэм яIофышIэхэр зэхахьэм хэлэжьагъэх.Лъэпкъ культурэм и Гупчэ ипащэ игуадзэу, АР-м культурэмкIэ изаслуженнэ IофышIэу Анцокъо Фатимэ семинарыр къызэIуихыгъ.— Лъэпкъ шъуашэм мэхьанэшхо иI. Тилъэпкъ итарихъ, ихъишъэ, икультурнэ код къегъэлъагъо. Лъэпкъ культурэм и Гупчэ адыгэ шъуашэр къытхыхьагъ ыкIи «Нематериальные объекты культуры Адыгеи» зыфиIорэ реестрэм хигъэхьагъ. Федеральнэ реестрэм тишъуашэ хэгъэхьэгъэным, дунаим зэлъягъэшIэгъэным тигупчэ дэлажьэ. Лъэпкъ IэшIагъэхэм якъэухъумэн, язегъэушъомбгъун, нахьыбэ фэщагъэ хъуным непэрэ зэхахьэр афэIорышIэ. Адыгэ шъуашэм и Мафэу къэблагъэрэм мыри пэгъокI Iофтхьабз. Ар я 30-у Адыгеим щыхэдгъэунэфыкIыщт. Лъэпкъ хъулъфыгъэ ыкIи бзылъфыгъэ шъуашэхэм яшIынкIэ амалэу агъэфедэхэрэм афэгъэхьыгъэ семинарыр зэрищэнэу къедгъэблэгъагъ лъэпкъ IэшIагъэхэмкIэ Адыгеим и Ассоциацие ипащэу, Урысыем илъэпкъ IэпэIасэу Гумэ Ларисэ, — къыIуагъ Анцокъо Фатимэ.МэщбэшIэ Исхьакъ шъуашэм фэгъэхьыгъэ усэу ытхыгъэмкIэ Гумэ Ларисэ семинарыр къызэIуихыгъ.— Ижъырэ адыгэ шъуашэр лъэпкъ культурэм ынапэу зэрэщытым, адыгэ гупшысэр зэрэпхырыщыгъэм, ар культурнэ кIэным лIэужыкIэм уасэ зэрэфишIыщтым татегущыIэщт. ЩыIэныгъэм итхыпхъэ лIэшIэгъухэм къапхырыкIыгъэ хабзэхэр, тхыдэхэр къыреIотыкIых. Тхыпхъэхэр адыгэ лъэпкъым икультурэ изы Iахьых. Шъуашэм ишIуагъэрэ имэхьанэрэ лIэужыкIэм фэтIуатэхэзэ, тикультурэ бай ядгъэшIэщт. Лъэпкъ шъуашэм къешIэкIыгъэ тхыпхъэхэр, адынымкIэ хэбзыкIыгъэ шъошапхъэхэр, дышъэидагъэмкIэ зэрэбгъэкIэрэкIэщтым ыкIи нэмыкIхэр непэрэ зэхахьэм щызэхэтфыщтых,— къыIуагъ Гумэ Ларисэ.Лъэпкъ IэшIагъэхэм ядунай бай семинарым къекIолIэгъэ IэпэIасэхэр хащагъэх. Адыгэ IэшIагъэхэм яшIыкIэ изэтегъэуцожьын, язэгъэшIэн ыкIи ягъэфедэн мэхьанэшхо зиIэ лъэпкъ Iофы-гъоу зэрэщытыр Iофтхьабзэм къекIолIагъэхэм зэхашIагъ.Лъэпшъыкъо Фатим.