Обществэу «ШIэныгъэр»
«ШIэныгъэр. ГъэсакIохэр» зыфиIорэ проектым изичэзыу едзыгъо Адыгеим щыщ кIэлэегъэджэ нэбгырибгъу пхырыкIыгъ.
Проектыр Урысые обществэу «ШIэныгъэмрэ» Урысыем гъэсэныгъэмкIэ и Министерствэрэ зэгъусэхэу зэхащэ. Хэгъэгум щылэжьэрэ гъэсакIомэ къатыгъэ лъэIу тхылъ мин 15-м щыщэу экспертмэ къыхахыгъэр мини 3 ныIэп. КъыкIэлъыкIорэ едзыгъом къыщатыщт десэхэр джы ахэм агъэцэкIэщтых.Шъолъырыр къэзыгъэлъагъохэу зэнэкъокъум хэлажьэрэмэ ащыщ нэбгыриблыр гъэсэныгъэ организациемэ ащэлажьэх. Ахэр Мыекъуапэ, Адыгэкъалэ, Шэуджэн, Тэхъутэмыкъое ыкIи Джэджэ районхэм яеджапIэхэм якIэлэегъаджэх ыкIи япащэх. НэбгыритIур Адыгэ кIэлэегъэджэ колледжым ыкIи Мыекъопэ медицинэ колледжым ялIыкIох.Финалым ихьагъэхэм ащыщэу нэбгырихыр лъэныкъоу «ГъэсэкIо-кIэлэегъадж» зыфиIорэм хэлажьэх, нэбгыритIур — «ГъэсэкIо-пащэхэр» зыцIэм, джыри зы нэбгырэ гъэсэныгъэ организациемэ яупчIэжьэгъухэр зыхэт купым щэнэкъуакъо.ШышъхьэIум и 26-м къыщыублагъэу практическэ десэхэр хэлажьэрэмэ къашIых. КIэлэегъаджэхэр зэрихьылIэхэрэ хъугъэ-шIагъэмэ афэдэ Iофтхьабзэ горэ ежьхэм къаугупшысынышъ, ащ ежьхэм гъэсэкIо практикэу рахьылIэрэр фэшъхьаф гъэсэныгъэ организациехэм зэращагъэфедэжьышъущтыр къагъэшъыпкъэжьын фае.Проектым зэфэхьысыжь зыфашIырэ ужым анахь гъэсэкIо дэгъумэ ахъщэ шIухьафтынэу сомэ мин 50 зырыз аратыщт, зэкIэми анахь дэгъоу зэнэкъокъум зыкъыщызыгъэлъэгъощт нэбгырэ 200-мэ хэушъхьафыкIыгъэ егъэджэн программэр арагъэкIущт, анахь практик дэгъухэм нэIуасэ афашIыщтых.Къыхэдгъэщын, Урысые обществэу «ШIэныгъэм» игукъэкIхэр лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм елъытыгъэу егъэцакIэх.