А. Гусев
Адыгеим и ЛIышъхьэу КъумпIыл Мурат Урысые футбол союзым илIыкIохэм зэIукIэ республикэм и Правительствэ зычIэт унэм щадыриIагъ. Урысыем и Кубок итрофи-туррэ «Пути регионов турнира» зыфиIорэм ия 4-рэ едзыгъо игупчэ ешIэгъурэ Мыекъуапэ зэрэщыкIощтхэм ахэр тегущыIагъэх.
ЗэIукIэм хэлэжьагъэх АР-м культурэмкIэ иминистрэу Аулъэ Юрэ, Адыгеим экономикэ хэхъоныгъэмрэ сатыумрэкIэ иминистрэу КIыкI Артур, АР-м физическэ культурэмрэ спортымрэкIэ и Комитет итхьаматэу Дэгужъые Мурат, Урысые футбол союзым Iофтхьабзэхэм язехьанкIэ ыкIи зэлъыIэсыкIэ амалхэмкIэ ипащэу Кирилл Терешиныр, АР-м футболымкIэ ифедерацие итхьаматэу Хьакъунэ Нурбый, Урысые футбол союзымрэ футбол клубэу «Зэкъошныгъэмрэ» ялIыкIохэр.Урысыем и Кубок итрофи-тур къыдыхэлъытэгъэ Iофтхьабзэхэм язэхэщэнкIэ еплъыкIэу яIэхэр республикэм ипащэ къыфаIотагъэх. Хъугъэ-шIэгъэ шъхьаIэу хъущтыр Мыекъопэ «Зэкъошныгъэмрэ» Красноярскэ «Енисеимрэ» зэдыряIэщт ешIэгъур ары. Iоныгъом и 9-м стадионэу «Зэкъошныгъэм» ар щыкIощт. Кирилл Терешиным къызэриIуагъэмкIэ, ешIэгъур хэгъэгум иклубнэ футбол зэнэкъокъушхоу щыт, «Зэкъошныгъэмрэ» «Енисейрэ» язэнэкъокъу я 4-рэ едзыгъом игупчэ ешIэгъоу Урысые футбол союзым къыхихыгъ.
Урысыем и Кубок апэрэу Мыекъуапэ къащэщт. Урысые футбол союзым испортсмен цIэрыIохэр ары Адыгеим ар къылъызыгъэIэсыщтхэр. ЗэIукIэгъум ыпэкIэ футболыр зикIасэхэм яфестиваль къэлэ стадионым щыкIощт. Хэгъэгуми, республикэми яартист цIэрыIохэм концерт мыщ къыщатыщт, Урысыем и Кубок аIыгъэу сурэтхэр зыщытырагъэхыщтых, футболист цIэрыIохэм автографхэр къащыратыщтых, ешIэгъур мэфэкI шIыкIэм тетэу къыщызэIуахыщт. Телеканалэу «Матч-ТВ» зыфиIорэмкIэ ар занкIэу къагъэлъэгъощт.КъумпIыл Мурат зэрэхигъэунэфыкIыгъэмкIэ, Урысыем и Кубок икъыдэхынкIэ «Пути регионов FONВET» зыфиIорэм ия 4-рэ едзыгъо игупчэ ешIэгъу Адыгеим зэрэщыкIощтыр спорт хъугъэ-шIэгъэшхо хъущт. Республикэм и ЛIышъхьэ къулыкъу гъэнэфагъэхэм пшъэрылъ афишIыгъ Урысые футбол союзым игъусэхэу ешIэгъумрэ футболыр зикIасэхэм яфестивальрэ язэхэщэнкIэ ищыкIэгъэ Iофтхьабзэхэр зэрахьанхэу, шъолъыр творческэ купхэр ащ хэлэжьэнхэу, цIыфхэм ящынэгъончъагъэкIэ ищыкIэгъэ амалхэр къыдалъытэнхэу.«Спортым зэрэпыщагъэмкIэ хэгъэгум пэрытныгъэ щызыIыгъ шъолъырищмэ Адыгеир ащыщ. Физическэ культурэм пылъынхэмкIэ ищыкIэгъэ амалхэр зетэхьэх, яцIыкIугъом къыщегъэжьагъэу спортыр шIу ядгъэлъэгъуным тыпылъ. Мэхьанэшхо зиIэ мыщ фэдэ зэнэкъокъум ныбжьыкIэхэр нахьыбэу футболым пыщагъэ хъунхэмкIэ, тиспорт еджапIэхэм IэпыIэгъу ягъэгъотыгъэнымкIэ, спортсмен ныбжьыкIэхэм футболист цIэрыIохэм щысэ атырахынымкIэ ишIуагъэ къэкIощт», — къыIуагъ КъумпIыл Мурат.Республикэм щыпсэухэу физкультурэмрэ спортымрэ апылъхэр илъэси 5-м къыкIоцI процент 13-кIэ нахьыбэ хъугъэ, процент 60,8-м ар нэсыгъ. Лъэпкъ проектхэр, къэралыгъо программэу «Урысыем испорт» зыфиIорэр, «Единэ Россием» ипартийнэ программэхэр зэрагъэцакIэхэрэм яшIуагъэкIэ республикэм ипсэупIэ пстэуми адэсхэм спортым пылъынхэмкIэ амалэу яIэхэм ахэхъуагъ. 2018-рэ илъэсым къыщегъэжьагъэу спорт псэолъи 189-рэ Адыгеим щагъэпсыгъ. ПстэумкIи республикэм спорт псэолъэ 1089-рэ ит, ахэм азыныкъор къуаджэхэм адэт. Республикэм щыпсэухэрэм япроцент 62,4-мэ спорт псэуалъэхэр къызфагъэфедэх.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.