Iоныгъоу илъэсым ианахь мэзэ дэгъукIэ алъытэрэр къихьагъ. Фабэр нахь зэкIакIоу ригъэжьагъ. Мафэхэр гъэмафэм фэдэу фэбэщтых, пчыхьэрэ ыкIи пчэдыжьыпэрэ бжыхьэм фэдэу чъыIэтэгъэщт. АдыгеимкIэ бжыхьэм иапэрэ мазэ гъэмафэр джыри лъыкIуатэу къыпщэхъу. Ащ къыхэкIэу а мазэм «бабье лето» раIо.ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм къызэритыгъэмкIэ, Iоныгъом иапэрэ мафэ къыщыублагъэу къэучъыIэу регъажьэ. Ар къызыхэкIырэр мафэр нахь кIако зэрэхъурэр ыкIи тыгъэр нахь макIэу къызэрепсырэр ары. Тыгъэгъазэм и 21-м нэс мафэмрэ чэщымрэ якIыхьагъэ зэфэдиз хъущт.Мазэр ифэбагъэкIи ишынэгъакIэкIи зыпкъ итэу икIыщт. ГурытымкIэ температурэу щыIэщтыр шапхъэхэм ашIокIыщтэп, ощхэу къещхыщтыр шапхъэхэм анахь мэкIэщт. Апэрэ, ятIонэрэ ыкIи ящэнэрэ мэфипшIым макIэу ощх къещхын ыкIи пщагъоу щытын ылъэкIыщт.Апэрэ мэфипшIыр: чэщым фабэр градус 16 — 21-рэ, мафэм градус 25 — 30 щыIэщт, къыхэкIыщтых фабэр градус 33-м зыщынэсыщтхэр.ЯтIонэрэ мэфипшIыр: чэщым фабэу градус 12 – 17 щыIэщт, градуси 9-м зынэсыщтхэр къыхэкIыщтых. Мафэм градус 21 — 26-рэ щыIэщт.Ящэрэ мэфипшIыр: чэщым фабэр градуси 8 — 13-м, мазэм икIэухым градуси 4-м нэсыщт. Мафэм градус 18 — 23-м акIэхьащт. Iоныгъом ыкIэхэм къушъхьэхэм къащигъэщтын ылъэкIыщт.Губгъо IофшIэнхэм ом изытет яягъэ екIыщтэп. Псыхъохэм адэт псыр шапхъэу щыIэхэм ашIокIыщтэп. Ау мазэм къыкIоцI ощхыр лъэшэу къызещхырэм, псыхъохэм адэт псыр къыдэкIоен ылъэкIыщт.КIАРЭ Фатим.