Щэрыоным пыщагъэхэм ахэхъо

Щэрыоныр тиреспубликэкIэ спорт лъэпкъ шъхьаIэхэм ащыщ. Олимпийскэ чемпиони тиI, дунэе, Урысые зэнэкъокъухэм гъэхъагъэ ащызышIыгъэ, непэрэ мафэмкIи дэгъоу закъыщызыгъэлъэгъорэ спортсменхэри тимакIэхэп.

ЩэрыонымкIэ республикэ спорт еджапIэу олимпийскэ чемпионэу Сергей Алифиренкэм ыцIэ зыхьырэр 2020-рэ илъэсым къызэIуа­хыгъ. Ащ къакIохэрэм япчъагъэ илъэс къэс хэхъо. ГущыIэм пае, апэрэ илъэсым нэбгыри 123-рэ хъущтыгъэхэмэ, мыгъэ а пчъа­гъэр 160-м нэсыгъ. Ахэр аныбжь ыкIи яухьазырыныгъэ елъытыгъэу куп 17-у гощыгъэх, егъэджэнхэр едзы­гъуиплI мэхъу.— ЕзыгъэжьэгъакIэхэр купибл мэхъух, щэрыоным епхыгъэ егъэджэн сыхьатхэр нахьыбэу ахэм афызэхащэх, игъэкIотыгъэу зызгъэхьазырхэрэр къакIэ­лъэкIох. Ахэр купи 6 мэ­хъух. Спортым имастер хъунымкIэ кандидатхэр 3-у гощыгъэх. Спортсмен анахь лъэшхэр зы куп хэтых, — къытаIуагъ спорт еджапIэм итренерхэм.

Анна Андращук лъэгэпIэ инхэм анэсынымкIэ амалышIухэр Iэ­кIэлъ. Спортсменкэм илъэс 16 ыныбжь. ЩэрыонымкIэ спорт еджапIэм къызэкIом илъэси 10 хъугъэ къодыягъ.— Сянэрэ сятэрэ сырягъу­сэу Мэздахэ къыщыткIухьанэу тыкъэкIогъагъ. Ащ дэжьым щэрыопIэ чIыпIэм зэнэкъокъухэр щыкIохэу къэслъэгъугъ, ахэм сшIогъэшIэгъонэу сяплъыгъ. Ащ ыуж мы спортым сыхэхьанэу сызэрэфаер сянэ-сятэхэм яс­Iуагъ. Зи хамыIухьэу ащ сыкъащагъ, джащ къыщегъэжьагъэуи зысэгъасэ, — еIо Аннэ.

Аннэ зэлъашIэрэ тренерэу Георгий Гуляйченкэм егъасэ, кIэрахъор егъэфедэ. Iашэм килограммым ехъу ихьы­лъагъ. Ар Iэ лъэныкъомкIэ къэ­пIэтыныр, зы такъикъэ псагъэм тебгъэпсыхьэзэ пIыгъыныр IэшIэхэп. Ау пшъашъэм ар дэгъоу къыдэхъу. Мы илъэсым Урысыем ипервенствэ къыхьыныр фызэшIокIыгъ.ЩэрыонымкIэ Урысыем ичемпионат, ипервенствэ, къэралыгъом икубок икъыдэхынкIэ щыIэгъэ зэнэкъокъухэм ти­спортсменхэм гъэхъагъэ­хэр ащашIыгъэх. Александра Изматденовар команднэ ыкIи унэе зэнэкъокъухэм ащыте­кIуагъ. Зы спортсмен кIэлэеджакIохэм я Спартакиадэ хэлэжьэнэу фитыныгъэ къыдихыгъ. Непэрэ мафэмкIэ, Адыгеим испортсменитIу Урысыем ихэшыпыкIыгъэ командэ хэтых — Мария Бушуевамрэ Анастасия Кравцовамрэ.Мыщ къакIохэрэм япчъагъэ хагъэхъонымкIэ спорт еджапIэм амалыкIэхэр IэкIэлъ хъугъэ. ИлъэситIукIэ узэкIэIэбэжьмэ егъэджэн тедзэхэр зыща­рагъэхьырэ спорт чIыпIэу ар ашIыгъ. НыбжьыкIэу спортым пыщагъэхэм япчъагъэ нахьыбэ шIыгъэным мы екIолIакIэр фэIорышIэ. ЩэрыуапIэм къыращэлIэнхэм фэшI еджапIэхэр къакIухьэх, кIэлэеджакIохэм ахэплъыхьэх.— ЩэрыонымкIэ спорт еджапIэм шIоигъоныгъэ зиIэхэр къэкIонхэ алъэ­кIыщт. Ау ухьазырынхэр нэужым езыгъэжьэщтхэр къыхэзыхыхэрэр тренерхэр ары. Сабыим нэ­Iуасэ зыфашIы, ипсауныгъэ изытет ауплъэкIу, нэужым ны-тыхэм е хэбзэгъэуцугъэм диштэу ныбжьыкIэхэр зыпIухэрэм ищыкIэгъэ тхьапэхэр къырахьылIэнхэу афагъэнафэ, — тыщагъэгъозагъ спорт еджапIэм щылажьэхэрэм.ЩэрыонымкIэ спорт еджапIэм спорт кIэрахъомкIэ ыкIи шхончымкIэ узэрыощтыр щарагъашIэ. Ау ныбжьыкIэм ыныбжь, ипсауныгъэ изытет ялъытыгъэу IэшитIум яз тренерым фыхехы.Мафэм иапэрэ ыкIи ятIонэрэ Iахь тефэу кIэлэеджакIохэр зэ­реджэхэрэр къыдыхалъытэзэ, ухьазырынхэр пчэдыжьым ыкIи щэджэгъо ужым зэхащэх. Зы­ныбжь илъэси 10-м нэсыгъэхэм къащегъэжьагъэу мыщ щагъэхьазырых. Мы аужырэ илъэсхэм мы спорт лъэпкъыр агу рихьэу къа­кIохэрэм янахьыбэр пшъэшъэ­жъыех.Щэрыоныр спорт лъэпкъ къызэрыкIоп, ущытэу IашэкIэ ущэрыон къодыеп ащ къикIырэр. Пкъышъо­лыр гъэпытэгъэным, щэIагъэ, шэн пытэ пхэлъынхэм ыкIи спортсменым пшъэрылъэу зыфигъэуцужьырэм теубытагъэ хэлъэу фэкIоным уфегъасэ.Цэй Замир.