ИлъэсыкIэ еджэгъум фэчэфхэу

ШIэныгъэм и Мафэ фэгъэхьыгъэ зэхахьэхэр республикэм иеджапIэхэм тыгъуасэ ащыкIуагъэх. КIэлэеджэкIо мин 62-мэ илъэсыкIэ еджэгъур рагъэжьагъ. Ахэм ащыщэу нэбгырэ мини 5,5-м ехъур апэрэ классхэм арыхьагъ.

Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу республикэм гъэсэныгъэмрэ шIэныгъэм­рэкIэ иминистрэу Евгений Лебедевыр Урысыем и ЛIыхъужъэу Роман Тороховым ыцIэ зыхьырэ Мыекъопэ еджапIэу N 1-м щыIагъ. ЛIышъхьэм ыцIэкIэ кIэлэеджакIохэм, кIэлэегъаджэхэм, ны-тыхэм ар афэгушIуагъ.Джащ фэдэу мэфэкIым щыIагъэх Мыекъуапэ имэрэу Геннадий Митрофановыр, программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, Урысыем и ЛIыхъужъэу Роман Тороховым игупсэхэр.Лъэпкъ проектэу «Гъэсэныгъэм» диштэу еджапIэу N 1-р 2025-рэ илъэсым микрорайонэу Михайловым щагъэ­псыгъ. КIэлэцIыкIу 823-мэ илъэсыкIэ еджэгъур мыщ щырагъэжьэжьыщт. Ахэм ащыщэу нэбгыри 115-р апэрэ классхэм арыхьащтых. ИщыкIэгъэ кIэлэегъаджэхэр еджа­пIэм иIэх, ахэм азыныкъор ныбжьыкIэх.

АР-м гъэсэныгъэмрэ шIэныгъэмрэкIэ иминистрэ кIэлэцIыкIухэм, ахэр езгъа­джэхэрэм, янэ-ятэхэм зэхахьэм шIуфэс щарихыгъ, шIэныгъэм и МафэкIэ афэгушIуагъ. Евгений Лебедевым зэрэхигъэунэфыкIыгъэмкIэ, илъэсыкIэ еджэ­гъум иублэгъу анахьэу ежагъэхэр шIэныгъэм илъагъо теуцощт кIэлэцIыкIухэу апэрэу еджапIэм ипчъэшъхьаIу елъэбэкъощтхэмрэ мыгъэ зищыIэныгъэ гъогу къыхэзыхыщт кIэлэеджакIохэу я 11-рэ классхэм арыхьащтхэмрэ ары.«Мафэ къэс тикIэлэеджакIохэм шIэныгъэ куу языгъэгъотырэ кIэлэегъа­джэхэм лъэшэу сафэраз, гъэсэныгъэ Iофым хэщэгъэ ны-тыхэу кIэлэегъаджэ­хэмрэ кIэлэ­цIыкIухэмрэ IэпыIэгъу афэхъухэрэми «тхьашъуе­гъэпсэу» ясэIо», — къыIуагъ министрэм.Республикэм и ЛIышъхьэ кIэщакIо зыфэхъугъэ Iофтхьабзэу «Апэрэ классхэм арыхьэхэрэм апае шIухьафтын» зыфиIоу илъэс къэс зэхащэрэм къыды­хэлъытагъэу зэхахьэм ужым апэрэ классхэм кIощтхэм Iалъмэкърэ еджэнымкIэ агъэфедэщт пкъыгъохэмрэ шIухьафтынэу аратыгъэх. Адыгеим икIэлэеджэкIо мини 5,5-м ехъур арэущтэу агъэгушIуагъ. Ахэм ялэгъухэу Херсон хэкум ис нэбгырэ 678-ми, Краснодар краим ит адыгэ къуаджэхэм яеджапIэхэм яапэрэ класс­хэм арыхьагъэхэми ащ фэдэ шIухьафтынхэр афашIыгъэх.Нэужым Урысыем и ЛIыхъужъэу Роман Тороховым имыжъобгъу къэгъа­гъэхэр кIэлъыралъхьагъэх. ЕджапIэм ипащэу Ольга Романенкэм къызэри­IуагъэмкIэ, кIэлэцIыкIухэм патриотическэ пIуныгъэ ягъэгъотыгъэным кIэлэегъа­джэхэм мэхьанэшхо раты.Хэгъэгум иухъумэкIо тичIыпIэгъухэм ямузей еджапIэм къыщызэIуахыщт. ГуфэкIо купэу «Уралым», «Апэрэхэм я Движение», «Орлята России» зыфиIохэрэм япэублэ къутамэхэр, юнармейцэхэм, гъогурыкIонымкIэ инструктор цIыкIухэм якупхэр мыщ щызэхащагъэх. ЕджапIэм хэушъхьафыкIыгъэ дзэ операцием хэлажьэхэрэм зэIукIэгъухэр щадыряIэх. ХэушъхьафыкIыгъэ дзэ операцием иветеранэу, ЛIыхъужъныгъэм иордениплI къызфагъэшъошэгъэ подполковникэу Сергей Ковалевыр я 9-рэ «В» классым исхэм тыгъуасэ аIукIагъ.Илъэсым къыкIоцI кIэлэегъаджэхэм IэпэIэсэныгъэшхо зэрахэлъыр къэлъэгъуагъ: 2025 – 2026-рэ илъэс еджэгъур нэбгырэ 52-мэ дэгъу дэдэу къаухыгъ. КIэлэцIыкIухэм шIэныгъэ куу зэряIэр кIэлэегъаджэхэм я Урысые олимпиадэ къыщынэфагъ. Муниципальнэ едзыгъом кIэлэеджэкIо 19 щатекIуагъ ыкIи шIухьафтынхэр къыщахьыгъ. ГущыIэм пае, я 8-рэ классым ис Алена Кононовам предмети 7-мкIэ шIухьафтынхэр къырихыгъэх, я 10-рэ классым икIэлэеджа­кIоу Юлия Луневар китаибзэмкIэ кIэ­лэеджа­кIохэм я Урысые олимпиадэ ишъолъыр едзыгъо щатекIуагъ, кIэух зэнэкъокъоу Москва щыкIуагъэм хэлэжьагъ.«Адыгеим и ЛIышъхьэу КъумпIыл Мурат типащэу, федеральнэ гупчэр IэпыIэгъу къытфэ­хъузэ, республикэм иучреждениехэу гъэсэныгъэ языгъэгъотыхэрэр джырэ уахътэм диштэу зэтегъэпсыхьэгъэнхэмкIэ Iофышхо зэшIотэхы. Мэхьанэшхо зиIэр амалэу тIэкIэлъхэр нахь шIуагъэ къытэу къыз­фэдгъэфедэнхэр, тикIэлэцIыкIу­хэм гъэсэныгъэ-пIуныгъэ дэгъу ядгъэгъотыныр, Урысые­шхом ицIыф шъыпкъэхэу ахэр къэтэджынхэм тишъыпкъэу тыдэлэжьэныр ары. МыщкIэ кIэлэ­егъаджэр ары мэхьэнэ шъхьаIэ зиIэр. Президентэу Владимир Путинми ащ фэгъэхьы­гъэу къыIуагъ. КIэлэегъаджэхэм IэпыIэгъу ягъэгъотыгъэнымкIэ, ахэм ясэнэхьат мэхьанэу ратырэм зыкъегъэIэтыгъэнымкIэ пшъэрылъхэр къэралыгъом ипащэ къыгъэнэфагъэх. Федеральнэ гупчэм игъо ылъэгъугъэ пстэури щыIэныгъэм зэрэщыпхырытщыщтым имызакъоу, шъолъыр IэпыIэгъу лъэпкъ зэфэшъхьафхэр тапэкIи ядгъэгъотыщтых», — къыIуагъ Евгений Лебедевым.