АКъУ
Къалэу Курганинскэ дэт гурыт еджапIэр къэзыухыгъэ Нунэ Мартиросян зыкI къэралыгъо ушэтынхэмкIэ балл 298-рэ ригъэкъугъ. УрысыбзэмкIэ ыкIи биологиемкIэ балли 100 зырыз, обществознаниемкIэ балл 98-рэ къизыхыгъэ пшъэшъэжъыер Адыгэ къэралыгъо университетым естествознаниемкIэ ифакультет щеджэнэу къыхихыгъ.
Ушэтынхэм Нунэ ежь-ежьырэу интернетыр къызфигъэфедэзэ зафигъэхьазырыгъ, мафэ къэс сыхьат пчъагъэрэ мыпшъыжьэу ишIэныгъэхэм ахигъэхъуагъ.— Илъэсым къыкIоцI пэшIорыгъэшъэу тишIэныгъэхэр ауплъэкIунхэу зэхащэгъэ ушэтынхэм-кIэ балли 100 къисхыгъэп. Предмет пэпчъ балл 90-м нахь мымакIэу къисхыныр пшъэрылъэу зыфэзгъэуцужьыгъагъ. ЗыкI къэралыгъо ушэтынхэм балл анахь инхэр къисхыным сыщыгугъыгъэп, зэфэхьысыжьхэр зызэхэсэхым, лъэшэу сыгушIуагъ, — еIо Нунэ.Адыгэ къэралыгъо университетым къызэрэчIэхьагъэм ушъхьагъуитIу фэхъугъ. Мыщ щеджэхэрэ инэIуасэхэм лъэшэу агу зэрэрихьырэр къыраIозэ тырагъэгушIухьагъ, джащ фэдэу Нунэ университетым исоциальнэ сетьхэм акIэтхагъэу апшъэрэ еджапIэм лъыплъэщтыгъ ыкIи ыгу рихьыщтыгъ. Ащ нэмыкIэу, пшъэшъэжъыер Мыекъуапэ ыгукIэ фэщагъ, ащ ичIыопс, цIыфэу щыпсэухэрэр къыпэблагъэх.Нунэ кIэлэегъэджэ сэнэхьатыр зэригъэгъотын ыгу хэлъ. Адыгэ къэралыгъо университетым щигъэкIощт илъэсхэр зэрэгъэшIэгъоныщтхэм ицыхьэ телъ. НыбджэгъукIэхэр иIэ хъущтых, гъэсакIохэм нэIуасэ афэхъущт, апшъэрэ еджапIэм щызэхащэрэ Iофтхьабзэхэм чанэу ахэлэжьэнэу хьазыр.— Сэнэхьатыр къыхэшъухы зыхъукIэ, шъугу къышъуиIорэм шъуедэIу. Пшъэрылъ жъугъэуцуи, ар къыжъудэхъуным пае ищыкIагъэр зэкIэ жъугъэцакI, — ныбжьыкIэхэм закъыфигъэзагъ Нунэ Мартиросян.