ДзюдомкIэ Урысые зэнэкъокъухэр къалэу Назрань щыкIуагъэх.
ЗэлъашIэрэ советскэ дзюдоистэу, спортымкIэ дунэе класс зиIэ мастерэу Магомед Парчиевым ишIэжь фэгъэхьыгъэ турнирым зыныбжь илъэс 21-м емыхъугъэ кIалэхэр ыкIи пшъашъэхэр хэлэжьагъэх. Къэралыгъом ишъолъыр 15-мэ ялIыкIуи 196-мэ заушэтыгъ, ахэм ащыщэу 17-р пшъашъэх.Къыблэ федеральнэ шъолъырыр Адыгеимрэ Краснодар краимрэ къагъэлъэгъуагъ. Республикэу Ингушетием испортсменхэр анахьыбагъэх, нэбгырэ 45-рэ хъущтыгъэх. Зэнэкъокъум икIэух едзыгъо Адыгеим испортсменитIу бысымхэм ащыщхэм ябэныгъэх. Тао Инал — Рашид Хамчиевым, Рамазан Хидировыр — Ахмед Оздоевым атекIуагъэх, Адыгеим дышъэ медальхэр къыфахьыгъэх. НэбгыритIуми ятренерыр Мудрэнэ Аслъан. Нэпсэу Беслъан ыгъэсэрэ Милана Дзагаловам апэрэ чIыпIэр къыдихыгъ. Джэрз медальхэр къафагъэшъошагъэх Хьабэхъу Салбыйрэ Бэгъ Салимрэ.