ФутболымкIэ Адыгэ Республикэм и Къэралыгъо Совет — Хасэм ишIухьафтын зэрылъ Кубокым икъыдэхын хэлажьэ зышIоигъохэм стадионэу «Зэкъошныгъэм» пхъэдз ащыфызэхащагъ.
Адыгеим имуниципалитети 6-мэ якомандэ 12-мэ заушэтыщт. Джэджэ, Кощхьэблэ ыкIи Шэуджэн районхэр Iофтхьабзэм хэлэжьэщтхэп. Мыекъуапэ команди 6 къыгъэлъэгъуагъ.ЕшIэгъухэр шэмбэтым ыкIи тхьаумафэм стадионэу «Юностым» щыкIощтых. Финалыр чъэпыогъум и 5-м республикэ стадионэу «Зэкъошныгъэм» щырагъэкIокIыщт.
Финалым и 1/8-м щызэдешIэщтых: «Тэхъутэмыкъуай» — «Теуцожь район», «Спарта» (Мыекъуапэ) — «Ансар» (Мыекъуапэ), «Арго» (Мыекъуапэ) — «Факел» (Мыекъуапэ), «Легион» (Красногвардейскэ район) — «Адыгэкъал». 2025-рэ илъэсым Адыгеим и Кубок икъыдэхын хэлэжьэгъэ командэ анахь лъэшиплIыри мыщ хэлэжьэщтых: «Урожаир» (Мыекъопэ район) «Креативым» (Мыекъуапэ) дешIэщт, «Кавказ-Адэмыер» (Красногвардейскэ район) «Саусэрыкъом» (Мыекъуапэ) IукIэщт. ЕшIэгъухэр Iоныгъом и 5 — 6-м мафэм сыхьатыр 2-м ыкIи 4-м рагъэжьэщтых.