Теннис цIыкIумкIэ зэнэкъокъоу «Горные легенды» зыфиIорэр Iоныгъом и 4-м къыщегъэжьагъэу и 6-м нэс Мыекъуапэ щыкIощт. Мыщ ветеранхэм зыщаушэтыщт.
Турнирым хэлэжьэнхэу къэралыгъом ишъолъыр зэфэшъхьафхэм ялIыкIохэм лъэIу тхылъхэр къагъэхьыгъэх, ахэм янахьыбэр Урысыем и Къыблэ илIыкIох.ЗэхэщакIохэм программэ гъэшIэгъон зэхагъэуцуагъ. Илъэс 30, 40, 50, 60 ыкIи 70-рэ зыныбжь хъулъфыгъэхэр ыкIи бзылъфыгъэхэр зэнэкъокъущтых, текIоныгъэм ыкIи хагъэунэфыкIырэ чIыпIэхэм афэбэнэщтых.Iофтхьабзэр спорт комплексэу «Ошъутенэм» щыкIощт. Ветеранхэр зэрэзэнэкъокъущтхэм дакIоу загъэпсэфыщт, ныбджэгъу зэфыщытыкIэхэр агъэпытэщтых. Турнирыр спортым имэфэкI шъыпкъэ зэрэхъущтым щэч хэлъэп.