Теннис цIыкIумкIэ зэнэкъокъоу «Предгорье Кубани» зыфиIорэр Апшеронскэ районым ипсэупIэу Николаенкэм щыкIуагъ. Мыекъуапэ, Краснодар, Апшеронскэ, Шытхьалэ, Лэбапэ, Псыфабэ, нэмыкI псэупIэхэм яспортсмен 71-мэ заушэтыгъ.
Мы лигэр нэмыкIхэм зэратекIырэр — купхэр хъулъфыгъэхэмкIэ е бзылъфыгъэхэмкIэ гощыгъэхэп, IэпэIэсэныгъэу аIэкIэлъымкIэ зэтыраутых. Лигищми республикэм илIыкIохэм хагъэунэфыкIырэ чIыпIэхэр къащахьыгъэх. Апэрэм, анахь лъэшым, Александр Воронцовым джэрз медаль къыщыдихыгъ. ЯтIонэрэ ыкIи ящэнэрэ лигэхэм тыжьын медальхэр къащафагъэшъошагъэх Мыекъопэ спорт еджапIэу С. М. Джэнчатэм ыцIэ зыхьырэм зыщызыгъэсэхэрэ Вероника Ивановамрэ Нэгъэрэкъо Миланэрэ. НэбгыритIуми пчъагъэр 2:3-у кIэух зэIукIэгъухэр ашIуахьыгъэх.
Шъугу къэдгъэкIыжьын, зэнэкъокъоу «Предгорье Кубани» зыфиIорэм илигэ едзыгъуиплIэу зэтеутыгъ. Аужырэр тыгъэгъазэм ипэублэ рагъэкIокIыщт. Турнирым изэфэхьысыжьхэмкIэ лигэ пэпчъ испортсмен анахь лъэшхэр къэнэфэщтых. ТекIоныгъэр ыкIи хагъэунэфыкIырэ чIыпIэхэр къыдэзыхыхэрэм кубокхэр ыкIи медальхэр афагъэшъошэщтых.