«Зэкъошныгъэр» лъэкIуатэ

ФутболымкIэ Урысыем и Кубок икъыдэхын къыдыхэлъытагъэу Мыекъопэ «Зэкъошныгъэр» Дагъыстан икъалэу Избербаш икомандэу «Нефтяникым» мы мафэхэм дешIагъ.

Республикэ стадионым щыкIогъэ зэIукIэгъум цIыфыбэ зэфищагъ ыкIи ахэр рыкIэгъожьы­гъэхэп ащ къызэрекIолIагъэхэм.ЕшIэгъум ипэублэ бысымхэмкIэ дэгъу дэдэу егъэжьагъэ хъугъэ. ЯтIонэрэ такъикъым Хьэх Тамирлан Iащэ Анзор Iэгуаор IэкIигъэхьагъ, ар къэлапчъэм дауи, пчъагъэр къызэIуихыгъ. Мы уахътэм тифутболистхэм зэгуры­Iоныгъэ азыфагу илъэу джэгугъэх, къин къащымыхъоу Iэгуаор агъэ­зекIощтыгъ. Я 23-рэ такъикъым хьакIэхэм яIоф нахь дэй хъугъэ, Гаирберг Манаповым ятIонэрэ карточкэ гъожьыр къырагъэлъэгъуи, ешIапIэм рагъэкIыгъ. «Зэ­къошныгъэр» ыпэкIэ илъынымкIэ, пчъагъэм хигъэхъонымкIэ амалышIу иIэ хъугъэ. Ау мы уахътэм тикомандэ иешIакIэ нахь къеIы­хыгъ, тифутболистхэм Iэгуаор аIы­гъыныр, зэфагъэчъэжьыныр къыхахыгъ. НэбгырипшIэу къызэ­рэнагъэхэр къыдалъытэзэ, хьа­кIэхэм къэлапчъэм иухъумэн нахь зытырагъэпсыхьагъ. ЯтIонэрэ таймым ия 62-рэ такъикъ «Неф­тяникым» хэт Магомеднур Исаевым къэлапчъэм Iэгуаор дидзагъ, пчъагъэр 1:1 хъугъэ.Титренерскэ штаб ешIапIэм ит футболистхэм ащыщхэр зэбли­хъугъэх, ащ къихьагъэх IэпэIэ­сэ­ныгъэшхо зыIэкIэлъ Къонэ Амир­рэ Делэкъо Аскэррэ. Ахэм яшIуа­гъэкIэ «Зэкъошныгъэм» нахь зы­къышIэжьыгъ, хьакIэхэм акIуа­чIэ хэпшIыкIэу къыщыкIагъ.

ЗэIукIэгъум иохътэ шъхьаIэ ха­гъэхъуагъэм (я 92-рэ такъи­къым) тифутболистэу Эдди Цанава къэлапчъэм дэуагъ, «Нефтяникым» икъэлэпчъэIут хэукъо­ныгъэ ышIыгъ, Iэгуаор ыпашъхьэ къыщызэкIидзэжьыгъ. Ар Делэкъо Аскэр къызфигъэфеди, шъхьэ­кIэ Iэгуаор къэлапчъэм дидзагъ, пчъагъэр 2:1-у тикомандэ текIоныгъэр къыдихыгъ. Къэзэрэугъоигъэ цIыфхэр тифутболистхэм бэрэ Iэгу афытеуагъэх. Делэкъом «Зэкъошныгъэм» текIоныгъэр къыфихьыгъэми, клубым ипащэхэм ыкIи итренерхэм ешIэкIо анахь дэгъоу къыхагъэщыгъэр Эдди Цанава.Зэнэкъокъум изичэзыу едзыгъо къыдыхэлъытагъэу «Зэкъошны­гъэр» Красноярскэ къэзыгъэлъэ­гъорэ «Енисеим» IукIэщт. Тифутболистхэм, тренерхэм тафэгушIо, ыпэкIэ лъыкIотэнхэу, гъэхъагъэхэр ашIынхэу афэтэIо. Тикомандэ къы­гъэлъэгъуагъ аужырэ такъикъхэм анэс бэнэн зэрилъэкIыщтыр.