Адыгеим щызэлъашIэрэ футболистэу Даур Артур ишIэжь фэгъэхьыгъэ футбол цIыкIумкIэ зэнэкъокъу Мыекъуапэ щыкIуагъ.
Гъогум къытехъухьэгъэ хъугъэ-шIагъэм ыпкъ къикIыкIэ 2014-рэ илъэсым ащ идунай ыхъожьыгъ, ау иунагъо, иныбджэгъухэм, еджапIэм къыщыдеджагъэхэм ыкIи спортсменхэм ащыгъупшэрэп, ишIэжь агъэлъапIэ.Даур Артур республикэ футбольнэ еджапIэм зыщигъэсагъ, Мыекъопэ «Зэкъошныгъэм» щешIагъ. 1975 — 1976-рэ илъэсхэм къэхъугъэхэм яныбжьыкIэ командэ хэтэу 1991-рэ илъэсым Урысыем ипервенствэ текIоныгъэ къыщыдихыгъ. А уахътэм футболистхэр зыгъасэщтыгъэхэр Адыгеим изаслуженнэ тренерэу Тэтэр Нурбый.Даур Артур ишIэжь фэгъэхьыгъэ зэнэкъокъум командиплI хэлэжьагъ. Футболистхэм зэкIэми аныбжь илъэс 40-м ехъу.— Пстэуми анахь шъхьаIэр Артур зэрэтщымыгъупшэрэр ары. Ар егъашIэм тыгухэм арылъыщт, ишIэжь дгъэлъэпIэщт. Турнирым изэхэщэн ренэу къыдырагъаштэ ащ игупсэхэм, ахэри непэ зэнэкъокъум къекIолIагъэх, — къыIуагъ турнирыр рамыгъажьэзэ Тэтэр Нурбый.Зэнэкъокъум изэфэхьысыжьхэмкIэ, Даур Артур ишIэжь фэгъэхьыгъэ Кубокыр «ЧIыгушъхьэм» къыдихыгъ, «Фыщтым» ятIонэрэ чIыпIэр фагъэшъошагъ, «Джокерыр» ящэнэр.